ភ្នំពេញ៖ នៅព្រឹកថ្ងៃទី០៩ ខែមីនា ឆ្នាំ ២០២០ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា បានអញ្ជើញសម្ពោធដាក់ឱ្យប្រើប្រាស់ផ្លូវជាតិលេខ៥៥ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងបើកការដ្ឋានសាងសង់ផ្លូវជាតិលេខ១០ តភ្ជាប់ពីសំឡូត ទៅខេត្តកោះកុង។ ផ្លូវជាតិលេខ៥៥ មានប្រវែងសរុប ១៨២.១៦គីឡូម៉ែត្រ តភ្ជាប់ពីពោធិ៍សាត់ ឆ្លងកាត់ស្រុកវាលវែង ទៅដល់ថ្មដាព្រំដែនកម្ពុជា-ថៃ។ ផ្លូវនេះចំណាយថវិកាសាងសង់សរុប ១៣២.៨០ លានដុល្លារអាមេរិក ជាហិរញ្ញប្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់នានា និងការបោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ។ ទន្ទឹមនឹងការដាក់ឱ្យដំណើរការផ្លូវជាតិលេខ៥៥ ថ្ងៃនេះ សម្តេចតេជោ ហ៊ុន សែន និង ឯកឧត្តម វ៉ាង វិនធៀន នឹងប្រកាសបើកការដ្ឋានសាងសង់ផ្លូវមួយខ្សែថ្មីទៀត គឺផ្លូវជាតិលេខ១០ ដែលតភ្ជាប់ពីសំឡូត ខេត្តបាត់ដំបង ឆ្លងកាត់វាលវែង អូរសោម ខេត្តពោធិ៍សាត់ រហូតដល់ខេត្តកោះកុង ដែលមានប្រវែងសរុប ១៩៨.៧១គីឡូម៉ែត្រ គ្រោងចំណាយថវិកាសរុបប្រមាណ ១៨៨.៣៨លានដុល្លារអាមេរិក ជាហិរញ្ញប្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា។ សម្តេចតេជោ ហ៊ុន សែន មានសេចក្តីសោមនស្សរីករាយ ដែលបាន​មក​កាន់ទី​​នេះ ដើម្បីសម្ពោធបើកឱ្យប្រើប្រាស់​ជផ្លូវជាតិលេខ៥៥នេះ។ សម្តេចតេជោក៏បានថ្លែងអំណរគុណដល់បងប្អូនប្រជាពលរដ្ឋខេត្តពោធិ៍សាត់ទាំងអស់ដែលកន្លងមកតែងតែគោរពស្រលាញ់សម្តេច និងតែងតែបោះឆ្នោតជូនគណបក្សប្រជាជនកម្ពុជាជាបន្តបន្ទាប់។ សម្តេចតេជោនាយករដ្ឋន្ត្រី បានមានប្រសាសន៍រំលឹកពីតំបន់នេះ ដែលពីអតីតកាលគឺជាសមរភូមិក្តៅមួយ ជាតំបន់ដែលមានត្រួតត្រាច្រើន។ សម្តេចតេជោបន្តថា ពីមុនផ្លូវនេះជាផ្លូវជាតិលេខ៥៦ ដែលពេលនេះប្តូរមកជាផ្លូវជាតិលេខ៥៥វិញ។ សម្តេចតេជោនាយករដ្ឋមន្ត្រីបានមានប្រសាសន៍ថា នៅពេលខាងមុខនេះ រាជរដ្ឋាភិបាលកម្ពុជានឹងខិតខំបើកច្រកព្រំដែនកម្ពុជា-ថៃ (ច្រកថ្មដា) ដើម្បីភ្ជាប់ខេត្តពោធិសាត់ជាមួយនឹងខេត្តត្រាតនៃប្រទេសថៃ ក្នុងការនាំទំនិញចេញចូលរវាងប្រទេសទាំងពីរ និងដើម្បីជីវភាពនៃប្រជាពលរដ្ឋនៃប្រទេសទាំងពីរផងដែរ។ សម្តេចតេជោបានមានប្រសាសន៍ថា ក្រោយពីការដាក់ចេញនូវនយោបាយ ឈ្នះ ឈ្នះ ហើយ ក្នុងការអភិវឌ្ឍប្រទេសសម្តេចតេជោបានដាក់ចេញនូវគោលដៅ ០២សំខាន់ ដែលគោលដៅទី១គឺការប្រែក្លាយតំបន់សមរភូមិក្តៅទាំងអស់អោយក្លាយទៅជាតំន់ដែលមានសុខសន្តិភាព និងការអភិវឌ្ឍ និងគោលដៅទី២គឺការប្រែក្លាយតំបន់ព្រំដែនទាំងអស់អោយទៅជាព្រំដែនដែលមានសុខសន្តិភាព តំបន់ទីផ្សារ និងកិច្ចសហប្រតិបត្តិការល្អជាមួយប្រទេសជិតខាង។ ចំពោះផ្លូវជាតិលេខ១០ដែលត្រូវបើកការដ្ឋាននាពេលនេះ សម្តេចតេជោ ហ៊ុន សែន បានបង្ហាញនូវក្តីមោទនភាពចំពោះសមិទ្ធផលថ្មីបន្ថែមទៀត ដោយសម្តេចតេជោបានសង្កត់ធ្ងន់ថា ក្រោយពីបានផ្លូវនេះមួយទៀតបងប្អូនប្រជាពលរដ្ឋនៅវាលវែងនេះរស់នៅកាន់តែមានភាពងាយស្រួល ហើយសម្តេចតេជោបានហៅតំបន់នេះថា «សំណាងថ្មដា វាសនាវាលវែង» ហើយសម្តេចនឹងតែងបទចម្រៀងមួយបទដែលដាក់ថា«សំណាងថ្មដា វាសនាវាលវែង»ទៀតផងនាពេលខាងមុខ។ សម្តេចតេជោបន្តថានៅទីនេះ ថ្ងៃអនាគតនឹងមានការបង្កើនរោងចក្រនៅទីនេះផងដែរ។ សម្តេចតេជោបានមានប្រសាសន៍ថា ​​ផ្លូវជាតិលេខទាំងពីរខ្សែនេះ នឹងដើរតួនាទីយ៉ាងសំខាន់ និងជាផ្លូវយុទ្ធ​សាស្រ្ត​មួយ សម្រាប់​បម្រើឱ្យ​ការ​​អភិវឌ្ឍ​សេដ្ឋ​កិច្ច​ផង ការពារអធិបតេយ្យភាពជាតិផង និងជួយទ្រទ្រង់យ៉ាង​រឹង​មាំ​នូវ​កិច្ច​សហ​ប្រតិបត្តិ​ការ​ល្អ​រវាង​ប្រទេសកម្ពុជា និងប្រទេសថៃ និងជាច្រករបៀងសេដ្ឋកិច្ចដ៏សំខាន់ផងដែរ។ នៅថ្ងៃនេះ សម្តេចតេជោបានជំរុញអោយប្រជាពលរដ្ឋកម្ពុជាយើងប្រើប្រាស់ក្រមារជំនួស ដែលអាចប្រើការពារជំនួយម៉ាស់ក៏បាន ក្នុងការបង្ការការពារជម្ងឺកូវីដ១៩។ សម្តេចបានមានប្រសាសន៍បញ្ជាក់ថាពេលនេះ សម្តេចបានប្រើសេនាឌីយោទី២ គឺពេលដឹងថាមានពលរដ្ឋខ្មែរយើងកើតជម្ងឺកូវីដ១៩ភ្លាម សម្តេចបានប្រកាសអោយបិទជាបណ្តោះអាសន្នជាង១០សាលានៅទីរួមខេត្តសៀមរាប និងបានលុបចោលអង្គរសង្ក្រាន្តផងដែរ។ សម្តេចតេជោសូមអោយប្រជាពលរដ្ឋត្រូវតែមានការប្រុងប្រយ័ត្នការពារខ្លួន ជាពិសេសកុមារតូចៗ ដែលពិបាកក្នុងការការពារខ្លួន។ សម្តេចតេជោនាយករដ្ឋមន្ត្រីសុំអោយអាជីវករទាំងឡាយសូមកុំតម្លើងថ្លៃលក់ទំនិញនានានៅលើទីផ្សារ។ សម្តេចតេជោបានអំពាវនាវអោយប្រជាពលរដ្ឋទាំងអស់ត្រូវមានជំនឿជឿជាក់លើខ្លួនឯង មិនត្រូវមានការភ័យខ្លាចហួសហេតុនោះទេ។ នៅថ្ងៃនេះ សម្តេចតេជោបានជូននូវដំណឹងល្អសំរាប់កម្មករកម្មការិនី ដោយក្នុងនោះមិត្តចិនបានផ្តល់នាវាចំនួន០៧គ្រឿង ដឹកវត្ថុធាតុដើមមកមកប្រើប្រាស់ក្នុងរោងចក្រនៅកម្ពុជាចាប់ពីខែមីនានេះ រហូតដល់ខែឧសភា ឆ្នាំ២០២០។ ទន្ទឹមនឹងនេះ នៅថ្ងៃនេះផងដែរ សម្តេចតេជោបានអំពាវនាវ០៤ចំនុចសំខាន់៖ ១)សូមរោងចក្រនានាមេត្តាកុំលុបចោលកិច្ចសន្យាការងារជាមួយកម្មករ កម្មការិនី។ ២)ចំពោះមីក្រូហិញ្ញវត្ថុទាំងអស់ ត្រូវពន្យាការសង ឬការមិនយកការប្រាក់ដល់កម្មករ កម្មការិនីដែលបានជំពាក់លុយនៅមីក្រូហិរញ្ញវត្ថុនោះ។ ៣)សុំអោយម្ចាស់បុរីលំនៅដ្ឋានទាំងអស់ ដែលរំលួសផ្ទះជាមួយបងប្អូនកម្មករ ត្រូវពន្យាការបង់ និងកុំផ្តាច់កុងត្រានោះអី។ ៤)សូមអោយអគ្គិសនីកម្ពុជា អនុញ្ញាតអោយកម្មករកម្មការិនីជំពាក់ថ្លៃភ្លើងសិនក្នុងអំឡុងពេលនេះ។ នៅថ្ងៃនេះ សម្តេចតេជោនាយករដ្ឋមន្ត្រី បានប្រកាសសាងហេដ្ឋារចនាសម្ព័ន្ធសាលារៀននៅក្នុងឃុំប្រម៉ោយ ស្រុកវាលវែង ខេត្តពោធិ៍សាត់នេះ ដែលក្នុងនោះរួមមាន៖ ផ្តល់ជូនអាគារសិក្សាសាលា មតេយ្យ និងបថមសិក្សា ហ៊ុន សែន ប្រម៉ោយ នូវអគារ ១ខ្នង៣ជាន់១៨បន្ទប់ ដោយមានទីលានបាល់ បោះ បាល់ទះ និងផ្លូវបេតុង។ សំរាប់វិទ្យាល័យ ហ៊ុន សែន ប្រម៉ោយវិញ គឺផ្តល់ជូន អគារសិក្សា១ខ្នង កម្ពស់៣ជាន់ មាន១៨ បន្ទប់ និងអគារទីចាត់ការ១ខ្នង មាន៣បន្ទប់ រួមទាំងអាគារស្នាក់នៅរបស់សិស្ស១ខ្នងកម្ពស់២ជាន់មាន១០បន្ទប់ ថែមទាំងមានផ្លូវបេតុង តារាងបាល់ទាត់ បាល់ទះ និងបាល់បោះផងដែរ។ មុននឹងបញ្ចប់ សម្តេចតេជោនាយករដ្ឋមន្ត្រី បានជូនពរដល់បងប្អូនប្រជាពលរដ្ឋទាំងអស់ សូមទទួលបាននូវសេចក្តីសុខចម្រើនគ្រប់ៗ ព្រមទាំងបានផ្តល់អំណោយជូនដល់ លោកយាយ លោកតា លោកគ្រូ អ្នកគ្រូ សិស្សានុសិស្ស ក្នុងបរិយា កាសរីករាយ និងបន្ទាប់មកក៏បានអញ្ជើញរួមគ្នាជាមួយ ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា កាត់ខ្សែបូរសម្ពោធដាក់អោយប្រើប្រាស់កំណាត់ផ្លូវជាតិលេខ៥៥ និងអញ្ជើញបើកការដ្ឋានសាងផ្លូវជាតិលេខ១០ ចាប់ពីពេលនេះតទៅ៕