ថ្ងៃព្រហស្បតិ៍ ៥កើត ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែកុម្ភៈ ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន បានដឹកនាំ គណៈប្រតិភូក្រសួង អញ្ជើញចូលរួមកិច្ចប្រជុំស្ដីពីការអនុវត្តការត្រួតពិនិត្យច្រកចេញ-ចូលតែមួយ រវាងកម្ពុជា-វៀតណាម (បាវិត-ម៉ុកបៃ) និងច្រកចេញ-ចូលតែមួយ រវាងកម្ពុជា-ថៃ (ស្ទឹងបត់-បានណងអៀន)។ កិច្ចប្រជុំនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ ដោយមានការចូលរួមពីឯកឧត្តម ប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្ម ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្រ្តី និងជាអគ្គលេខាធិការ នៃក្រុមប្រឹក្សាអភិវឌ្ឍន៍ កម្ពុជា ឯកឧត្តមនិ ងតំណាងក្រសួងស្ថាប័នពាក់ព័ន្ធ។ កិច្ចប្រជុំនេះរៀបចំឡើងមានគោលបំណងស្វែងរកនីតិវិធីដោះស្រាយបញ្ហាប្រឈមនឹងការកកស្ទះចរាចរណ៍ និងបញ្ហាផ្សងៗដែលក្រុមហ៊ុនដឹកជញ្ជូនទំនិញជួបប្រទះនៅច្រកទ្វារព្រំដែនអន្តរជាតិបាវិត-ម៉ុកបៃ និងច្រកទ្វារព្រំដែនអន្តរជាតិស្ទឹងបត់-បាណងអៀន។ ឯកឧត្តមទេសរដ្ឋមន្ត្រីបានជម្រាបជូនឯកឧត្តមអគ្គបណ្ឌិតសភាចារ្យ និងអង្គប្រជុំទាំងមូលអំពីគម្រោងដោះស្រាយបញ្ហាប្រឈមនៅច្រកទ្វារព្រំដែនអន្តរជាតិទាំងពីរទាក់ទងនឹងការកកស្ទះចរាចរណ៍ ដែលបង្កឱ្យការនាំចេញនាំចូលវត្ថុធាតុដើមមានការយឺតយ៉ាវ កំណើននៃការដឹកជញ្ជូនទំនិញ ការជម្រះបញ្ជីគយទាក់ទងនឹងទំនិញនាំចេញនាំចូលមានការយឺតយ៉ាវ គម្រោងសាងសង់ផ្លូវល្បឿនលឿននៅច្រកទ្វារព្រំដែនអន្តរជាតិបាវិត-ម៉ុកបៃ និងគម្រោងសាងសង់ផ្លូវរថភ្លើងភ្នំពេញ-វៀតណាម ឆ្លងកាត់ព្រំដែនបាវិត-ម៉ុកបៃ។ ជាមួយគ្នានេះផងដែរ ឯកឧត្តមទេសរដ្ឋមន្ត្រីជម្រាបជូនផងដែរអំពីគម្រោងស្នើសុំភាគីថៃបើកច្រកទ្វារព្រំដែនអន្តរជាតិ ស្ទឹងបត់-បាណងអៀនជាបណ្តោះអាសន្ន ដើម្បីសម្រួលដល់ការដឹកជញ្ជូនទំនិញ និងកាត់បន្ថយការកកស្ទះចរាចរណ៍នៅចក្រទ្វារព្រំដែនអន្តរជាតិប៉ោយប៉ែតបច្ចុប្បន្ន។ ជាមួយគ្នានេះផងដែរ ឯកឧត្តមអគ្គបណ្ឌិតសភាចារ្យ បានជំរុញឱ្យក្រសួង/ស្ថាប័ន ភាគីពាក់ព័ន្ធទាំងអស់ផ្តល់ធាតុចូលសំខាន់ៗ និងចូលរួមដោះស្រាយបញ្ហានៅច្រកទ្វារព្រំដែនអន្តរជាតិទាំងពីរនេះឱ្យមានប្រសិទ្ធភាពដោយប្រើប្រាស់យន្តការតែមួយជាក់ស្តែង ដើម្បីសម្រួលការលំបាករបស់វិស័យឯកជន។ គួរកត់សម្គាល់ផងដែរថា៖ ដើម្បីលើកកម្ពស់ប្រសិទ្ធភាពនៃការផ្ដល់សេវាសាធារណៈដល់ក្រុមហ៊ុនធុរកិច្ច ដែលកំពុងធ្វើប្រតិបត្តិការនៅកម្ពុជា ជាពិសេសក្រុមហ៊ុនដឹកជញ្ជូនទំនិញឆ្លងកាត់ព្រំដែនឲ្យបានឆាប់រហ័សតាមនីតិវិធីប្រកបដោយតម្លាភាព គណនេយ្យភាព និងអភិបាលកិច្ចល្អ រាជរដ្ឋាភិបាលគ្រោង បង្កើតច្រកចេញ-ចូលតែមួយរវាងកម្ពុជា-វៀតណាម(បាវិត-ម៉ុកបៃ) និងច្រកចេញ-ចូលតែមួយរវាង កម្ពុជា-ថៃ (ស្ទឹងបត់-បានណងអៀន) ដើម្បីសម្រួលការដឹកជញ្ជូនទំនិញឆ្លងកាត់ព្រំដែន ក៏ដូចជាដើម្បីទាក់ទាញការវិនិយោគផងដែរ ៕