លោករដ្ឋមន្រ្តីស៊ុន ចាន់ថុល ក្នុងនាមជារដ្ឋមន្រ្តីក្រសួងសាធារណការនិងដឹកជញ្ជូន បានលើកយកគោលការណ៍បង្ខិតសេវាកម្មកៀកប្រជាពលរដ្ឋតាមរយៈការប្រើប្រាស់ប្រព័ន្ធបច្ចេកវិទ្យាព័ត៌មានវិទ្យា ពោលគឺធ្វើឱ្យបានលឿន ធ្វើឱ្យមានប្រសិទ្ធភាព និងតម្លាភាព ដើម្បីលើកកម្ពស់គុណភាពការងារ។ កាន់ការងារជារដ្ឋមន្រ្តីសាធារណការប៉ុន្មានឆ្នាំនេះ លោកបានសម្រេចការងារលេចធ្លោជាច្រើនមានដូចជា៖ បង្កើត QR Code លើយានយន្ត កាលពីខែកក្កដា ឆ្នាំ ២០១៧ លោកបានប្រកាសដាក់ឲ្យប្រើប្រាស់ផ្លាកលេខរថយន្តថ្មី ដែលមានអ៊ុតភ្ជាប់ QR Code។ ផ្លាកលេខទំនើបនេះ មានតែប្រទេសកម្ពុជាបង្កើតឡើងដំបូងគេ។ ផ្លាកលេខថ្មីនេះ មានបញ្ចូលតែព័ត៌មានពាក់ព័ន្ធតែជាមួយយានយន្តប៉ុណ្ណោះ ដូចជា ប្រភេទរថយន្ត ប្រភេទម៉ាស៊ីន លេខសម្គាល់យានយន្ត ឆ្នាំផលិតជាដើម។ បើតាមឯកឧត្តមទេសរដ្ឋមន្រ្តី ស៊ុន ចាន់ថុល ការដាក់ឲ្យប្រើប្រាស់ផ្លាកលេខមាន QR Code នេះ គោលបំណងគឺដើម្បីបង្ការអ្នកបោកប្រាស់ ដោយធ្វើផ្លាកលេខក្លែងក្លាយ ហើយសម្រួលអ្នកទិញតពីគ្នាឲ្យដឹងព័ត៌មានច្បាស់ ចៀសវាងការបន្លំ។ បង្កើត App (Cambodia Driving Rules) នៅដើមឆ្នាំ ២០១៧ លោកក៏បានដាក់ឲ្យដំណើរការកម្មវិធី Cambodia Driving Rules ដែលអាចឲ្យពលរដ្ឋរៀនទ្រឹស្តីពីការបើកបរតាមទូរសព្ទដៃសម្រាប់អ្នកពុំសូវមានពេលវេលា ទៅរៀននៅសាលា ដូចជាច្បាប់ចរាចរណ៍ផ្លូវគោក ផ្លាកសញ្ញាចរាចរណ៍ សិទ្ធិអាទិភាព បច្ចេកទេសយានយន្ត និងចំណេះដឹងផ្សេងៗ។ កម្មវិធី Cambodia Driving Rules អាចធ្វើតេស្តប្រឡងសាកល្បង ដើម្បីពង្រឹងសមត្ថភាព មុនដាក់ពាក្យប្រឡងយកប័ណ្ណបើកបរជាផ្លូវការ។ ដំណើរការប្រព័ន្ធស្វ័យប្រវត្តិកម្ម ចុះបញ្ជីយានយន្តតាមប្រព័ន្ធអនឡាញ ឆ្នាំ២០១៧ លោករដ្ឋមន្រ្តីបានរៀបចំប្រព័ន្ធស្វ័យប្រវត្តិកម្ម ដើម្បីសម្រួលដល់ការចុះបញ្ជីយានជំនិះ ត្រួតពិនិត្យលក្ខណ:បច្ចេកទេសយានជំនិះ ចុះឈ្មោះប្រឡងបណ្ណបើកបរ និងផ្តល់បណ្ណបើកបរតាមរយ: ការធ្វើទំនើបកម្មប្រព័ន្ធចុះបញ្ជី។ ប្រព័ន្ធនេះ នឹងកាត់បន្ថយចំណាយក្រៅផ្លូវការ ផ្តល់សេវាងាយស្រួល និងឆាប់រហ័ស ចំណេញវេលា អាចធ្វើបានពីគ្រប់ពេលវេលា គ្រប់ទីកន្លែង។ បង្កើតកម្មវិធីថែទាំផ្លូវ (ROAD CARE Mobile App) ខែធ្នូ ឆ្នាំ២០១៨ “កម្មវិធីថែទាំផ្លូវ (ROAD CARE mobile app)” បានដាក់ឲ្យដំណើរការជាផ្លូវការ។ កម្មវិធីនេះ អាចទាញយកដោយឥតគិតថ្លៃ នៅលើ App Store និង Play Store ក្នុងទូរសព្ទដៃ។ កម្មវិធីថែទាំផ្លូវ (ROAD CARE mobile app) អាចឲ្យពលរដ្ឋរាយការដោយផ្ទាល់ពីស្ថានភាពផ្លូវ ជង្ហុក សំបុកមាន់ ឬផ្លូវខូចទៅកាន់អាជ្ញាធរពាក់ព័ន្ធ ដើម្បីធ្វើការជួសជុលបានទាន់ពេលវេលា។ កម្មវិធីនេះបង្កើតឡើងក្នុងគោលបំណងដើម្បីពង្រឹងគុណភាពផ្លូវ ដែលទាមទារឲ្យមានការជួសជុល និងថែទាំទូទាំងប្រទេស តាមរយៈការរាយការពីស្ថានភាពជង្ហុក សំបុកមាន់ និងផ្លូវខូចដោយអ្នកប្រើប្រាស់។ បង្កើតលេខយានយន្តពិសេស ដើមឆ្នាំ ២០១៩ លោករដ្ឋមន្រ្តីក៏បានដាក់ឲ្យដំណើរការជាផ្លូវការ ការលក់លេខចុះបញ្ជីពិសេសផ្ទាល់ខ្លួន សម្រាប់រថយន្ដ។ គោលបំណង នៃការដាក់ឲ្យដំណើរការ ការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ដ គឺដើម្បីផ្តល់ជម្រើសដល់ប្រជាពលរដ្ឋ ដែលមានលទ្ធភាពអាចជ្រើសរើសផ្លាកលេខ ដែលមានលក្ខណៈពិសេស អាចកម្ម៉ង់តាមការពេញចិត្ត ព្រមទាំងជួយសម្រួលដល់នីតិវិធី នៃការប្រមូលពន្ធថែមទៀតផង។ លក្ខណៈសម្បត្តិ របស់ផ្លាកលេខពិសេសផ្ទាល់ខ្លួន គឺមានអក្សរ “កម្ពុជា” នៅផ្នែកខាងលើ និង ការរួមបញ្ចូលគ្នានៃលេខឡាតាំង ឬអក្សរ ចាប់ពី១ ដល់៨ខ្ទង់ នៅផ្នែកកណ្តាល ព្រមទាំងមាន QR Code នៅផ្នែកខាងស្តាំនៃផ្លាកលេខ ហើយផ្លាកលេខពិសេសនេះ ក៏អាចរក្សាទុកបាន នៅពេលដែលមានការ ផ្ទេរកម្មសិទ្ធិរថយន្តផងដែរ។ ប័ណ្ណបើកបរអន្តរជាតិ និងសម្រាប់ជនពិការ ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងទិសដៅការងារឆមាសទី២ ឆ្នាំ២០២០ នៅទីស្ដីការក្រសួងមហាផ្ទៃ ឯកឧត្តមទេសរដ្ឋមន្រ្ដី ស៊ុន ចាន់ថុល បានគូសបញ្ជាក់ថា ក្រសួងនឹងចេញបណ្ណបើកបរអន្តរជាតិសម្រាប់ពលរដ្ឋកម្ពុជា អាចបើកបរឡាននៅក្រៅប្រទេស។ បណ្ណបើកបរអន្តរជាតិនឹងមានទៅតាមប្រភេទនីមួយៗ ដូចជាប្រភេទ A B C ដោយមានការបោះត្រាតាមប្រភេទទៅតាមការស្នើសុំរបស់សាមុីខ្លួន។ លោកទេសរដ្ឋមន្ត្រី ក៏រៀបចំការផ្តល់បណ្ណបើកបរជូនទៅជនពិការគថ្លង់ផង​ដែរ។ ទន្ទឹមគ្នានោះ សម្រាប់អ្នកបើកបរមិនចេះអានអក្សរ ក្រសួងក៏បានបង្កើតកម្មវិធីសំណួរ ចម្លើយជាសំឡេងគឺនៅពេលចូលទៅប្រឡងទ្រឹស្តីបេក្ខជនអាចស្តាប់សំឡេង ហើយជ្រើសរើសចម្លើយដែលត្រឹមត្រូវបាន៕ អត្ថបទ៖ ដីក្រហម