[Phnom Penh Post] - ជប៉ុនផ្ដល់គ្រឿងចក្រ ១៥ គ្រឿងសម្រាប់សាងសង់ និងស្ដារផ្លូវនៅកម្ពុជា
2020-10-13
Go to the website published Phnom Penh Post
ភ្នំពេញៈ រដ្ឋាភិបាលជប៉ុនតាមរយៈកម្មវិធីអភិវឌ្ឍន៍សេដ្ឋកិច្ច និងសង្គមបានផ្តល់ជំនួយឥតសំណងជាគ្រឿងចក្រចំនួន ១៥ គ្រឿងដែលគិតជាថវិកាស្មើនឹង ៥០០ លានយ៉េន ឬប្រមាណ ៤,៥ លានដុល្លារដល់កម្ពុជា ដើម្បីយកទៅប្រើប្រាស់ក្នុងគម្រោងសាងសង់ និងស្ដារឡើងវិញលើផ្លូវអាទិភាពដែលរងការខូចខាត។
ពិធីប្រគល់ និងទទួលគ្រឿងចក្រទាំងនេះបានធ្វើឡើងកាលពីម្សិលមិញនៅអង្គភាពស្ថាបនាផ្លូវថ្នល់ក្នុងរាជធានីភ្នំពេញក្រោមអធិបតីភាព លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោក Mikami Masahiro ឯកអគ្គរាជទូតជប៉ុនប្រចាំនៅកម្ពុជា។
ថ្លែងនៅក្នុងពិធីនោះលោក ស៊ុន ចាន់ថុល បានលើកឡើងថា រដ្ឋាភិបាលជប៉ុនជានិច្ចកាលតែងជួយឧបត្ថម្ភគាំទ្រជាស្មារតី បច្ចេកទេស ឥណទាន កម្ចីសម្បទាន និងបានផ្ដល់នូវជំនួយឥតសំណងជាបន្តបន្ទាប់ សម្រាប់ការសាងសង់ ស្ដារ និងអភិវឌ្ឍហេដ្ឋារចនាសម្ព័ន្ធផ្លូវ ស្ពានសំខាន់ៗជាច្រើនកន្លែង និងកំពង់ផែអន្តរជាតិក្រុងព្រះសីហនុ។ ជំនួយទាំងនេះបានជួយសម្រួលដល់ចរាចរណ៍ដឹកជញ្ជូននៅកម្ពុជាសំដៅរួមចំណែកជំរុញកំណើនសេដ្ឋកិច្ច អភិវឌ្ឍសង្គម និងកាត់បន្ថយភាពក្រីក្ររបស់ប្រជាជនកម្ពុជា។
លោកបានថ្លែងថា៖ «យើងអាចកសាងប្រព័ន្ធហេដ្ឋារចនាសម្ព័ន្ធ ផ្លូវ ស្ពាន កំពង់ផែ ជាដើមនេះគឺដោយសារប្រទេសជាតិយើងមានសុខសន្តិភាពក្រោមការដឹកនាំដ៏ឆ្លាតវៃរបស់សម្ដេចអគ្គមហាសេនាបតីតេជោ ហ៊ុន សែន។ បើគ្មានសុខសន្ដិភាព យើងគ្មានឱកាសមកជួបជុំគ្នានៅកន្លែងនេះដើម្បីទទួលអំណោយ មកពីប្រទេសជប៉ុននូវគ្រឿងចក្រចំនួន ១៥ គ្រឿងយកមកសាងសង់ជួសជុលផ្លូវថ្នល់នៅក្នុងប្រទេសកម្ពុជាយើងនោះទេ»។
លោក Mikami Masahiro បានថ្លែងក្នុងពិធីនោះដែរថា បច្ចុប្បន្ននេះប្រទេសកម្ពុជាកំពុងសម្រេចបាននូវកំណើនសេដ្ឋកិច្ចខ្ពស់ ស្របពេលដែលចំនួនរថយន្តដឹកទំនិញ និងរថយន្តដឹកអ្នកដំណើរក៏មានការកើនឡើងយ៉ាងឆាប់រហ័សដែរ។
ថ្មីៗនេះប្រទេសជប៉ុនបានផ្ដល់ជំនួយសម្រាប់ធ្វើឱ្យប្រសើរឡើងវិញផ្លូវជាតិលេខ ១ ក្រោមជំនួយឥតសំណង និងគម្រោងធ្វើឱ្យប្រសើរឡើងវិញនូវផ្លូវជាតិលេខ ៥ តាមរយៈកម្ចីជាប្រាក់យ៉េន។
លោកឯកអគ្គរាជទូតរូបនេះបានបញ្ជាក់ថា៖ «គ្រឿងចក្រសាងសង់ដែលបានផ្ដល់ជូននាថ្ងៃនេះនឹងអាចកាត់បន្ថយរយៈពេលនៃការជួសជុល និងរក្សាអាយុកាលផ្លូវថ្នល់ឱ្យបានយូរអង្វែងផងដែរ។
ខ្ញុំសង្ឃឹមថា គ្រឿងចក្រសាងសង់នេះនឹងមានសារៈសំខាន់សម្រាប់ការរក្សាស្ថានភាពល្អរបស់ថ្នល់នៅកម្ពុជានាពេលអនាគត...គ្រឿងចក្រសាងសង់ទាំងនេះនឹងចូលរួមចំណែកដល់ការអភិវឌ្ឍសេដ្ឋកិច្ចរបស់កម្ពុជា នាពេលអនាគត និងពង្រឹងទំនាក់ទំនងរវាងប្រទេសយើងទាំង ២ បន្ថែមទៀត»។
បើតាមលោក ស៊ុន ចាន់ថុល ចាប់ពីឆ្នាំ ១៩៩៣ មកទល់បច្ចុប្បន្ន ជប៉ុនបានផ្ដល់ជំនួយឥតសំណងព្រមទាំងហិរញ្ញប្បទានដ៏ច្រើនសន្ធឹកសន្ធាប់សម្រាប់ការស្ដារ និងអភិវឌ្ឍហេដ្ឋារចនាសម្ព័ន្ធគន្លឹះក្នុងទិសដៅជំរុញកំណើនសេដ្ឋកិច្ច និងការអភិវឌ្ឍកម្ពុជាចំពោះវិស័យសាធារណការ និងដឹកជញ្ជូន។
ជប៉ុនបានផ្ដល់ហិរញ្ញប្បទាន សម្បទាន ជាជំនួយឥតសំណងសម្រាប់ស្ដារ សាងសង់ផ្លូវចំនួន ៣ ខ្សែមានផ្លូវជាតិលេខ ១ លេខ ៦ និងផ្លូវជាតិលេខ ៧ មានប្រវែងសរុប ២៥៤ គីឡូម៉ែត្រ ប្រើប្រាស់ថវិកាប្រមាណ ១៨៩ លានដុល្លារ។ ស្ពានធំៗដែលបានសាងសង់រួច រួមមាន ស្ពានគីហ្សូណា ស្ពានត្សឹបាសា ដែលចំណាយថវិកាប្រមាណ ១៨៦ លានដុល្លារ និងជួសជុលស្ពានជ្រោយចង្វារប្រវែង សរុប ១០៨០ ម៉ែត្រ ចំណាយថវិកាប្រមាណ ៣០ លានដុល្លារ។
លោករដ្ឋមន្ដ្រីបានបញ្ជាក់ថា បច្ចុប្បន្ន ជប៉ុន កំពុងតែផ្ដល់ជំនួយឥតសំណងសម្រាប់គម្រោងសាងសង់ស្ពានឡើងវិញនៅតំបន់ប្រឈមទឹកជំនន់មានស្ពាន ចំនួន ៧ ដែលស្ថិតក្នុងខេត្ដព្រៃវែង និងខេត្តក្រចេះដោយប្រើថវិកាប្រមាណ ៣៥ លានដុល្លារ។ ផ្លូវជាតិលេខ ៥ ប្រវែងប្រមាណ ៣៦០ គីឡូម៉ែត្របាន និងកំពុងសាងសង់ គឺជាឥណទានសម្បទានពីរដ្ឋាភិបាលជប៉ុនក្នុងទំហំថវិកាប្រមាណ ៥០០ លានដុល្លារ។ ក្រៅពីនេះជប៉ុនក៏កំពុងជួយសិក្សាសាងសង់កំពង់ផែទឹកជ្រៅជម្រៅ ១៤,៥ ម៉ែត្រនៅក្រុងព្រះសីហនុផងដែរ ដើម្បីឱ្យនាវាធំៗក្នុងតំបន់អាស៊ីប៉ាស៊ីហ្វិកអាចចូលចតបាន៕
