ក្រសួងសាធារណការ និងដឹកជញ្ជូន កាលពីព្រឹកថ្ងៃទី ១៩ ខែតុលានេះ បានបើកសិក្ខាសាលាពិគ្រោះយោបល់ដើម្បីជ្រើសរើសរើសទីតាំងសម្រាប់សាងសង់ផ្លូវក្រវ៉ាត់ក្រុងទី៤ ប៉ុន្តែមិនទាន់បង្ហាញជាសាធារណៈឡើយ ដើម្បីការពារមិនឱ្យដីឡើងថ្លៃ។ សិក្ខាសិលានេះធ្វើឡើង ដោយមានការចូលរួមពីតំណាងក្រសួងពាក់ព័ន្ធចំនួន ៨ និងតំណាងក្រុមហ៊ុនឯកជនក្នុងស្រុក និងក្រៅប្រទេស ចំនួន ១០ ប៉ុន្តែមិនបើកឱ្យសាធារណជន ឬអ្នកសារព័ត៌មានចូលរួមឡើយ។ តាមរយៈ សិក្ខាសាលាពិគ្រោះយោបល់នេះ ក្រសួងសាធារណការ និងដឹកជញ្ជូន មិនបានបង្ហើបពីលទ្ធផល ស្តីពីទីតាំងច្បាស់លាស់ណាមួយ ដើម្បីស្ថាបនាផ្លូវក្រវ៉ាត់ក្រុងទី៤ នេះនៅឡើយទេ ដោយក្រសួងគ្រាន់តែបញ្ជាក់ថា ផ្លូវថ្មីនេះ នឹងសាងសង់បន្ទាប់ពីគម្រោងសាងសង់ផ្លូវក្រវ៉ាត់ក្រុងទី៣ បញ្ចប់។ ការសិក្សាគម្រោងផ្លូវក្រវ៉ាត់ក្រុងទី៤ គឺត្រូវបានធ្វើបទបង្ហាញដោយក្រុមហ៊ុន សាជីវកម្មផ្លូវ និងស្ពានចិន (CRBC) មកពីប្រទេសចិន នៅក្នុងកិច្ចប្រជុំពិគ្រោះយោបល់នេះ។ គួរបញ្ជាក់ថា ឯកឧត្តម ស៊ុន ចាន់ថុល រដ្ឋមន្រ្តីក្រសួងសាធារណៈ និងដឹកជញ្ជូន កាលពីចុងខែកញ្ញានេះ បានឱ្យដឹងថា ក្រសួងបានបញ្ចប់ការសិក្សាផ្លូវក្រវ៉ាត់ក្រុងទី៤ នេះហើយ។ ដោយឡែក ផ្លូវក្រវ៉ាត់ក្រុងទី៣ បច្ចុប្បន្នកំពុងស្ថាបនា ដោយគ្រោងនឹងបញ្ចប់ការនៅឆ្នាំ២០២២ខាងមុខ៕