[BTV] - មន្ទីរសាធារណការខេត្តកំពង់ធំ សហការជាមួយអាជ្ញាធរស្រុកស្ទោង រៀបចំប្រព័ន្ធលូនៅតាមដងផ្លូវជាតិលេខ៦
2020-05-28
Go to the website published BTV
ភ្នំពេញ ៖ មន្ទីរសាធារណការ និងដឹកជញ្ជូនខេត្តកំពង់ធំ សហការជាមួយអាជ្ញាធរស្រុកស្ទោង រៀបចំដាក់ប្រព័ន្ធលូរំដោះទឹកភ្លៀងប្រវែង៣៤០ម៉ែត្រ នៅទីប្រជុំជនស្រុកស្ទោង តាមបណ្តោយផ្លូវ ជាតិលេខ៦។
លោក ជូ កុល្លា ប្រធានមន្ទីរសារណការ និងដឹកជញ្ជូនខេត្តកំពង់ធំ ប្រាប់ភ្នាក់ងារ BTV ថា ការដាក់ប្រព័ន្ធលូរំដោះទឹកភ្លៀងនៅតាមបណ្តោយផ្លូវជាតិលេខ៦ ក្នុងទីប្រជុំជនស្រុកស្ទោង ខេត្តកំពង់ធំ គឺដោយយោងលើការចាំបាច់ក្នុងការថែរក្សាផ្លូវផង និងដើម្បីថែរក្សាសុខភាពសាធារណៈ របស់ប្រជាពលរដ្ឋផង ព្រោះនៅពេលបច្ចុប្បន្ននេះ រាល់ពេលមានភ្លៀងធ្លាក់តែងតែបង្កឲ្យមានទឹកដក់ នៅតាមចិញ្ចើមផ្លូវដែលអាចនាំឲ្យមានការខូចខាតផ្លូវ។
លោក បន្តថា ការរៀបចំដាក់លូរំដោះទឹកនេះ មានប្រវែង៣៤០ម៉ែត្រ បើគិតជាចំនួនលូស្មើ នឹង៣៤០កង់ មានមុខកាត់លូប្រវែង០,៦០ម៉ែត្រ ដែលជាគម្រោងរបស់មន្ទីរសាធារណការ និងដឹកជញ្ជូនខេត្តកំពង់ធំ ដើម្បីថែរក្សាផ្លូវឲ្យមានការប្រើប្រាស់បានយូរអង្វែង។
ជាមួយគ្នានេះដែរ លោក ណែត សារី អភិបាលស្រុកស្ទោង បញ្ជាក់ដែរថា កន្លងមកនៅ តាមដងផ្លូវជាតិលេខ៦ ក្នុងសាស្ត្រភូមិប្រឡាយ ស្រុកស្ទោង ពេលមានភ្លៀងម្ដងៗ មានទឹកដក់នៅ តាមដងផ្លូវ ដែលធ្វើឲ្យប្រជាពលរដ្ឋពិបាកធ្វើដំណើរ។ ដូចនេះហើយ ទើបរដ្ឋបាលស្រុកស្ទោងបាន សហការជាមួយមន្ទីរសាធារណការ និងដឹកជញ្ជូនខេត្តកំពង់ធំ បានរៀបចំប្រព័ន្ធលូរំដោះទឹក នៅតាមដងផ្លូវដើម្បីងាយស្រួលដល់បងប្អូនប្រជាពលរដ្ឋក្នុងការធ្វើដំណើរទៅវិញទៅមក ជាពិសេស ដើម្បីថែរក្សាគុណភាពផ្លូវឲ្យជាប់បានយូរអង្វែង។
លោក បានអំពាវនាវ ក៏ដូចជា សំណូមពរដល់ បងប្អូនប្រជាពលរដ្ឋទាំងអស់ សូមជួយថែរក្សាសហការ និងចូលរួមទាំងអស់គ្នា ជាពិសេស បងប្អូនដែលរស់នៅតាមដងផ្លូវជាតិ សូមកុំចោលសំរាម ឬកាកសំណល់ផ្សេងៗ នៅលើដងផ្លូវ ឬនៅមាត់លូដែលជាហេតុឲ្យមានការកកស្ទះទឹកនៅពេលមានភ្លៀងធ្លាក់ និងចាក់ដីខ្ពស់ជាងផ្លូវ៕
