[Kampuchea Thmey] - មួយថ្ងៃសោះ មានរឿងពីរកើតឡើងមិននឹកស្មានដល់
2020-10-08
Go to the website published Kampuchea Thmey
ក្នុងថ្ងៃតែមូយម្សិលមិញនេះ មានព្រឹត្តិការណ៍ពីរកើតឡើង។ មួយគឺការបើកការដ្ឋានសាងសង់ផ្សារទំនើបអ៊ីអនមានជ័យនៅលើផ្លូវ ៦០ ម៉ែត្រ និងការប្រកាសស្ថាបនាស្ពានភ្ជាប់ពីកោះពេជ្រទៅតំបន់អភិវឌ្ឍកោះនរា។
ផ្សារទំនើបអ៊ីអនទី៣ បានបើកការដ្ឋានសាងសង់កាលពីព្រឹកថ្ងៃ ០៧ តុលា ម្សិលមិញនេះ នៅលើផ្ទៃក្រឡា១៧ម៉ឺនម៉ែត្រការ៉េ តាមដងមហាវិថីសម្តេចតេជោ ហ៊ុន សែន (ផ្លូវ៦០ម៉ែត្រ)។
ជាផ្សារទំនើបទី៣របស់អ៊ីអននៅកម្ពុជា បានបោះទុនវិនិយោគប្រមាណ២៩០លានដុល្លារអាមេរិក សាងសង់ឡើងដោយក្រុមហ៊ុន Hyundai Engineering ហើយគ្រោងដាក់ដំណើរការនៅឆ្នាំ ២០២២។
ដំណឹងមួយទៀត គឺប្រមុខរាជរដ្ឋាភិបាលសម្តេចតេជោ ហ៊ុន សែន បានប្រកាសនឹងទៅបើកការដ្ឋានសាងសង់ស្ពានតភ្ជាប់ពីកោះពេជ្រទៅតំបន់អភិវឌ្ឍកោះនរា នៅថ្ងៃ ២៦ តុលានេះ។
ក្រោយទទួលការយល់ព្រមពីសាលារាជធានីភ្នំពេញ ស្ពានថ្មីភ្ជាប់ទន្លេមេគង្គនេះ នឹងជួយរំដោះស្ថានភាពកកស្ទះនៅម្តុំច្បារអំពៅតាមបណ្តោយផ្លូវជាតិលេខ ១ ដែលកំពុងមានការរីកចម្រើនក្នុងការសាងសង់សំណង់បុរី រួមទាំងជាផ្លូវភ្ជាប់ទៅកំពង់ផែភ្នំពេញនិងផ្លូវក្រវាត់ក្រុងទី ៣ ផងដែរ៕
