(ភ្នំពេញ)៖ ឯកឧត្តម ហេង សុផាន់ណារិទ្ធ តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជាអគ្គនាយកបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ នៅក្នុងសិក្ខាសាលាបណ្តុះបណ្តាលស្តីពីសុវត្ថិភាពចរាចរណ៍ផ្លូវគោកសម្រាប់មន្ត្រីសហភាពសហព័ន្ធ និងសហជីពកម្មករនិយោជិត នៅសាលប្រជុំមជ្ឈមណ្ឌលសហប្រតិបត្តិការកម្ពុជា-ជប៉ុន នាព្រឹកថ្ងៃទី២៧ ខែមករា ឆ្នាំ២០២១នេះ បានឱ្យដឹងថា៖ កន្លងមកបេឡាជាតិសន្តិសុខសង្គម សហការជាមួយក្រសួងសាធារណការ និងដឹកជញ្ជូន បានរៀបចំកម្មវិធីអប់រំផ្សព្វផ្សាយដល់អ្នកបើកបររថយន្តដឹកកម្មករ និងកម្មករនិយោជិត អំពីច្បាប់ស្តីពីសុវត្ថិភាពចរាចរណ៍ផ្លូវគោក និងជំរុញឱ្យអ្នកបើកបររថយន្តដឹកកម្មករនិយោជិតទាំងអស់ប្រើប្រាស់រថយន្ដដឹកអ្នកដំណើរ ដើម្បីដឹកជញ្ជូនកម្មករនិយោជិត ឱ្យស្របតាមស្តង់ដារតាមការណែនាំរបស់រាជរដ្ឋាភិបាល។ ឯកឧត្តមបានបន្តថា៖ បើទោះបីជាកន្លងមកករណីគ្រោះថ្នាក់ចរាចរណ៍កើតលើបងប្អូនកម្មករនិយោជិតមានការថយចុះ និងស្ថានភាពកូវីដ១៩ នៅតែបន្តរីករាលដាលមិនទាន់ផុតរលត់ទៅវិញយ៉ាងណាក៏ដោយ ក៏បេឡាជាតិសន្តិសុខសង្គម (ប.ស.ស.) នៅតែបន្ត និងជំរុញការអប់រំផ្សព្វផ្សាយបន្ថែមទៀតអំពីច្បាប់ស្តីពីសុវត្ថិភាពចរាចរណ៍ផ្លូវគោក ដល់បងប្អូនអ្នកបើកបររថយន្តដឹកកម្មករ និងបងប្អូនកម្មករនិយោជិត ធ្វើយ៉ាងណាចូលរួមចំណែកក្នុងការកាត់បន្ថយករណីគ្រោះថ្នាក់ចរាចរណ៍ផ្លូវគោកឱ្យមកនៅកម្រិតទាបបំផុត ឆ្លើយតបទៅនឹងអនុសាសន៍ដ៏ខ្ពង់ខ្ពស់បំផុតពីសំណាក់ប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា “ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍” ។ ថ្មីៗនេះលោកជំទាវ មឹន មាណវី រដ្ឋលេខាធិការក្រសួងសាធារណការ នឹងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បានអះអាងថា ៖ ប៉ុន្មានឆ្នាំចុងក្រោយនេះ រថយន្តដឹកកម្មករប្រហែលជាពាក់កណ្តាលដែលបានផ្លាស់ប្តូររថយន្តដែលមានសុវត្ថិភាព។ លោកជំទាវ មឹន មាណវីឲ្យដឹងទៀតថា ក្នុងឆ្នាំ២០២០កន្លងទៅនេះ ករណីគ្រោះថ្នាក់ចរាចរណ៍ដែលកើតទៅលើរថយន្តដឹកជញ្ជូនកម្មករមានចំនួន ១៥លើក ដែលបណ្តាលឲ្យមានការស្លាប់កម្មករ និយោជិត ធ្វើដំណើរទៅធ្វើការងារចំនួន ៤នាក់ និងរងរបួស ធ្ងន់ស្រាលសរុប ៣៥៣នាក់។ ចំពោះរបាយការណ៍របស់ការិយាល័យគោលនយោបាយ នៃក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិតនៃបេឡាជាតិសន្តិសុខសង្គម កាលពីឆ្នាំ២០១៩កន្លងមក បានឲ្យដឹងថា មានរថយន្តដឹកកម្មករនិយោជិតសរុបចំនួន ៤៥៣៧គ្រឿង បានចរាចរណ៍ដឹកកម្មករនិយោជិតនៅកម្ពុជា ក្នុងនោះរថយន្តប្រភេទទេសចរណ៍ មានចំនួន ១៧១០គ្រឿង ស្មើនឹង ៣៨% និងរថយន្តដឹកទំនិញមានចំនួន ២៨២៧គ្រឿង ស្មើនឹង ៦២%៕