[Angrut] - ស៊ុន ចាន់ថុល ៖ ក្រសួងពីមុន ធ្វើផ្លូវស្ដើង ដោយសារថវិកាមិនគ្រប់គ្រាន់
2018-01-30
Go to the website published Angrut
ភ្នំពេញ ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសារធារណការ និងដឹកជញ្ជូន បានអោយអ្នកសារព័ត៌មានដឹងថា កាលពីមុនក្រសួងធ្វើផ្លូវស្ដើង ដោយសារអត់ទាន់មានថវិកាគ្រប់គ្រាន់ សម្រាប់ធ្វើផ្លូវឲ្យបានក្រាស តែសព្វថ្ងៃក្រសួងមានថវិកាគ្រប់គ្រាន់ សម្រាប់ធ្វើផ្លូវដែលមានកម្រាសក្រាស និងមានគុណភាពល្អជាងមុន ។
លោក ស៊ុន ចាន់ថុល ថ្លែងបែបនេះ នៅក្រោយពីពិធីចុះ MOU ជាមួយក្រុមហ៊ុន Beijing Urban Construction Group Co., Ltd លើកិច្ចសន្យាសាងសង់ប្រព័ន្ធបណ្ដាញលូ នៅក្រុងបាត់ដំបង នៃគម្រោងអភិវឌ្ឍន៍សេដ្ឋកិច្ចក្រុង ក្រោមឥណទានសម្បទានធនាគារអភិវឌ្ឍន៍អាស៊ី នៅព្រឹកថ្ងៃទី៣០ មករា ២០១៧ នេះ ។
នៅក្នុងឱកាសនោះដែរ លោកទេសរដ្ឋមន្ត្រី ស៊ុន ចាន់ថុល បានបញ្ជាក់ថា «មានការការលើកឡើងរបស់បងប្អូនប្រជាពលរដ្ឋអំពីផ្លូវ ប៉ុន្តែទាល់តែយើងយល់ដែលថា ប្រភេទផ្លូវពីមុនជាផ្លូវរបៀបម៉េច ? ដោយសារតែយើងអត់ទាន់មានថវិកា ហើយពេលនោះយើងចាក់កៅស៊ូស្ដើងទេ តែពីរស្រទាប់ ដោយសារយើងចង់កែ យើងចង់តភ្ជាប់ធ្វើសមារណកម្ម ភ្នំពេញនិងទីរួមខេត្ត ទីរួមខេត្តនិងទីរួមខេត្ត ធ្វើបានលឿនពីផ្លូវដីទៅផ្លូវកៅស៊ូ ដូច្នេះយើងធ្វើផ្លូវកៅស៊ូ ពីរស្រទាប់ស្ដើង ដោយសារថវិកាអត់ទាន់មានគ្រប់គ្រាន់» ។
លោកថ្លែងពាក់ព័ន្ធផ្លូវនេះដែរថា ផ្លូវដែលក្រសួងបានធ្វើសព្វថ្ងៃ ភាគច្រើនជាផ្លូវចាក់កៅស៊ូបេតុង អេស៊ី និងអាស្វាខនគ្រីដ មានកម្រាសកន្លះតឹក ទៅមួយតឹក (១០សង់ទីម៉ែត្រ ឬ១តឹក) មិនមែនធ្វើផ្លូវស្ដើង ដូចដែលក្រសួងបានធ្វើកន្លងមកនោះទេ ។ ការធ្វើផ្លូវដែលមានកម្រាស់ក្រាសបែបនេះ គឺដោយសារតែមានថវិកាគ្រប់គ្រាន់ សម្រាប់ធ្វើផ្លូវ ៕
