មន្ទីរសាធារណការ និងដឹកជញ្ជូនខេត្តកំពង់ចាម មានគម្រោង​ស្នើ​សុំទៅក្រសួងនូវផ្លាកសញ្ញាចរាចរណ៍ថ្មីបន្ថែមទៀត ដើម្បីដាក់​បំពេញបន្ថែមតាមផ្លូវមួយចំនួននិងផ្លូវខេត្តដែលទើបកសាងថ្មី ដើម្បី​​ចូលរួមកាត់បន្ថយគ្រោះថ្នាក់ចរាចរណ៍នៅតាមដងផ្លូវ ដោយ​សព្វថ្ងៃ៩៥ភាគរយ នៃផ្លូវក្នុងខេត្តមានផ្លាកសញ្ញាចរាចរណ៍។ នេះបើតាមការឲ្យដឹងពីលោក សេន សុភ័ក្រ អនុប្រធាន​ការិយាល័យបច្ចេកទេសនៃមន្ទីរសាធារណការនិងដឹកជញ្ជូនខេត្តកំពង់ចាម ប្រាប់ក្នុងកិច្ចពិភាក្សាកម្មវិធីសន្ទនាមតិ​នៃវិទ្យុជាតិ​ភ្នំ​ប្រុស​ភ្នំស្រីខេត្តកំពង់ចាម នាថ្ងៃទី២៦ ខែវិច្ឆិកា ឆ្ណាំ២០២០។ លោក សេន សុភ័ក្រ មានប្រសាសន៍ថា ក្នុងការគ្រប់គ្រងនិង​ត្រួត​ពិនិត្យ​​ផ្លាកសញ្ញាចរាចរណ៍តាមដងផ្លូវ មន្ទីរមានផែនការ៖ ១-មន្ទីរធ្វើបញ្ជីសារពើភណ្ឌផ្លាកសញ្ញាចរាចរណ៍នៅតាមផ្លូវជាតិ/ផ្លូវខេត្ត ក្នុងដែនសមត្ថកិច្ចផ្ទាល់​២-មន្ទីរមានផែនការចុះ​កំណត់​ទីតាំងផ្លាកសញ្ញាចរាចរណ៍ទាំងអស់ ក្នុងដែនសមត្ថកិច្ចរបស់ខ្លួន ៣-សិក្សា និងបន្តដាក់ផ្លាកសញ្ញាចរាចរណ៍ថ្មីបន្ថែម និងលើក​គម្រោងផ្លាស់ប្តូរផ្លាកសញ្ញាចាស់ៗដែលខូចខាត ដាក់ថ្មី​ជំនួស​មកវិញ៤-រាល់ខ្សែផ្លូវដែលមន្ទីរបានសិក្សា គឺមានបញ្ចូល​នូវ​បរិក្ខារផ្លូវថ្នល់រួមមាន ផ្លាកសញ្ញាចរាចរណ៍ គំនូសសញ្ញា បង្គោល​សុវត្ថិភាព បង្គោលគីឡូម៉ែត្រ ។ល។ លោកបានបន្តថា មន្ទីរក៏បានការសហការការគ្រប់គ្រង និងត្រួត​ពិនិត្យផ្លាកសញ្ញាចរាចរណ៍តាមដងផ្លូវឲ្យបានត្រឹមត្រូវ និងបាន​ធ្វើបច្ចុប្បន្នភាពផ្លាកសញ្ញាចរាចរណ៍ ហើយកំណត់ទីតាំង​ផ្លាក​សញ្ញាចរាចរណ៍នៅលើខ្សែផ្លូវ។ផែនការបន្តរបស់មន្ទីរ គឺបន្តជួស​ជុលថែទាំផ្លាកសញ្ញាចរាចរណ៍ដែលមានស្រាប់នៅលើដងផ្លូវ និងសិក្សាស្នើគម្រោងដាក់ផ្លាកសញ្ញាចរាចរណ៍ថ្មីបន្ថែមទៀត ។ សូមអជ្ញាធរដែនដីផ្ទាល់ជួយអន្តរាគមន៍ និងការពារបរិក្ខា​ចរាចរណ៍​​(ដូចជាផ្លាកសញ្ញាចរាចរណ៍ បង្គោលបង្ហាញផ្លូវរបា​សុវត្ថិភាព បង្គោលគីឡូម៉ែត្រជាដើម​។ក្នុងឱកាសនោះ​ដែរលោក​វរសេនីយ៍ទោ តុល គឹមស្រ៊ាន នាយរងការិយាល័យ​ចរាចរណ៍ផ្លូវ​គោកនៃស្នងការដ្ឋាននគរបាលខេត្តកំពង់ចាម បានឲ្យដឹងថា គិត​ពី​​ដើមឆ្នាំ ដល់ថ្ងៃទី២៥ ខែវិច្ឆិកា ឆ្នាំ២០២០ គ្រោះថ្នាក់ចរាចរណ៍​កើតឡើងចំនួន ១៧៥លើក(១៧៥លើក/២០២លើក) បណ្តាល​ឲ្យស្លាប់ ៩៣នាក់ របួសចំនួន ២៩៤នាក់ (ធ្ងន់ ១៤៤នាក់)។ លោកបន្តថា មូលហេតុបង្កឲ្យមាន​គ្រោះថ្នាក់ចរាចរណ៍​បណ្តាល​មកពី ប្រើប្រាស់ល្បឿនលឿន ធ្វេសប្រហែស មិនប្រកាន់ស្តាំ ជែង​ក្នុងស្ថានភាពគ្រោះថ្នាក់ មិនគោរពសិទ្ធិអាទិភាព បើកបរក្នុង​ស្ថាន​ភាព​ស្រវឹង និងងងុយដេក។ ក្នុងនោះមិនមានគ្រោះថ្នាក់ចរាចរណ៍ដែលបង្កឡើងដោយកក្តាស្លាកសញ្ញាចរាចរណ៍ណោះទេ ព្រោះក្នុងខេត្តកំពង់ចាម​នៅតាម​ដង​ផ្លូវសំខាន់ៗ ដូចជាផ្លូវជាតិ ផ្លូវកៅស៊ូគ្រប់ស្ថានភាព​សុទ្ធតែ​មាន​​ដាក់​​តាំងស្លាសញ្ញាចរាចរណ៍ ហើយអ្នកបើកបរក៏បាន​យល់​ដឹង​ច្រើនក្នុងការគោរពស្លាកសញ្ញាចរាចរណ៍ផងដែរ។ លោកវរសេនីយ៍ទោ តុល គឹមស្រ៊ាន បានបន្ថែមថា ទិសដៅបន្ត​នឹង​​បន្តផ្សព្វផ្សាយសេចក្តីជូនដំណឹង សេចក្តីណែនាំ ផែនការ​សកម្មភាពលើការរឹតបន្តឹងចច្បាប់ចរាចរណ៍ផ្លូវគោកតាមគោលដៅ​ដើមទី បង្កើនកិច្ចសហការជាមួយនាយកដ្ឋានសណ្តាប់ធ្នាប់ និងតាមរយៈភូមិឃុំមានសុវត្ថិភាពឲ្យប្រជាពលរដ្ឋយល់ដឹងពីច្បាប់ចរាចរណ៍ផ្លូវគោក ស្គាល់ផ្លាកសញ្ញាចរាចរណ៍​កាន់តែខ្ពស់​ថែមទៀត​​៕