[Kampuchea Thmey] - លោក ស៊ុន ចាន់ថុល ស្នើឱ្យផ្អាកបណ្ដោះអាសន្នខ្សែរថភ្លើងឆ្ពោះទៅកាន់ព្រលានយន្តហោះអន្តរជាតិភ្នំពេញ
2020-07-07
Go to the website published Kampuchea Thmey
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានស្នើឱ្យផ្អាកបណ្ដោះអាសន្នខ្សែរថភ្លើងពីរាជាយស្ម័យាន ឆ្ពោះទៅកាន់ព្រលានយន្តហោះអន្តរជាតិភ្នំពេញ ដោយសារផលប៉ះពាល់នៃកូវីដ-១៩ គ្មានអ្នកដំណើរ។ ការថ្លែងបែបនេះត្រូវបានធ្វើឡើងក្នុងឱកាស ប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងទិសដៅការងារឆមាសទី២ ឆ្នាំ២០២០ នាព្រឹកថ្ងៃអង្គារ ទី០៧ ខែកក្កដា ឆ្នាំ២០២០ នៅទីស្ដីការក្រសួងមហាផ្ទៃ។
កំណាត់ផ្លូវរថភ្លើងថ្មីនេះ មានប្រវែងសរុប ៩៦១៣ ម៉ែត្រ ត្រូវបានសម្ពោធដាក់ឲ្យដំណើរការជាបណ្តោះអាសន្ន កាលថ្ងៃទី ១០ ខែមេសា ឆ្នាំ២០១៨ ។ ការដាក់ឱ្យដំណើរការផ្លូវរថភ្លើងនៅពេលនេះ គឺដើម្បីផ្តល់ជម្រើសក្នុងការធ្វើដំណើរជូនប្រជាពលរដ្ឋ កាត់បន្ថយការចំណាយថវិកា ពេលវេលា សុវត្ថិភាព គ្មានការរំខាន ព្រមទាំងរួមចំណែកកាត់បន្ថយការកកស្ទះ និងគ្រោះថ្នាក់ចរាចរណ៍ក្នុងរាជធានីភ្នំពេញ៕
អត្ថបទ៖ជលសា
