ភ្នំពេញ ៖ ​មន្ទីរសាធារណការ និងដឹកជញ្ជូនរាជធានីភ្នំពេញ ​បានបញ្ជាក់ថា ​នៅថ្ងៃទី​០១ ខែកញ្ញា ការដ្ឋានខួងដាក់បណ្តាញដាក់លូក្រោមដីជំរៅ ៨ម៉ែត្រ ទំហំ ០.៨ម៉ែត្រ ប្រវែង ១៥៥២ ម៉ែត្រ ចាប់​ពី​មុខស្តាតចាស់ នៃផ្លូវលេខ៧០ ឆ្លងក្រោមសួនច្បារកួចកាណុង–ផ្លូវលេខ៤៧–ផ្លូវលេខ៨០–តិរិវិថីព្រះស៊ីសុវត្ថិ ​និង​បញ្ចប់ត្រង់អាងក្រោមដីសួនច្បារខាងមុខក្រុមប្រឹក្សាអភិវឌ្ឍន៍កម្ពុជា បាន​បញ្ចប់ហើយ។ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានី ​បានបន្ថែមទៀតថា ក្នុង១ថ្ងៃ ក្រុម​ជំនាញ​អាចខួងបញ្ចូលលូបានប្រវែង ​១០ម៉ែត្រ​។ ដូច្នេះរំពឹងថា ក្រោយ​ប្រព័ន្ធលូថ្មីទាំងនេះ​ ដំណើរ ​ការ​រំដោះទឹកនៅតំបន់ខាងលើ នឹងកាន់តែល្អប្រសើរថែមទៀត។