[Kampuchea Thmey] - អាជ្ញាធរស្រុកសំរោង ជួសជុលផ្លូវលំ សម្រេចបាន៤៥គីឡូម៉ែត្រហើយ
2020-11-11
Go to the website published Kampuchea Thmey
ផ្លូវលំតាមបណ្តាភូមិនានាជាច្រើនខ្សែ ក្នុងមូលដ្ឋានស្រុកសំរោង ដែលរងការខូចខាត ដោយសារជំនន់ទឹកភ្លៀងប្រវែង ៥០គីឡូម៉ែត្រ ហើយបើគិតមកដល់ថ្ងៃទី១១ ខែវិច្ឆិកានេះ បានធ្វើការជួសជុលកែលម្អសម្រេចប្រមាណ ៤៥គីឡូម៉ែត្រហើយ នេះបើតាមអាជ្ញាធរស្រុកប្រាប់ឲ្យដឹង។
ក្រោយពីទឹកស្រកអស់ទៅវិញ អាជ្ញាធរស្រុកសំរោង បានធ្វើការកៀរគររកសប្បុរសជននានា មានដូចជា ក្រុមការងារ អាជ្ញាធរគ្រប់ ភូមិ ឃុំ ស្រុក ព្រះសង្ឃ បងប្អូនប្រជាពលរដ្ឋ បានចូលរួមចំណែកជួយឧបត្ថម្ភថវិកា ដើម្បីធ្វើការជួសជុលកែសម្រួលផ្លូវលំដែលខូចខាតទាំងនោះ ឲ្យបានល្អប្រសើរ សម្រាប់បម្រើផលប្រយោជន៍ប្រជាពលរដ្ឋ ។ រដ្ឋបាលស្រុកបានស្ថាបនាផ្លូវ ចាប់ពីថ្ងៃទី២ ខែវិច្ឆិកា ឆ្នាំ២០២០ មកម្ល៉េះ ដោយប្រើប្រាស់គ្រឿងចក្រជាច្រើនគ្រឿង ដោយ ១គីឡូម៉ែត្រ ត្រូវចំណាយទឹកប្រាក់ ១លានរៀល។ ក្រុមការងារជំនាញ នឹងខិតខំប្រឹងប្រែងបន្តទៀត អាចនឹងបញ្ចប់ត្រឹមថ្ងៃទី១៥ ខែវិច្ឆិកា ឆ្នាំ២០២០។ មកដល់ថ្ងៃនេះ អាជ្ញាធរស្រុកសំរោងបានជួសជុលផ្លូវលំនោះជិតរួចរាល់ហើយ នៅសល់៥គីឡូម៉ែត្រទៀតប៉ុណ្ណោះ៕
