[Post khmer] - ក្រសួងសាធារណការ ផ្ដល់សេវារថយន្តឆៀកចល័តទៅកាន់ខេត្ត ១៤
2020-01-17
Go to the website published Post khmer
ភ្នំពេញៈ ក្រសួងសាធារណការ និងដឹកជញ្ជូនបានចេញកាលវិភាគត្រួតពិនិត្យលក្ខណៈបច្ចេកទេសយានជំនិះ (ឆៀក) ចល័តតាមបណ្ដាខេត្តចំនួន ១៤ ដែលគ្មានមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត ដើម្បីបង្កលក្ខណៈងាយស្រួលដល់ម្ចាស់យានយន្តដែលរស់នៅតាមបណ្ដាខេត្តទាំងនោះទទួលបានសេវាកម្មឆៀកយានយន្តរបស់ពួកគេតាមកាលកំណត់ ដើម្បីចូលរួមកាត់បន្ថយគ្រោះថ្នាក់ចរាចរណ៍ និងការបំពុលបរិស្ថានដែលបង្កឡើងពីកត្តាយានយន្ត។
តារាងកាលវិភាគ ឆៀក ចល័ត ដែលបានចុះផ្សាយលើបណ្ដាញសង្គមរបស់ក្រសួងសាធារណការ និងដឹកជញ្ជូនកាលពីថ្ងៃអង្គារបានឲ្យដឹងថា បណ្ដាខេត្តដែលគ្មានមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត រួមមាន ខេត្តកំពង់ធំ, កំពត, ស្វាយរៀង, កែប, ប៉ៃលិន, តាកែវ, ព្រៃវែង, ពោធិ៍សាត់, មណ្ឌលគិរី, បន្ទាយមានជ័យ, ឧត្តរមានជ័យ, ស្ទឹងត្រែង, ត្បូងឃ្មុំ និងខេត្តកោះកុង។
ក្រុមហ៊ុន CMVIC Inspection និង ក្រុមហ៊ុន HK Car Inspection ដែលជាដៃគូអភិវឌ្ឍន៍ដ៏សំខាន់របស់ក្រសួងសាធារណការ និងដឹកជញ្ជូនក្នុងកិច្ចសហប្រតិបត្តិការឆៀកយានយន្តនៅកម្ពុជាបានបញ្ជូនក្រុមការងារ និងឧបករណ៍រួមទាំងម៉ាស៊ីនស្វ័យប្រវត្តិកម្មដែលបម្រើឲ្យការងារឆៀករថយន្ត ទៅកាន់បណ្ដាខេត្តទាំង ១៤ នោះដើម្បីផ្ដល់សេវាកម្មឆៀករថយន្តដល់ម្ចាស់យានយន្តដែលមិនទាន់បានឆៀក ឬផុតកំណត់ឆៀកនៅក្នុងបណ្ដាខេត្តទាំងនោះតាំងពីដើមខែមករា ឆ្នាំ ២០២០។
លោក ទូច សេងឡី ប្រធានឆៀកចល័ត ១ នៃក្រុមហ៊ុន CMVIC Inspection បានប្រាប់ភ្នំពេញប៉ុស្តិ៍ឲ្យដឹងថា សម្រាប់ខែមករានេះ ក្រុមការងាររបស់លោក បានផ្ដល់សេវាកម្មឆៀករថយន្តរួចរាល់ហើយសម្រាប់ខេត្តពោធិ៍សាត់ និងខេត្តឧត្តរមានជ័យ និងកំពុងបន្តផ្ដល់ជូននូវសេវាកម្មឆៀករថយន្តដល់ម្ចាស់យានយន្តនៅខេត្តប៉ៃលិន និងខេត្តស្ទឹងត្រែង និងគ្រោងបន្តទៅកាន់ខេត្តបន្ទាយមានជ័យ និងមណ្ឌលគិរីនៅថ្ងៃចន្ទសប្ដាហ៍ក្រោយ។
លោក សេងឡី បានថ្លែងថា៖ «សម្រាប់ខែមករានេះ ក្រុមការងារឆៀកចល័តរបស់យើង ចុះប្រតិបត្តិការឆៀករថយន្តសម្រាប់ខេត្តគោលដៅនីមួយៗ នៅក្នុងរយៈពេលតែ ៥ ថ្ងៃប៉ុណ្ណោះ។ ម្ចាស់យានយន្តដែលមិនទាន់បានឆៀក ក្នុងអំឡុងពេលដែលក្រុមការងារយើងចុះមកនេះ ពួកគាត់អាចនាំរថយន្តរបស់ពួកគាត់ទៅឆៀក នៅឯមជ្ឈមណ្ឌលឆៀករថយន្តរបស់ក្រុមហ៊ុន CMVIC Inspection ដែលនៅកៀកមូលដ្ឋានរបស់ពួកគាត់»។
លោក សេងឡី បានឲ្យដឹងថា មជ្ឈមណ្ឌលឆៀករបស់ក្រុមហ៊ុន CMVIC Inspection មាននៅតាមបណ្ដារាជធានីខេត្តចំនួន ១០ ក្នុងនោះរួមមាន រាជធានីភ្នំពេញ, បាត់ដំបង, សៀមរាប, ព្រះវិហារ, ក្រចេះ, រតនគិរី, កំពង់ចាម, កំពង់ឆ្នាំង, កំពង់ស្ពឺ និងខេត្តព្រះសីហនុ។
លោក សេងឡី បានបញ្ជាក់ទៀតថា៖ «កម្មវិធីឆៀកចល័តនេះ គឺដើម្បីសម្រួលទាំងពេលវេលា និងថវិកាដល់ម្ចាស់យានយន្តទាំងអស់ក្នុងការទទួលបានសេវាកម្មឆៀករថយន្តប្រកបដោយគុណភាព តម្លាភាព និង សុវត្ថិភាព ជាពិសេសដើម្បីចូលរួមកាត់បន្ថយនូវគ្រោះថ្នាក់ចរាចរណ៍ដែលបង្កពីកត្តាយានយន្ត និងការផាកពិន័យតាមផ្លូវច្បាប់ពីមន្ត្រីនគរបាលចរាចរណ៍»។
យោងតាមរបាយការណ៍ប្រចាំថ្ងៃរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានឲ្យដឹងថា គ្រោះថ្នាក់ចរាចរណ៍បានសម្លាប់មនុស្សក្នុង ១ ថ្ងៃជាមធ្យម ៥ នាក់ និង ១១ នាក់ទៀតរងរបួស។
របាយការណ៍នេះបានឲ្យដឹងទៀតថា កត្តានាំមកនូវគ្រោះថ្នាក់ចរាចរណ៍ ភាគច្រើនបង្កឡើងដោយកត្តាមនុស្ស បន្ទាប់មកកត្តាយានយន្ត និងកត្តាផ្លូវ។
ក្នុងឆ្នាំ ២០១៩ មានរថយន្តប្រមាណ ៣០ ម៉ឺនគ្រឿងប៉ុណ្ណោះ ក្នុងចំណោមរថយន្តប្រមាណជាង ៦០ ម៉ឺនគ្រឿង ដែលកំពុងធ្វើចរាចរណ៍លើដងផ្លូវបានឆៀកត្រឹមត្រូវតាមកាលកំណត់។ នេះបើយោងតាមប្រសាសន៍របស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនដែលបានលើកឡើងក្នុងពិធីបើកសម្ពោធឲ្យដំណើការមជ្ឈមណ្ឌលឆៀកទី ៤ របស់ក្រុមហ៊ុន CMVIC Inspection ក្នុងសង្កាត់ច្រាំងចំរេះ ២ រាជធានីភ្នំពេញកាលពីពាក់កណ្ដាលខែធ្នូឆ្នាំ ២០១៩ កន្លងទៅ។
លោកបានបញ្ជាក់ថា៖ «ការគោរពច្បាប់ចរាចរណ៍ និងការនាំយករថយន្តទៅឆៀកតាមកាលកំណត់គឺជាការចូលរួមចំណែកដ៏សំខាន់មួយជាមួយរាជរដ្ឋាភិបាលក្នុងការកាត់បន្ថយគ្រោះថ្នាក់ចរាចរណ៍»៕
