[CEN] - ហាមឃាត់មិនឲ្យពលរដ្ឋម្ចាស់ផ្ទះ ឬម្ចាស់អាជីវកម្មផ្សេងៗនៅជាប់ផ្លូវ ជីកគាស់កាយ និងឈូសឆាយលើចំណីផ្លូវសាធារណៈរបស់រដ្ឋតាមដងមហាវិថី វិថី និងអនុវិថីទាំងអស់ ក្នុងខេត្តព្រះសីហនុ
2020-10-08
Go to the website published CEN
ព្រះសីហនុ៖ រដ្ឋបាលខេត្តព្រះសីហនុ សេចក្តីជូនដំណឹង ស្ដីពី ការហាមឃាត់មិនឲ្យពលរដ្ឋម្ចាស់ផ្ទះឬម្ចាស់អាជីវកម្មផ្សេងៗនៅជាប់ផ្លូវ ជីកគាស់កាយ និងឈូសឆាយលើចំណីផ្លូវសាធារណៈរបស់រដ្ឋតាមដងមហាវិថី វិថី និងអនុវិថីទាំងអស់ ក្នុងខេត្តព្រះសីហនុជាលក្ខណៈឯកជនជាដាច់ខាត ។
ការឈូសឆាយរៀបចំហេដ្ឋារចនាសម្ពន្ធ័ផ្សេងៗ ចាំបាច់ត្រូវមានការអនុញ្ញាតច្បាប់ពីរដ្ឋបាលខេត្ត និងធ្វើបានតាមរយៈក្រុមការងារបច្ចេកទេសស្ថាបនា ដែលទទួលស្គាល់ដោយរដ្ឋបាលខេត្ត ។
បើតាមសេចក្តីជូនដំណឹងរបស់រដ្ឋបាលខេត្តព្រះសីហនុស្តីពី ការហាមឃាត់ការជីកគាស់កាយ និងឈូសឆាយលើចំណីផ្លូវសាធារណៈរបស់រដ្ឋ តាមដងមហាវិថី វិថី និងអនុវិថីទាំងអស់ ក្នុងខេត្តព្រះសីហនុ បានឲ្យដឹងថា រដ្ឋបាលខេត្តព្រះសីហនុ សូមជម្រាបជូន បងប្អូនប្រជាពលរដ្ឋ ប្រតិបត្តិករ និងអង្គភាពជំនាញពាក់ព័ន្ធ ទាំងអស់ជ្រាបថា កន្លងមក រដ្ឋបាលខេត្តព្រះសីហនុ បានពិនិត្យឃើញថា មានបងប្អូនប្រជាពលរដ្ឋ ក៏ដូចជា ប្រតិបត្តិករ និងអង្គភាពជំនាញពាក់ព័ន្ធមួយចំនួន បានជីកគាស់កាយ និងឈូសឆាយលើចំណីផ្លូវសាធារណៈ របស់រដ្ឋដោយគ្មានការអនុញ្ញាតរដ្ឋដោយអន្លើៗ ពីរដ្ឋបាលខេត្តព្រះសីហនុ ដែលបានធ្វើឱ្យខូចខាតទ្រព្យសម្បត្តិសាធារណៈរបស់ដើម្បីថែរក្សា ការពារទ្រព្យសម្បត្តិសាធារណៈ រដ្ឋបាលខេត្តព្រះសីហនុ សូមធ្វើការណែនាំដល់បងប្អូនប្រជាពលរដ្ឋ ប្រតិបត្តិករ និងអង្គភាពជំនាញពាក់ព័ន្ធទាំងអស់ មុននឹងធ្វើការជីកគាស់កាយ និងឈូសឆាយលើចំណីផ្លូវសាធារណៈរបស់រដ្ឋ ត្រូវដាក់ពាក្យស្នើសុំមករដ្ឋបាលខេត្តជាមុន ដើម្បីចាត់មន្ត្រីជំនាញចុះពិនិត្យលក្ខណៈបច្ចេកទេសទីតាំងជាក់ស្តែងបានទាន់ពេលវេលា ជៀសវាងផលប៉ះពាល់ និងរងការខូចខាតនានាដោយយថាហេតុ។ ក្នុងករណីបងប្អូនមិនអនុវត្តតាមការណែនាំខាងលើ រដ្ឋបាលខេត្តព្រះសីហនុ នឹងផ្អាកការផ្គត់ផ្គង់ទឹក និងចរន្តអគ្គិសនីរយៈពេល ៥(ប្រាំ)ខែ។
ផ្អែកតាមមាត្រា៧៧ នៃច្បាប់ស្តីពីផ្លូវថ្នល់ចែងថា ជនណាដែលធ្វើកិច្ចការសាធារណការទាំងឡាយ ដោយគ្មានការអនុញ្ញាតពីសមត្ថកិច្ចគ្រប់គ្រងផ្លូវថ្នល់ និងបណ្តាលឱ្យខូចខាតដល់តួផ្លូវ ទ្រូងផ្លូវ ជាយផ្លូវ គែមផ្លូវ និងដីនៅសល់នៃចំណីផ្លូវ ត្រូវតម្រូវឱ្យជួសជុលឡើងវិញឱ្យដូចស្ថានភាពដើម និងត្រូវផ្តន្ទាទោសដាក់ពន្ធនាគារ ពី ២(ពីរ)ឆ្នាំ ទៅ ៥(ប្រាំ)ឆ្នាំ និងពិន័យជាប្រាក់ពី ៤.០០០.០០០(បួនលាន)រៀល ទៅ ១០.០០០.០០០ (ដប់លាន)រៀល»។
ទទួលបានសេចក្តីជូនដំណឹងខាងលើ សូមបងប្អូនប្រជាពលរដ្ឋ ប្រតិបត្តិករ និងអង្គភាពជំនាញពាក់ ព័ន្ធទាំងអស់ អនុវត្តតាមខ្លឹមសារខាងលើ ឱ្យទទួលបានប្រសិទ្ធភាពខ្ពស់៕
