ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈកម្មាធិការគណបក្សក្រសួងសាធារណការ និងដឹកជញ្ជូន អញ្ជើញជាអធិបតីក្នុងកិច្ចប្រជុំពេញអង្គ នៃគណៈកម្មាធិការគណៈបក្សក្រសួង —- នៅល្ងាច ថ្ងៃសុក្រ ៦កើត ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៨ ខែកុម្ភៈ ឆ្នាំ២០២០ នៅកំពង់ផែស្វយ័តភ្នំពេញ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈកម្មាធិការគណបក្សក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងកិច្ចប្រជុំពេញអង្គនៃគណៈកម្មាធិការគណៈបក្សក្រសួង ដោយមានការចូលរួមពីសមាជិកសមាជិកគណបក្សក្រសួង។ កិច្ចប្រជុំពេញអង្គរបស់គណៈកម្មាធិការគណបក្សក្រសួងនេះ ផ្ដោតជាសំខាន់ទៅលើការប្រគល់សេចក្តីសម្រេចស្តីពីការសម្រួលភារកិច្ច និងតែងតាំងមន្ត្រីគណបក្ស ការពិនិត្យនិងអនុម័តលើការកែសម្រួលសមាសភាពគណៈកម្មាធិការរណសិរ្សសាមគ្គីអភិវឌ្ឍន៍មាតុភូមិកម្ពុជាក្រសួងសាធារណការ និងដឹកជញ្ជូន និងការ តែងតាំងសមាសភាពលេខាធិការដ្ឋាន ការផ្សព្វផ្សាយការងារឃោសនាអប់រំ។ ឯកឧត្តមទេសរដ្ឋមន្ត្រី បានណែនាំឱ្យសមាជិសមាជិកាបក្សទាំងអស់ បន្តចុះមូលដ្ឋានឲ្យបានញឹកញាប់ ដើម្បីក្តាប់ និងប្រមូលព័ត៌មានឲ្យបានច្បាស់លាស់អំពីសុខទុក្ខរបស់ប្រជាពលរដ្ឋ ហើយរាយការណ៍ជូនថ្នាក់ដឹកនាំដើម្បីដោះស្រាយបានទាន់ពេលវេលា។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រី បានជម្រាបជូនសមាជិសមាជិកាបក្សអំពីសកម្មភាពមនុស្សធម៌របស់សម្ដេចអគ្គសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា ទាក់ទងនឹងការទទួលស្វាគមន៍ នាវាទេសចរណ៍ Westerdam ដែលត្រូវបានបណ្ដាប្រទេសជាច្រើនបដិសេធ មិនឱ្យចូលចតដោយភ័យខ្លាចពីការឆ្លងមេរោគ COVID-19 ដែលសកម្មភាពនេះបានធ្វើឲ្យកម្ពុជាត្រូវបានទទួលស្គាល់ សកម្មភាពមនុស្សធម៌ គោរពសិទ្ធមនុស្ស មិនរើសអើង ជាគំរូដល់ប្រទេសដទៃទៀត លើឆាកអន្តរជាតិ៕