ប្រមុខរាជរដ្ឋាភិបាលកម្ពុជាបានប្រកាស ដាក់ឱ្យប្រើប្រាស់ផ្លូវចំនួន២ខ្សែ ដែលមានទីតាំងនៅស្ពានអាកាស និង ផ្លូវក្រោមដីចោមចៅ ចាប់ពីថ្ងៃទី២២ ខែមករានេះតទៅ ដើម្បីជួយសម្រួលដល់ការកកស្ទះ ជូនប្រជាពលរដ្ឋដែលឆ្លងកាត់ នៅទីនោះ។ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងសម្ពោធអគារទីស្តីការថ្មី របស់ក្រសួងសាធារណការ និងវិទ្យាស្ថាន “តេជោសែន សាធារណការ និងដឹកជញ្ជូន” ស្ថិតនៅផ្លូវ ៥៩៨ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ នៅព្រឹកថ្ងៃ២២ ខែមករា ឆ្នាំ២០២១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាឱ្យឯកឧត្តម ឃួង ស្រេង អភិបាលរាជធានីភ្នំពេញដាក់ឱ្យបើកចរាចរណ៍ផ្លូវ២ខ្សែ នៅចោមចៅ ចាប់ពីថ្ងៃទី២២ ខែមករា តទៅ ដោយផ្លូវតភ្ជាប់ចរាចរទាំង២ខ្សែនោះ រួមមាន៖ ១. ផ្លូវតភ្ជាប់ចរាចរឯកទិស ពីផ្លូវជាតិលេខ៤ ឆ្ពោះទៅមហាវិថីចោមចៅ មានប្រវែង ៤៥៨ម៉ែត្រ ទទឹង៨.៥ម៉ែត្រ ជាផ្លូវក្រោមដីមានជំរៅ ៣.៧ម៉ែត្រ ធៀបនឹងកំពស់នីវ៉ូមហាវិថីចោមចៅ និង ២.ផ្លូវតភ្ជាប់ចរាចរឯកទិស ពីផ្លូវជាតិលេខ៤ បត់ស្តាំឆ្ពោះទៅផ្លូវជាតិលេខ៣ មានប្រវែង ១១៦ម៉ែត្រ ទទឹង៥.៥ម៉ែត្រ ជាផ្លូវក្រោមដី មានជំរៅ១.៨៦ម៉ែត្រ ធៀបនឹងកំពស់នីវ៉ូផ្លូវជាតិលេខ៣។ សម្តេចតេជោបញ្ជាក់ថា ការបើកឱ្យចរាចរណ៍ផ្លូវទំាង២ខ្សែនេះ គឺ ដើម្បីជួយសម្រួលការធ្វើចរាចរណ៍របស់ប្រជាពលរដ្ឋ ឱ្យកាន់តែមានភាពងាយស្រួល ខណៈបច្ចុប្បន្ននេះ ការធ្វើដំណើរមានការលំបាកនឹងត្រូវកាត់បន្ថយ ។ «សូមបញ្ជាក់ជូនថានៅស្ពានអាកាសដែលកំពុងស្ថាបនានៅចោមចៅកាលពីថ្ងៃទី១០ ខែតុលាឆ្នាំ២០២០ នៅពេលសម្ពោធបើកការដ្ឋានសាងសង់នៅទីនោះគឺខ្ញុំបានប្រកាសឱ្យដាក់ប្រើប្រាស់នៅផ្លូវក្រោមដីជាបណ្ដោះអាសន្នមួយខ្សែ។ប៉ុន្តែឥឡូវនេះគឺមានការប្រកាសដាក់ឱ្យប្រើប្រាស់ផ្លូវពង្រីកប្រវែង២០៤ ម៉ែត្រទទឹង ៥ ម៉ែត្រកន្លះ មានទិសដៅចរាចរណ៍ ពីផ្លូវជាតិលេខ៤ ឆ្ពោះទៅផ្លូវជាតិលេខ៣ហ្នឹងគឺជាផ្លូវទី១ ដែលយើងដាក់។ ទី២ ផ្លូវក្រោមដីទី២ដែលមានប្រវែង ៤៥៨ ម៉ែត្រទទឹង ៨ ម៉ែត្រ ៥០ មានទិសដៅចរាចរណ៍ផ្លូវជាតិលេខ៤ ឆ្ពោះទៅផ្លូវចោមចៅ។ អញ្ចឹងសុំឯកឧត្តម ឃួង ស្រេង ប្រកាសជាផ្លូវការនឹងបើកឱ្យដំណើរការចាប់តាំងពីម៉ោងនេះតទៅ។ហើយប្រជាពលរដ្ឋដែលធ្វើដំណើរមុនមានការលំបាក នឹងត្រូវកាត់បន្ថយការលំបាក។ដូច្នេះយើងបានប្រើប្រាស់នៅ៣ខ្សែជាមួយនឹងអ្វីដែលយើងបាននឹងកំពុងធ្វើទៅទៀត ដែលអាចរំដោះនូវចរាចរណ៍ពេលកំពុងកកស្ទះនៅក្នុងប្រទេសរបស់យើង។ នេះជាការប្រកាសដើម្បីជម្រាបជូនប្រជាជននៅរាជធានីភ្នំពេញក៏ដូចជាប្រជាជនដទៃទៀតដែលធ្វើដំណើរទទួលផលពីផ្លូវ អាកាសក្រោមដីចោមចៅនិងខណ្ឌពោធិ៍សែនជ័យរបស់យើង។នេះជាចំណុចដែលខ្ញុំគ្រាន់តែយកពេលវេលានេះដើម្បីធ្វើការប្រកាសដាក់ឱ្យប្រើប្រាស់ជាផ្លូវការនូវផ្លូវទាំង២ខ្សែនេះជា បណ្ដោះអាសន្ន»។ សូមបញ្ជាក់ថា ការដ្ឋានសាងសង់ស្ពានអាកាស និងផ្លូវក្រោមដី នៅរង្វង់មូលចោមចៅ ដែលជាស្ពានអាកាសទី៦ នៅក្នុង រាជធានីភ្នំពេញ ត្រូវបានបើកការសាងសង់កាលពីថ្ងៃទី២៩ ខែមិថុនា ឆ្នាំ២០១៨ ដោយក្រុមហ៊ុនវិនិយោគទុន អាណិកជន កម្ពុជា (OCIC) បានចំណាយថវិកាប្រមាណ ២២លានដុល្លារអាមេរិក ហើយគ្រោងចំណាយពេលសាងសង់រយៈពេល៣០ខែ៕