កាលពីថ្ងៃអង្គារ ៤រោច ខែជេស្ឋ ឆ្នាំជូត ទោ ស័ក ព.ស.២៥៦៤ ត្រូវនឹងថ្ងៃទី០៩ ខែមិថុនា ឆ្នាំ២០២០ នៅការិយាល័យកណ្តាលធនាគារពិភពលោក (WB) ប្រចាំកម្ពុជា ឯកឧត្តម កឹម បូរី អនុរដ្ឋលេខាធិការ នៃក្រសួងសាធារណការ និងដឹកជញ្ជូន បានដឹកនាំអង្គភាពគ្រប់គ្រងសមាសភាពគម្រោង (Component Management Unit) របស់ក្រសួងសាធារណការ និងដឹកជញ្ជូន អញ្ជើញចូលរួមកិច្ចប្រជុំបូកសរុប នៃបេសកកម្មគាំទ្រដល់ការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (Implementation Support Mission) និងភាគីសមាសភាពគ្រប់គ្រងគម្រោងរបស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលដឹកនាំដោយឯកឧត្តម យា ប៊ុនណា អនុរដ្ឋលេខាធិការ និងភាគីធនាគារពិភពលោក។ កិច្ចប្រជុំនេះផ្ដោតជាសំខាន់លើស្ថានភាពនៃវឌ្ឍនភាពការងារ ដែលសម្រេចបាន -ការពិនិត្យ និងឯកភាពលើការកំណត់ផែនការសកម្មភាព ដែលបានពិភាក្សាចាប់ពីថ្ងៃចាប់ ផ្តើមបេសកកម្ម ដែលនឹងត្រូវសម្រេចឱ្យបានតាមកាលកំណត់ទៅតាមសកម្មភាពអាទិភាពដែលបានជជែកកន្លងទៅ ចាប់ពីថ្ងៃទី០២ ដល់ថ្ងៃទី០៨ ខែមិថុនា ឆ្នាំ២០២០។ក្នុងនោះ មានការងារលទ្ធកម្ម ហិរញ្ញវត្ថុ ពិនិត្យ តាមដាន និងវាយតម្លៃ សង្គម និងបរិស្ថាន និងការងារពាក់ព័ន្ធផ្សេងៗទៀត។ គួរកត់សម្គាល់នោះ គឺការពិភាក្សាពីគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យ (២០០៣) យន្តការនៃការរក្សានិរន្តរភាពការវិនិយោគ និងលិខិតបទដ្ឋានគតិយុត្តក្នុងការសម្រួលដល់ការស្នើសុំតភ្ជាប់បណ្តាញលូតាមផ្ទះមក បណ្តាញលូសាធារណៈ ។ល។ នៅក្នុង​ឱកាសនោះ ឯកឧត្ដមអនុរដ្ឋលេខាធិការបានមាន​ប្រសាសន៍ផ្ដាំផ្ញើដល់ភាគីទាំងអស់ឱ្យខិតខំប្រឹងប្រែងបំពេញការងារឱ្យអស់ពីសមត្ថភាព ប្រកបដោយប្រសិទ្ធភាព និងតម្លាភាព រិះរកគ្រប់មធ្យោបាយ និងយុទ្ធសាស្ត្រ ដើម្បីបន្តអនុវត្តន៍វឌ្ឍនភាពគម្រោង ដែលកំពុងមានភាពល្អប្រសើរ ហើយគ្រប់ភាគីបានឯកភាពលើរបៀបវារៈ ដែលបានរៀបចំឡើងសម្រាប់អនុវត្តន៍បន្តនាពេលខាងមុខ។ សូមបញ្ជាក់ថា គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ស្ថិតក្រោមឥណទានសម្បទានរបស់ធនាគារពិភពលោក ដើម្បីអភិវឌ្ឍន៍វិស័យទឹកស្អាត និងអនាម័យ ធានាសុខុមាលភាពប្រជាពលរដ្ឋ និងលើកកម្ពស់ជីវភាពរស់នៅរបស់ប្រជាពលរដ្ឋឱ្យបានមួយកម្រិតទៀត៕