[CEN] - រដ្ឋមន្ត្រីសាធារណការ អំពាវនាវដល់ប្រជាពលរដ្ឋ និងក្រុមហ៊ុនដឹកជញ្ជូន ដែលមិនទាន់បានយកយានយន្តទៅឆៀក សូមយកយានយន្ត ទៅឆៀកតាមច្បាប់កំណត់
2020-10-07
Go to the website published CEN
ភ្នំពេញ៖ នៅថ្ងៃពុធទី៧ ខែតុលា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេសយានយន្ត(ឆៀក) សាខាកំបូល រាជធានីភ្នំពេញ ដោយមានការអញ្ជើញចូលរួមពីថ្នាក់ដឹកនាំក្រសួង អគ្គនាយិកាក្រុមហ៊ុនCMVIC អាជ្ញាធរដែនដី មន្ត្រីរាជការ និងភាគីពាក់ព័ន្ធទាំងអស់ផងដែរ។
មណ្ឌលឆៀកថ្មីនេះមានផ្ទៃដីប្រមាណជិត១ហិកតា សាងសង់ឡើងក្នុងខែកុម្ភៈ ឆ្នាំ២០២០ និងរួចរាល់ ជាស្ថាពរនៅចុងខែកក្តដា ឆ្នាំ២០២០ មណ្ឌលនេះរួមមានសំណង់អគារដែលបំពាក់ដោយឧបករណ៍ឆៀកចំនួនពីរខ្សែថ្មី ស៊េរីឆ្នាំ២០១៩ ផលិតនៅប្រទេសចិន ក្នុងនោះរួមមានឧបករណ៍វាស់ផ្សែងសាំង វាស់ផ្សែង ម៉ាស៊ូត វាស់ល្បឿន វាស់ស៊ីផ្លេ វាស់លំងាកចង្កូត វាស់បាច់ពន្លឺហ្វាកូត ថ្លឹងទម្ងន់យាន និងវាស់កម្លាំង ហ្វ្រាំង និងមើលដោយភ្នែក៖ មើលជុំវិញយាន មើលបាតយាន ក្នុងយាន និងប្រព័ន្ធម៉ាស៊ីន។
បច្ចុប្បន្ននេះមានមណ្ឌលឆៀកយានយន្តសរុបចំនួន ១៥កន្លែង និងឆៀកចល័ត ៣គ្រឿង ក្នុងនោះរាជធានី ភ្នំពេញមាន ៦កន្លែង និង៩កន្លែងនៅតាមខេត្តចំនួន៩ដូចជា៖ ខេត្តបាត់ដំបង កំពង់ចាម សៀមរាប ព្រះសីហនុ កំពង់ស្ពឺ កំពង់ឆ្នាំង ក្រចេះ រតនគិរី និងខេត្តព្រះវិហារ ដោយឡែកឆៀកចល័ត៣គ្រឿងកំពុងធ្វើ ប្រតិបត្តិការឆៀករបស់ខ្លួននៅតាមខេត្តឆ្ងាយៗមួយចំនួនដែលមិនទាន់មានមណ្ឌលឆៀក និងគ្រោងស្ថាបនាទីតាំងចំនួន៤កន្លែងទៀតនៅឆ្នាំ២០២១ និង២០២២ នៅតាមបណ្តានានាដូចជា៖ ខេត្តកំពង់ធំ ស្វាយរៀង បន្ទាយមានជ័យ និងខេត្តកំពត។
ឯកឧត្តមទេសរដ្ឋមន្ត្រីក៏បាន ជម្រាបជូនថា បន្ទាប់ពីការអនុវត្តរឹតបន្តឹងការអនុវត្តច្បាប់ចរាចរណ៍ផ្លូវគោក ប្រជាពលរដ្ឋ មានការភ្ញាក់រលឹកច្រើន ហើយបច្ចុប្បន្ននេះមានទិន្នន័យ យានយន្តផុតសុពលភាពត្រួតពិនិត្យលក្ខណៈបច្ចេកទេស ប្រមាណ ២៨%។ ឯកឧត្តមក៏បាន បញ្ជាក់ផងដែរថា មកទល់ពេលនេះយើងបាន ធ្វើការផ្ញើសារ SMS ចេញទៅក្រើនរំលឹកម្ចាស់យានយន្ត ប្រមាណ ១២.០០០ នាក់ហើយ ហើយយើងក៏បន្តផ្ញើសារនេះដើម្បីជូនដំណឹងទៅកាន់ពួកគាត់ផងដែរ សំដៅចូលរួមកាត់បន្ថយគ្រោះថ្នាក់ចរាចរណ៍។
ថ្លែងក្នុងកិច្ចប្រជុំនាឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់អំពីគោលនយោបាយរបស់រាជរដ្ឋាភិបាល ក្នុងការផ្តល់សេវាសាធារណៈ សេវាចាំបាច់ ប្រកបដោយតម្លាភាព ប្រសិទ្ធភាព និងឆាប់រហ័ស ជូនបងប្អូនប្រជាពលរដ្ឋ ការដាក់ឱ្យដំណើរការមណ្ឌលប្តូរ ឬពន្យារប័ណ្ណបើកបរនៅផ្សារទំនើបអ៊ីអន១ អ៊ីអន ២ និងផ្សារទំនើបជីបម៉ុង ណូរ៉ូម៉ល ដើម្បីបង្ខិតសេវានេះទៅកៀកប្រជាពលរដ្ឋ ផ្តល់ភាពងាយស្រួលដល់បងប្អូនប្រជាពលរដ្ឋដែលមានបំណងចង់ប្តូរ ឬពន្យារប័ណ្ណបើកបរ ការដាក់ឱ្យប្រើប្រាស់ប្រព័ន្ធអនឡាញចុះបញ្ជីយានយន្ត ការដាក់ពាក្យស្នើសុំត្រួតពិនិត្យលក្ខណៈបច្ចេកទេសយានយន្តតាមប្រព័ន្ធអនឡាញ ការរៀបចំកម្មវិធីបប្រឡងយកប័ណ្ណបើកបរ ការលក់លេខចុះបញ្ជីពិសេសផ្ទាល់ខ្លួនសម្រាប់យានយន្ត ការផ្ទេរកម្មសិទ្ធិយានយន្ត ដែល អាចឱ្យប្រជាពលរដ្ឋងាយស្រួលក្នុងការស្នើសុំសេវា ស្របតាមប្រសាសន៍ដ៏ខ្ពង់ខ្ពស់សម្ដេចតេជោនាយក រដ្ឋមន្ត្រីគឺ ធ្វើឱ្យបានលឿន ធ្វើឱ្យមានប្រសិទ្ធភាព និងធ្វើឱ្យមានតម្លាភាព។
ជាមួយគ្នានោះផងដែរ ឯកឧត្តមទេសរដ្ឋមន្ត្រីបានបន្ថែមថា ក្រសួងនឹងបន្តខិតខំរកនីតិវិធីផ្សេងទៀតដើម្បី ផ្តល់សេវាងាយស្រួលជូនបងប្អូនប្រជាពលរដ្ឋ និងបន្តសាងសង់ប្រព័ន្ធហេដ្ឋារចនាសម្ព័ន្ធបន្ថែមទៀត ដូចជា៖ ការពង្រីកនិងពង្រឹងគុណភាពផ្លូវ ការសាងសង់ស្ពាន និងកំពង់ផែជាដើម ដើម្បីឱ្យប្រព័ន្ធដឹក ជញ្ជូនមានភាពប្រកួតប្រជែង អាចដឹកជញ្ជូនបានក្នុងតម្លៃថោក និងអាចទាក់ទាញវិនិយោគិនបង្កើត ការងារធ្វើ បង្កើនប្រាក់ចំណូលជូនប្រជាពលរដ្ឋផងដែរ។
ឆ្លៀតក្នុងឱកាសនោះផងដែរ ឯកឧត្ដមទេសរដ្ឋមន្ត្រី បានបន្តទៀតថា ទោះបីប្រទេសយើងក៏ដូចសកលលោកកំពុងប្រឈមនឹងបញ្ហាជំងឺកូវីដ-១៩យ៉ាងណាក្ដី ក៏រាជរដ្ឋាភិបាលនៅតែបន្តស្ថាបនាហេដ្ឋារចនា សម្ព័ន្ធដឹកជញ្ជូនទាំងផ្លូវគោក ផ្លូវទឹក ផ្លូវដែក ស្ពាន និងកំពង់ផែឥតឈប់ឈរឡើយ។
ឯកឧត្តមទេសរដ្ឋមន្ត្រីបានអំពាវនាវដល់បងប្អូនប្រជាពលរដ្ឋ និងក្រុមហ៊ុនដឹកជញ្ជូន ដែលមិនទាន់បាន យកយានយន្តរបស់ខ្លួនទៅត្រួតពិនិត្យលក្ខណៈបច្ចេកទេសសូមយកយានយន្តរបស់ខ្លួន ទៅត្រួតពិនិត្យលក្ខណៈបច្ចេកទេសតាមច្បាប់កំណត់មុននឹងធ្វើចរាចរណ៍ដើម្បីចូលរួមចំណែកក្នុងការ កាត់បន្ថយគ្រោះថ្នាក់ចរាចរណ៍ មិនត្រូវដឹកជញ្ជូនទំនិញលើសទម្ងន់កម្រិតកំណត់ និងបានសំណូមពរឱ្យ អ្នកប្រើប្រាស់ផ្លូវថ្នល់ទាំងអស់គោរពច្បាប់ចរាចរណ៍ឱ្យបានខ្ជាប់ខ្ជួន មិនត្រូវបើកបរលើសល្បឿនកំណត់ មិនត្រូវប្រើ គ្រឿងស្រវឹង និងទូរស័ព្ទពេលកំពុងបើកបរ ដើម្បីកាត់បន្ថយគ្រោះថ្នាក់ចរាចរណ៍នៅតាមដងផ្លូវ។
ជាចុងក្រោយ ឯកឧត្តមទេសរដ្ឋមន្ត្រីក៏បានសំណូមពរឱ្យក្រុមហ៊ុនCMVICខិតខំប្រឹងប្រែងផ្តល់សេវាឱ្យ បានល្អជូនបងប្អូនប្រជាពលរដ្ឋប្រកបដោយតម្លាភាព ប្រសិទ្ធភាព ស្មើភាព និងខិតខំស្វែងរកបង្កើត មណ្ឌលឆៀកបន្ថែមទៀតនៅតាមខេត្ត ដើម្បីបង្វិតសេវានេះទៅកៀកនឹងប្រជាពលរដ្ឋ និងបានជំរុញឱ្យ មន្ត្រីក្រសួងសហការឱ្យបានជិតស្និទ្ធជាមួយដៃគូផ្នែកឯកជន ដើម្បីពង្រឹងនិងពង្រីកសេវាសាធារណៈនេះ ឱ្យបានល្អជូនប្រជាពលរដ្ឋ តាមអនុសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រី៕
