កាលថ្ងៃទី៣០ ខែកញ្ញា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឲ្យដឹងម្តងហើយថា កម្ពុជាបានសម្រេចឲ្យប្រជាពលរដ្ឋធ្វើបណ្ណបើកបរកម្រិតអន្តរជាតិ ដែលប្រជាពលរដ្ឋមានបណ្ណបើកបរប្រភេទនេះ អាចប្រើប្រាស់៩៩ប្រទេសនៅលើពិភពលោក។ កាលពីយប់មិញ ថ្ងៃទី៦ ខែតុលានេះផងដែរ ក្រសួងសាធារណការ និងដឹកជញ្ជូនបានចេញបញ្ជាក់ពីរឿងសំខាន់ៗដែលពលរដ្ឋត្រូវដឹង និងត្រៀម បើចង់ធ្វើបណ្ណបើកបរអន្តរជាតិ (៩៩ប្រទេស)នេះ។ ចំណុចសំខាន់ៗទាំងនោះរួមមានដូចជា៖ ទី១ ទាក់ទង់រឿងទ្រង់ទ្រាយបណ្ណអនុញ្ញាតបើកបរអន្តរជាតិ ដែលចេញដោយព្រះរាជាណាចក្រកម្ពុជានេះ មានរាងដូចជាកូនសៀវភៅដែលមានទំហំ ១៤៨x១០៥មីលីម៉ែត្រ មានសុភាពរយៈពេល ១ឆ្នាំ។ក្រសួងបន្ថែមថា បណ្ណអនុញ្ញាតបើកបរអន្តរជាតិ (International Driving Permit) ដែលចេញដោយព្រះរាជាណាចក្រកម្ពុជា អាចយកទៅប្រើប្រាស់ និងមានការទទួលស្គាល់នៅក្នុងបណ្តាប្រទេសហត្ថលេខីនៃអនុញ្ញាស្តីពីចរាចរណ៍ផ្លូវគោក (៩៩ប្រទេស) ទីក្រុងសឺណែវ ថ្ងៃទី១៩ ខែកញ្ញា ឆ្នាំ១៩៤៩ ។ ទី២ ចំពោះកម្រៃសេវាមានចំនួន ២៥០,០០០៛ ទី៣ ទាក់ទង់ទីតាំងផ្តល់សេវា គឺនៅអគ្គនាយកដ្ឋានដឹកជញ្ជូនផ្លូវគោក និងមណ្ឌលផ្តល់សេវាសាធារណៈ (ផ្សារទំនើប ជីប ម៉ុង ណូរូ ម៉ន ជាន់ទី៣) ទី៤ បងប្អូនត្រូវភ្ជាប់ឯកសារសំខាន់ចំនួន ៤ ផងដែររួមមាន៖ ១.ឯកសារចម្លងបណ្ណបើកបរជាតិ ដែលចេញដោយព្រះរាជាណាចក្រកម្ពុជា ២.ឯកសារចម្លងអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន(ចំពោះជនបរទេស) ៣.រូបថត៤x៦ ផ្ទៃពណ៌ស (៣សន្លឹក) ៤.ឯកសារចម្លងកិច្ចសន្យាជួលផ្ទះដែលទទួលស្គាល់ដោយអាជ្ញាធរមានសមត្ថកិច្ច និងលិខិតបញ្ជាក់អសយដ្ឋានបច្ចុប្បន្នចេញដោយមេឃុំ ឬចៅសង្កាត់៕