[Rasmei Kampuchea Daily News] - ស្ពានបេតុង ឫស្សីកែវ-ជ្រោយចង្វារ សាងសង់បាន ៣៦ ភាគរយហើយ
ភ្នំពេញៈ ការដ្ឋានសាងសង់ ស្ពានបេតុង ឆ្លងកាត់ទន្លេសាប ពីផ្លូវជាតិលេខ៥ ម្តុំឃ្លាំងសាំង ខណ្ឌឫស្សីកែវ ក្នុងខណ្ឌប្ញស្សីកែវ តភ្ជាប់ទៅតំបន់អភិវឌ្ឍន៍ ជ្រោយចង្វារ ខណ្ឌជ្រោយចង្វា គិតត្រឹមថ្ងៃទី២៣ ខែមករា ឆ្នាំ២០២១ នេះ សម្រេចបាន ៣៦ភាគរយហើយ ។ នេះបើយោងតាម មន្ទីរសាធារណការ និងដឹកជញ្ជូន រាជធានីភ្នំពេញ។
មន្ត្រីជំនាញ បាននិយាយថាៈ ស្ពានបេតុង មួយខ្សែនេះ គឺកំពុងសាងសង់ ស្របនឹងស្ពានបាឡេ ដែលកំពុងប្រើប្រាស់ ប្រចាំថ្ងៃ ហើយក្រោយស្ពានបេតុង សាងសង់រួច រដ្ឋាភិបាល នឹងរុះស្ពានបាឡេចេញ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានឱ្យដឹងថាៈ ស្ពានបេតុង ឫស្សីកែវ-ជ្រោយចង្វារ មានប្រវែង ៩២២ ម៉ែត្រ ទទឹង ២០,៥ ម៉ែត្រ និងចិញ្ចើមស្ពាន សម្រាប់ថ្មើរជើង ១,២៥ ម៉ែត្រ សងខាង ហើយគម្រោងនេះ ត្រូវបានបើកការដ្ឋាន សាងសង់ តាំងពីថ្ងៃទី២៣ ខែតុលា ឆ្នាំ២០១៧ មកម្ល៉េះ។
មន្ត្រីជំនាញ បានបញ្ជាក់ថាៈ ស្ពាននេះ មានតួនាទីសំខាន់ ក្នុងការរួមមចំណែក រំដោះចរាចរ លើផ្លូវជាតិលេខ៦ និងផ្លូវជាតិលេខ៥ ក៏ដូចជា ច្រកចេញចូល រាជធានីភ្នំពេញ៕
