ឯកឧត្ដមទេសរដ្ឋមន្ត្រី អញ្ជើញចុះពិនិត្យវឌ្ឍនភាពការងារស្ដារអូរមួយចំនួននៅក្នុងក្រុងព្រះសីហនុ បច្ចុប្បន្នសម្រេចបាន​ ប្រវែង ១៥ ២១៦ ម៉ែត្រ ស្នើនឹង ៥១,១០ % — ថ្ងៃសុក្រ ៦រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៤ ខែកុម្ភៈ ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចុះពិនិត្យ វឌ្ឍនភាពការងារស្ដារប្រឡាយបង្ហូរទឹកនៅក្នុងក្រុងព្រះសីហនុ ដោយមានការចូលរួមពីថ្នាក់ដឹកនាំ មន្ត្រីរាជការនៃក្រសួង និងមន្ទីរសាធារណការ និងដឹកជញ្ជូនខេត្តព្រះសីហនុ និងអាជ្ញាធរដែនដីផងដែរ។ ឯកឧត្ដមទេសរដ្ឋមន្រីបានមានប្រសាសន៍ថា ក្រសួងសាធារណការ និងដឹកជញ្ជូន ក៏ដូចជាមន្ទីរសាធារណការ និងដឹកជញ្ជូនខេត្តព្រះសីហនុ បានពន្លឿនការស្ដារអូរសំខាន់ៗមួយចំនួននៅក្នុងក្រុងព្រះសីហនុ សំដៅការពារ និងទប់ស្កាត់កុំឱ្យមានការជន់លិចលង់ដោយសារទឹកភ្លៀងនៅរដូវវស្សាដែលនឹងចូលមកដល់នាពេលឆាប់ៗខាងមុខនេះ ក៏ដូចជារៀបចំប្រព័ន្ធប្រឡាយទឹកនៅទីក្រុងមួយនេះ ឱ្យមានភាពទាក់ទាញ និងអានាម័យល្អតាមផែនការរបស់ក្រសួង។ សូមបញ្ជាក់ថា អូរទាំងនោះមានចំនួន៥ និងមានប្រវែងសរុបចំនួន២៩ ៧៩១ ម៉ែត្រ រួមមាន៖ អូរអណ្ដូងអ៊ុនតាក់ អូរស្ពានឆេះ អូរសំអាត អូរអេម៉ារីអូ និងអូរឈើទាល។ ឯកឧត្ដមទេសរដ្ឋមន្ត្រី ស៊ុន ចាន់ថុល បានឱ្យដឹងថា គិតត្រឹមខែមករា ឆ្នាំ២០២០នេះ ជារួម អូរទាំងនេះត្រូវបានស្ដាររួចរាល់ប្រវែង ១៥ ២១៦ ម៉ែត្រ ស្នើនឹង ៥១,១០ %។ ចំណែកឯប្រវែងដែលនៅសេសសល់ ក្រសួង និងសហការជាមួយអាជ្ញាធរដែនដីដើម្បីពន្លឿនការការងារស្ដារឱ្យបានចប់សព្វគ្រប់នៅមុនរដូវភ្លៀងធ្លាក់មកដល់។ ឯកឧត្តមទេសរដ្ឋមន្ត្រីបានសម្ដែងនូវការកោតសរសើរ និងថ្លែងអំណរគុណដល់ក្រុមការងារ និងអាជ្ញាធរពាក់ព័ន្ធទាំងអស់ដែលបានខិតខំប្រឹងប្រែងក្នុងការពន្លឿនការស្ដារអូរទាំងនោះ។ ឯកឧត្ដមទេសរដ្ឋមន្ត្រីក៏បានអំពាវនាវដល់បងប្អូនប្រជាពលរដ្ឋដែលកំពុងរស់នៅក្នុងក្រុងនេះ ជាពិសេសប្រជាពលរដ្ឋដែលកំពុងរស់នៅតាមប្រឡាយទាំងនេះចូលរួម និងសហការជាមួយក្រុមការងាររបស់ក្រសួង និងអាជ្ញាធរដែនដី ដើម្បីឱ្យការស្ដារនេះមានល្បឿនកាន់តែលឿន ព្រមទាំងយោគយល់ខ្ពស់ចំពោះការរំខាននានាខណៈពេលកំពុងស្ដារ៕