[Raksmey News] - ៦៧ថ្ងៃ : គ្រោះថ្នាក់ចរាចរណ៍ស្លាប់ជាង២០០នាក់,ផាកពិន័យយានយន្តជាង ៩ម៉ឺនគ្រឿង
2020-07-06
Go to the website published Raksmey News
ដោយៈ មុនីរ័ត្ន/ភ្នំពេញៈ មនុស្សចំនួនជាង ១.០០០នាក់បានស្លាប់ និងរបួស នៅក្នុងគ្រោះថ្នាក់ចរាចរណ៍រយៈពេល ៦៧ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៦ ខែកក្កដា។ ចំណែកការរឹតបន្តឹងការអនុវត្តច្បាប់ចរាចរណ៍ផ្លូវគោករយៈពេល ៦៧ថ្ងៃ សមត្ថកិច្ចបានត្រួតពិនិត្យ និងផាកពិន័យយានយន្តជាង ៩១.០០០គ្រឿង។
អ្នកនាំពាក្យ នៃអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន បានថ្លែងប្រាប់រស្មីកម្ពុជាកាលពីរសៀលថ្ងៃទី៦ ខែកក្កដា ថា គ្រោះថ្នាក់ចរាចរណ៍រយៈ ៦៧ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៦ ខែកក្កដា កើតឡើង ៤៩៩លើក បណ្តាលឲ្យស្លាប់ចំនួន ២៦២នាក់ របួសចំនួន ៨១២នាក់ ក្នុងនោះរបួសធ្ងន់ ៤៧០នាក់ ។ដោយឡែកគ្រោះថ្នាក់ចរាចរណ៍នៅថ្ងៃទី៦ ខែកក្កដា កើតឡើងប្រាំពីរលើក បណ្តាលឲ្យស្លាប់បីនាក់ និងរបួសចំនួនប្រាំពីរនាក់ ក្នុងនោះរបួសធ្ងន់ចំនួន ៦នាក់។
លោកឧត្តមសេនីយ៍ឯក ឆាយ គឹមខឿន បានបន្តថា លទ្ធផលរឹតបន្តឹងការអនុវត្តច្បាប់ចរាចរណ៍ផ្លូវគោក តាមស្មារតីអនុក្រឹត្យលេខ៣៩ រយៈពេល ៦៧ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី៦ ខែកក្កដាយានយន្តដែលត្រូវបានត្រួតពិនិត្យ និងផាកពិន័យ សរុបចំនួន ៩១.៧៨៩គ្រឿង ក្នុងនោះម៉ូតូមានចំនួន ៦៧.៣៨៩គ្រឿង និងរថយន្តចំនួន ២៤.៤០០គ្រឿង (រថយន្តតូច ២១.០៧៤គ្រឿង និងរថយន្តធំ ៣.៣២៦គ្រឿង)។
លោកបន្តថា សម្រាប់ការអនុវត្តការរឹតបន្តឹងការច្បាប់ចរាចរណ៍ផ្លូវគោក ថ្ងៃទី៦ ខែកក្កដា សមត្ថកិច្ចត្រួតពិនិត្យ និងផាកពិន័យយានយន្តចំនួន ១.៣១៤គ្រឿង ក្នុងនោះម៉ូតូមានចំនួន ១.០៣៤គ្រឿង និងរថយន្តចំនួន ២៨០គ្រឿង (រថយន្តតូច ២៣៣គ្រឿង និងរថយន្តធំ ៤៧គ្រឿង)។ បទល្មើសភាគច្រើនសម្រាប់ម៉ូតូ គឺអត់ពាក់មួកសុវត្ថិភាព ល្មើសសញ្ញា បត់ជែង លើសចំណុះ ស្រវឹង អត់ស្លាកលេខ និងនិយាយទូរស័ព្ទពេលបើកបរ។ សម្រាប់រថយន្តភាគច្រើន គឺល្មើសល្បឿន ល្មើសសញ្ញា អត់ប័ណ្ណបើកបរ អត់ខ្សែក្រវាត់ លើសចំណុះ គ្មានស្លាកលេខ និងនិយាយទូរស័ព្ទពេលបើកបរ។
ទិន្នន័យជាផ្លូវការបានបង្ហាញថា ចំនួនគ្រោះថ្នាក់ចរាចរណ៍ផ្លូវគោកក្នុងរយៈពេល១ឆមាស (ពីថ្ងៃទី១ខែមករារហូតដល់ថ្ងៃទី៣០ខែមិថុនា)ឆ្នាំ២០២០នេះ បើប្រៀបធៀបឆមាសទី១ឆ្នាំ២០១៩ គឺចំនួនគ្រោះថ្នាក់ចរាចរណ៍មានការថយចុះ៥៥២លើកស្មើ២៥ភាគរយ(១៦១៩លើ២១៧១លើក)ចំនួនមនុស្សស្លាប់ថយចុះ១៧២នាក់ ស្មើនឹង១៧ភាគរយ (៨៦១លើ១០៣៣នាក់) ចំនួនអ្នករងរបួសថយចុះ៧៧៨នាក់ស្មើនឹង២៤ភាគរយ (២៤៤៩លើ៣២២៧នាក់) ។
ដូចគ្នានេះដែរបើប្រៀបធៀបគ្រោះថ្នាក់ចរាចរណ៍រយៈពេល២ខែនៃការរឹតបន្តឹងច្បាប់ចរាចរណ៍ផ្លូវគោកគឺខែឧសភា និងខែមិថុនាឆ្នាំ២០២០នឹងខែឧសភា និងខែមិថុនាឆ្នាំ២០១៩គឺគ្រោះថ្នាក់ចរាចរណ៍មានការថយចុះ២៣៣លើកស្មើនឹង៣៤ភាគរយ(៤៥៧លើ៦៩០លើក) ចំនួនមនុស្សស្លាប់មានការថយចុះ៧៩នាក់ស្មើនឹង២៥ភាគរយ(២៤១លើ៣២០នាក់) និងអ្នករងរបួសបានថយចុះ២៣៣នាក់ស្មើនឹង២៣ភាគរយ (៧៦៦លើ៩៩៩នាក់) ៕សរន
