[Rasmei Kampuchea Daily News] - រដ្ឋមន្ត្រីប្រាប់ក្រុមហ៊ុនសាងសង់ផ្លូវជាតិលេខ៧លេខ៣និងលេខ១ឱ្យមានគុណភាព
ភ្នំពេញ៖លោកស៊ុនចាន់ថុលទេសរដ្ឋមន្ត្រីរដ្ឋមន្ត្រីក្រសួងសាធារណការនិងដឹកជញ្ជូនកាលពីថ្ងៃទី២០ខែកក្កដាឆ្នាំ២០២០នៅទីស្តីការក្រសួងបានទទួលជួបពិភាក្សាការងារជាមួយលោកWangXinhua តំណាងក្រុមហ៊ុន Sichuan Road &Bridge(Group)CorporationLtdដែលជាក្រុមហ៊ុនធ្វើផ្លូវជាតិលេខ៧ ផ្លូវជាតិលេខ៣ និងផ្លូវជាតិលេខ១។ជំនួបពិភាក្សានេះធ្វើឡើងដើម្បីពិនិត្យមើលវឌ្ឍនភាពការងារសម្រេចបានក្នុងការសាងសង់ផ្លូវជាតិលេខ៧ផ្លូវជាតិលេខ៣និងផ្លូវជាតិលេខ១ដើម្បីធានាឱ្យសំណង់មានគុណភាពរឹងមាំដែលអាចប្រើប្រាស់ជាប់បានយូរអង្វែងក៏ដូចជាធានាឱ្យគម្រោងបញ្ចប់ទៅដោយរលូនស្របតាមកិច្ចព្រមព្រៀងឬសៀវភៅបន្ទុក។ទេសរដ្ឋមន្ត្រីបានណែនាំឱ្យក្រុមហ៊ុនពិនិត្យឱ្យបានហ្មត់ចត់លើការពង្រឹងនិងលើកកម្ពស់កម្រិតគុណភាពផ្លូវឱ្យបានរឹងមាំនិងបានស្នើឱ្យក្រុមហ៊ុនសហការជាមួយថ្នាក់ដឹកនាំក្រសួងទទួលបន្ទុកឱ្យបានជិតស្និទ្ធ។ធ្វើយ៉ាងណាអនុវត្តតាមបទដ្ឋានបច្ចេកទេសនិងសៀវភៅបន្ទុកឱ្យបានខ្ជាប់ខ្ជួន។ជាមួយគ្នានេះផងដែរលោកទេសរដ្ឋមន្ត្រីបានជំរុញឱ្យក្រុមហ៊ុនពិនិត្យលទ្ធភាពបន្ថែមគ្រឿងចក្រនិងកម្លាំងពលកម្មឱ្យបានច្រើនថែមទៀតដើម្បីធានាឱ្យការសាងសង់បញ្ចប់ទៅតាមកាលបរិច្ឆេទគ្រោងទុកប្រកបដោយគុណភាពរឹងមាំ។
ជាការឆ្លើយតប លោក Wang Xinhua បានប្តេជ្ញាអនុវត្ត និងទទួលយកការណែនាំដ៏ខ្ពង់ខ្ពស់ពីលោក ទេសរដ្ឋមន្ត្រីដើម្បីឱ្យគម្រោងសាងសង់ផ្លូវទាំងនេះមានគុណភាពរឹងមាំនិងប្រើប្រាស់ជាប់បានយូរអង្វែង ដោយសហការជាមួយថ្នាក់ដឹកនាំក្រសួងទទួលបន្ទុក ប្រកបដោយស្មារតីទទួលខុសត្រូវខ្ពស់៕
