ភ្នំពេញ ៖ នៅព្រឹកថ្ងៃទី២៩ ខែកក្កដា ឆ្នាំ២០២០នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានអនុគណៈកម្មការទី២ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) បានអញ្ជើញចូលរួមក្នុងពិធីប្រគល់-ទទួល រនាំងសម្រាប់គោលដៅត្រួតពិនិត្យរឹតបន្តឹងអនុវត្តន៍ច្បាប់ស្តីពីចរាចរណ៍ផ្លូវគោក ចំនួន៣០០ផ្ទាំង ពីក្រសួងសាធារណការ និងដឹកជញ្ជូន។ ពិធីប្រគល់ធ្វើឡើងក្រោមអធិបតីភាព ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្រ្តៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក និងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានអនុគណៈកម្មការទី២ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក នៅទីស្តីការក្រសួងសាធារណការនិងដឹកជញ្ជូន។ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក្នុងពីធីទទួលបានមានប្រសាសន៍ថា ក្រោមការបញ្ជាដឹកនាំដោយផ្ទាល់ និងការទទួលខុសត្រូវខ្ពស់របស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក និងដោយមានការដឹកនាំពី ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្រ្តៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក បានដឹកនាំ និងសហការចុះត្រួតពិនិត្យ និងលើកទឹកចិត្តដោយផ្ទាល់ផងនោះ ទើបធ្វើឲ្យយុទ្ធនាការរឹតបន្តឹងច្បាប់ចរាចរណ៍ទទួលបានជោគជ័យដូចពេលនេះ។ ឯកឧត្តម បន្តថានេះជាមោទនភាពមួយ នៃយុទ្ធនាការរឹតបន្តឹងច្បាប់ចរាចរណ៍ផ្លូវគោក សម្រាប់៦ខែ ដើមឆ្នាំ២០២០ ដែលយើងអាចមើលឃើញពីចំនុចវិជ្ជមាន គឺតថភាពជាក់ស្តែងដែលសង្គមទាំងមូលទទួលស្គាល់ ដែលយើងបានមើលឃើញច្បាស់​ទាំងអស់គ្នាមិនអាចប្រកែកបាន។ ក្នុងនោះទី១ចំនួនបទល្មើសមានការថយចុះ ទី២ចំនួនអ្នកស្លាប់ និងអ្នករបួសមានការថយចុះ និងទី៣ដែលជាចំនុចសំខាន់បំផុត គឺយើងបានប្តូរឥរិយាបថអ្នកធ្វើដំណើរតាមដងផ្លូវ។ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានបន្ថែមឲ្យដឹងថា ជាការឆ្លើយតបទៅនឹងអំណោយជាស្លាកសញ្ញាទាំងនេះ ក្នុងនាមអគ្គស្នងការនគរបាលជាតិនឹងចាត់ទុកថាជាគំរូដ៏ល្អមួយហើយនិងធ្វើការតបស្នងវិញ​ដោយពង្រឹងកិច្ចការរបស់នគរបាលចរាចរណ៍ និងប្តេជ្ញាចិត្តសហការក្រោមការដឹកនាំរបស់ ឯកឧត្តម ទេសរដ្ឋមន្ត្រី ដើម្បីជំរុញរឹតបន្តឹងច្បាប់ចរាចរណ៍ផ្លូវគោកឲ្យបានកាន់តែល្អប្រសើរ។ ឯកឧត្តមអគ្គស្នងការនគរបាលជាតិ ជាចុងក្រោយក្រៅពីការថ្លែងអំណរគុណក៏បានសំណូមពរឲ្យខាងក្រសួងសាធារណការ ជំរុញឲ្យមានការបង្រៀនពីច្បាប់ចរាចរណ៍ ការរំលឹកពីច្បាប់ចរាចរណ៍ដើម្បីឲ្យក្លាយទៅជាទម្លាប់ របស់ស្ថាប័ន របស់សហគមន៍ រហូតទៅដល់ក្នុងគ្រួសារនីមួយៗ។ ឯកឧត្តម បន្តថា ការផ្សព្វផ្សាយច្បាប់ការគោរពច្បាប់ ការយល់ពីការធ្វើចរាចរណ៍ ការយោគយល់គ្នា មិនមែនតួនាទីរបស់គណៈកម្មាធិការសុវត្ថិភាពចរាចរណ៍ផ្លូវគោកតែម្នាក់ឯងអាចផ្សព្វផ្សាយបានទេ ទាល់តែស្ថាប័ន សហគមន៍ និងគ្រួសារនីមួយៗចូលរួមអនុវត្តន៍ទាំងអស់គ្នាទើបអាចទទួលបានជោគជ័យ។ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា ការអនុវត្តច្បាប់ចរាចរណ៍ផ្លូវគោកទាមទារការចូលរួមពីគ្រប់ភាគីពាក់ព័ន្ធ និងប្រជាពលរដ្ឋផងដែរ។ ឯកឧត្តម បានឲ្យដឹងថា ក្រសួងសាធារណការ និងដឹកជញ្ជូន បាននិងកំពុងសហការជាមួយដៃគូពាក់ព័ន្ធក្នុងការបង្កើនការផ្សព្វផ្សាយ និងអប់រំប្រជាពលរដ្ឋពីការអនុវត្តច្បាប់ចរាចរណ៍ដែលបញ្ចៀសបាននូវគ្រោះថ្នាក់ ក៏ដូចជារៀបចំតម្លើងស្លាកសញ្ញាចរាចរណ៍ថ្មីៗ ដើម្បីចូលរួមបង្កើនសុវត្ថិភាពការធ្វើដំណើររបស់ប្រជាពលរដ្ឋ។ ឯកឧត្តម បន្ថែមថា តាមការសិក្សារបស់ធនាគារ ADB បានឲ្យដឹងថា ក្នុងមួយឆ្នាំៗប្រទេសកម្ពុជាខាតបង់ទឹកប្រាក់ប្រមាណជាង៣៥០លានដុល្លារអាមេរិក ការបាត់បង់ថវិកាជាតិដោយគ្រោះថ្នាក់ចរាចរណ៍នេះ ដែលធ្វើឲ្យខូចខាតទ្រព្យសម្បត្តិជាតិ ទ្រព្យសម្បតិឯកជន បាត់បង់ការងារ និងបន្សល់ទុកនៅក្មេងកំព្រា ស្ត្រីមេម៉ាយ និងប៉ះពាល់ដល់គោលនយោបាយ សម្តេចតេជោនាយករដ្ឋមន្ត្រី ក្នុងការកាត់បន្ថយភាពក្រីក្រផងដែរ។ ក្នុងនោះផងដែរ ឯកឧត្តម ទេសរដ្ឋមន្ត្រី ក៏បានកោតសរសើរនិងថ្លែងអំណរគុណដល់កងកម្លាំងសមត្ថកិច្ច ដែលបានចូលរួមក្នុងការត្រួតពិនិត្យរថយន្តតទ្រុងខុសលក្ខណ​បច្ចេក​ទេសគ្រប់ខេត្តក្រុង ហើយនិងបន្តធ្វើការត្រួតពិនិត្យលើយានដ្ឋានមួយចំនួន ដែលមិនទាន់មានច្បាប់​អនុញ្ញាតហើយនៅតែបន្តធ្វើខុសច្បាប់ ដើម្បីធ្វើការបិទទីតាំងកែច្នៃទាំងអស់ជាស្ថាពរ។ ឯកឧត្តម ទេសរដ្ឋមន្ត្រី ក៏បានគាំទ្រចំពោះសំណើរបស់ ឯកឧត្តមអគ្គស្នងការនគរបាលជាតិ ក្នុងការជំរុញឲ្យមានការបង្រៀនពីច្បាប់ចរាចរណ៍ ការរំលឹកពីច្បាប់ចរាចរណ៍ ដើម្បីឲ្យក្លាយទៅជាទម្លាប់របស់ស្ថាប័ន របស់សហគមន៍ រហូតទៅដល់ក្នុងគ្រួសារនីមួយៗផងដែរ៕