ខេត្តឧត្ដរមានជ័យ៖ ថ្ងៃពុធ ១៥កើត ខែភទ្របទ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី០២ ខែកញ្ញា ឆ្នាំ២០២០ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង អញ្ជើញចុះជួបសំណេះសំណាលសួរសុខទុក្ខវីរយុទ្ធជនកងទ័ពការពារ ព្រំដែនគោកលេខ៤០៣ ឋិតនៅតំបន់អន្លង់វែង និងកងទ័ពការពារព្រំដែនគោកលេខ៤០២ ឋិតនៅតំបន់អូរស្មាច់ ចំណុះយោធភូមិភាគទី៤ ខេត្តឧត្តរមានជ័យ ក្នុងឱកាសអបអរសាទរពិធីបុណ្យភ្ជុំបិណ្ឌប្រពៃណីជាតិខ្មែរ ឆ្នាំជូត ទោស័ក ពុទ្ធសករាជ ២៥៦៤ គ្រឹស្តសករាជ ២០២០។ កម្មវិធីនេះមានការអញ្ជើញចូលរួមពីឯកឧត្តម ឌី រ៉ាដូ អភិបាលរង តំណាងដ៏ខ្ពង់ខ្ពស់ឯកឧត្ដមអភិបាល នៃគណៈអភិបាលខេត្តឧត្តរមានជ័យ ឯកឧត្ដមឧត្ដមសេនីទោ សូរ្យ ណារ៉ា មេបញ្ជាការរងយោធភូមិភាគទី៤ ប្រធានគណៈបញ្ជាការសមរភូមិទិសទី២ លោកវរសេនីយ៍ឯក ជឹម សំអោ មេបញ្ជាការកងការពារព្រំដែនគោកលេខ៤០៣ (អន្លង់វែង) ព្រមទាំងមេបញ្ជាការរង នាយទាហាន នាយទាហានរង និងពលទាហានប្រមាណ៨០០នាក់។ ថ្លែងក្នុងកម្មវិធីនោះ ឯកឧត្ដមទេសរដ្ឋមន្ត្រីបានគូសបញ្ជាក់ថា ការជួបជុំនៅថ្ងៃនេះអាចប្រព្រឹត្តទៅបាន ដោយសារស្រុកយើងមានសុខសន្តិភាព និងស្ថិរភាពនយោបាយពេញលេញ ដូចនេះយើងទាំងអស់គ្នាសូមអរគុណសន្ដិភាព អរគុណនយោបាយឈ្នះៗ និងអរគុណសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានបូជាសាច់ស្រស់ឈាមស្រស់ ដើម្បីនាំយកសុខសន្តិភាពជូនប្រជាជាតិខ្មែរទាំងមូល ព្រមទាំងបាននាំមកនូវការរស់រានមានជីវិត ការអភិវឌ្ឍ និងការរីកចម្រើនលើគ្រប់វិស័យឥតឈប់ឈររហូតមកដល់ពេលនេះ។ ឆ្លៀតក្នុងឱកាសនោះផងដែរ ឯកឧត្ដមទេសរដ្ឋមន្រ្តីបានជម្រាបជូនអង្គពិធីថា៖ ទោះបីមានមេរោគកូវីដ-១៩ ក្រសួងក៏ដូចជារាជរដ្ឋាភិបាលនៅតែបន្តការកសាង និងអភិវឌ្ឍរបស់ខ្លួន ហើយដៃគូអភិវឌ្ឍន៍នៅតែបន្តផ្ដល់ជំនួយដល់រាជរដ្ឋាភិបាលលើគម្រោងពង្រឹង ពង្រីក និងលើកកម្ពស់គុណភាពផ្លូវជាតិសំខាន់ៗ ការសាងសង់ផ្លូវល្បឿនលឿនភ្នំពេញ-កំពង់សោម ការស្ដារផ្លូវដែកទាំងពីរខ្សែ និងការចុះហត្ថលេខាលើអនុស្សរណៈយោគយល់ជាមួយប្រទេសថៃទាក់ទងនឹងការដឹកជញ្ជូនតាមផ្លូវរថភ្លើងឆ្លងកាត់ព្រំដែន ការពង្រីកកំពង់ផែកុងតឺន័រក្រុងភ្នំពេញ និងក្រុងព្រះសីហនុ ការដាក់ឱ្យដំណើរការនាវាដឹកអ្នកដំណើរ ការរៀបចំផែនការមេភស្ដុភារកម្ម ផែនការមេគ្រប់គ្រងទឹកកខ្វក់នៅខេត្តព្រះសីហនុ និងខេត្តផ្សេងៗទៀត និងយន្តការទប់ស្កាត់ និងលុបបំបាត់រថយន្តកែច្នៃខុសលក្ខណៈបច្ចេកទេស និងរថយន្តដឹកជញ្ជូនលើសទម្ងន់កម្រិតកំណត់ជាដើម។ ឯកឧត្ដមទេសរដ្ឋមន្ត្រីក៏បានគូសបញ្ជាក់ផងដែរអំពីគម្រោងធំៗមួយចំនួន ដែលបានសិក្សារួច និងគម្រោង ដែលបានចុះហត្ថលេខាលើកិច្ចព្រមព្រៀងក្របខណ្ឌដូចជា៖ គម្រោងផ្លូវល្បឿនលឿនភ្នំពេញ-បាវិត កិច្ចសហការជាមួយភាគីវៀតណាមសិក្សាលទ្ធភាពសាងសង់ផ្លូវដែកពីភ្នំពេញ-ហូជីមិញ កិច្ចសហការជាមួយក្រុមហ៊ុនឯកជនសិក្សាលទ្ធភាពសាងសង់ផ្លូវដែកទំនើបម៉ូណូរ៉េល ផ្លូវដែកក្រោមដីក្នុងទីក្រុងភ្នំពេញ គម្រោងសាងសង់ស្ពានឆ្លងទន្លេមេគង្គ គម្រោងសាងសង់អាកាសយានដ្ឋានអន្តរជាតិ និងគម្រោងផ្សេងៗជាច្រើនទៀត ។ ទាក់ទងនឹងការដឹកជញ្ជូន ឯកឧត្ដមទេសរដ្ឋមន្ត្រីបានឱ្យដឹងថា៖ ក្រសួងបានដាក់ឱ្យដំណើរការប្រព័ន្ធស្វ័យប្រវត្តិកម្មចុះបញ្ជីយានជំនិះ ប្រព័ន្ធស្វ័យប្រវត្តិកម្មលក់លេខពិសេសផ្ទាល់ខ្លួន ការបើកដំណើរការមណ្ឌលប្ដូរ និងពន្យារបណ្ណបើកបរនៅផ្សារទំនើបអ៊ីអនម៉ល១ អ៊ីអនម៉ល២ និងផ្សារទំនើបជីបម៉ុង ការបង្កើតទីតាំងត្រួតពិនិត្យលក្ខណៈបច្ចេកទេសយានយន្តឱ្យបានច្រើនកន្លែង រថយន្តឆៀកចល័ត ការប្រើប្រាស់កម្មវិធីថែទាំផ្លូវ (ROAD CARE Mobile App) និងកម្មវិធីព័ត៌មានវិទ្យាជាច្រើនទៀត ដើម្បីផ្ដល់សេវាសាធារណៈជូនប្រជាពលរដ្ឋឱ្យបានលឿន ប្រកបដោយប្រសិទ្ធភាព និងតម្លាភាព។ ឯកឧត្ដមទេសរដ្ឋមន្ត្រី បានសម្ដែងនូវការគោរព កោតសរសើរ និងថ្លែងអំណរគុណយ៉ាងជ្រាលជ្រៅដល់វីរយុទ្ធជនទាំងអស់ ដែលបានលះបង់សាច់ស្រស់ឈាមស្រស់ក្នុងបុព្វហេតុការពារបូរណភាពទឹកដី ការពាររដ្ឋធម្មនុញ្ញ ការពារប្រមុខរាជរដ្ឋាភិបាលស្របច្បាប់ដែលកើតចេញពីការបោះឆ្នោតរបស់ប្រជាពលរដ្ឋ និងធានាបាននូវសុខសន្តិភាពពេញលេញជូនរាជរដ្ឋាភិបាលក្នុងការអនុវត្តផែនការអភិវឌ្ឍរបស់ខ្លួនតាមការគ្រោងទុក ព្រមទាំងបានណែនាំឱ្យវីរយុទ្ធជនទាំងអស់អនុវត្តតាមវិធានការការពាររបស់ក្រសួងសុខាភិបាលឱ្យបានខ្ជាប់ខ្ជួន ដើម្បីជៀសឱ្យផុតពីការឆ្លងជំងឺកូវីដ-១៩។ ជាមួយគ្នានោះផងដែរ ឯកឧត្ដមទេសរដ្ឋមន្ត្រីបាននាំយកសម្ភារបរិក្ខារចាំបាច់មួយចំនួនរួមមាន៖ កុំព្យូទ័រ ម៉ាស៊ីនព្រីន វិទ្យុទាក់ទង សម្ភារសំណង់តាមការស្នើសុំរបស់អង្គភាពនីមួយៗ និងថវិកាមួយចំនួនចែកជូនដល់បងប្អូនជានាយទាហាន នាយទាហានរង ពលទាហាន និងអង្គភាព ព្រមទាំងបានបួងសួងដល់បារមីវត្ថុស័ក្ដិសិទ្ធិ ដែលគង់ប្រថាប់នៅលើទឹកដីអង្គរនៃយើងតាមជួយបីបាច់ថែរក្សាបងប្អូនកងទ័ពរបស់យើងឱ្យ ជួបតែសេចក្តីសុខចម្រើន ដើម្បីចូលរួមអនុវត្តគោលនយោបាយរបស់រាជរដ្ឋាភិបាលឱ្យកាន់តែមានការ អភិវឌ្ឍថែមទៀត៕