សិក្ខាសាលាផ្សព្វផ្សាយ ស្ដីពីនីតិវិធីនៃការអនុវត្តប្រាក់បេសកកម្មក្នុងប្រទេសរបស់អង្គភាពរដ្ឋបាលកណ្ដាលនៃក្រសួងសាធារណការ និងដឹកជញ្ជូន ---- ថ្ងៃសុក្រ ៨រោច ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែមករា ឆ្នាំ២០២០ ឯកឧត្តម វ៉ាស៊ឹម សុរិយ៉ា អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្ដីពីនីតិវិធីនៃការអនុវត្តប្រាក់បេសកកម្មក្នុងប្រទេសរបស់អង្គភាពរដ្ឋបាលកណ្ដាលនៃក្រសួងសាធារណការ និងដឹកជញ្ជូន ដោយមានសិក្ខាកាមចូលរួមប្រមាណ១១៥នាក់ ដែលជាថ្នាក់ដឹកនាំ និងមន្ត្រីរាជការនៃក្រសួងសាធារណការ និងដឹកជញ្ជូន និងវាគ្មិនមកពីក្រសួងសេដ្ឋកិច្ច និងហិរញ្ញវត្ថុ។ សិក្ខាសាលានេះសហការរៀបចំឡើងដោយ ក្រសួងសាធារណការ និងដឹកជញ្ជូន និងក្រសួងសេដ្ឋកិច្ចនិងហិរញ្ញវត្ថុ ក្នុងគោលបំណងផ្សព្វផ្សាយ និងបញ្ជ្រាបបន្ថែមនូវនីតិវិធីនៃការអនុវត្តប្រាក់បេសកកម្មក្នុងប្រទេសឱ្យកាន់តែមានប្រសិទ្ធភាព តម្លាភាព និងគណនេយ្យភាពថែមទៀត ដល់ថ្នាក់ដឹកនាំ និងមន្ត្រីអនុវត្តផ្ទាល់របស់ក្រសួងសាធារណការ និងដឹកជញ្ជូន ។ ថ្លែងក្នុងសុន្ទរកថាបើក ឯកឧត្ដមអនុរដ្ឋលេខាធិការ បានមានប្រសាសន៍ថា សិក្ខាសាលានេះ គឺជាការផ្សព្វផ្សាយអនុក្រិត្យលេខ ២១៦ អនក្រ.បក និងប្រកាសលេខ ១៥៨៩ សហវ.ប្រក ក៏ដូចជាបើកវេទិកាសួរដេញដោល និងចូលរួមផ្ដល់ជាមតិយោបល់លើបញ្ហាដែលបានជួបប្រទះខណៈពេលកំពុងអនុវត្ត និងរួមគ្នារកដំណោះស្រាយសមស្រប ដើម្បីលើកកម្ពស់ប្រសិទ្ធភាព សក្ដិសិទ្ធភាព តម្លាភាព និងគណនេយ្យភាព នៃការបំពេញបេសកកម្មរបស់ថ្នាក់ដឹកនាំ មន្ត្រីរាជការសាធារណៈ និងមន្ត្រីកិច្ចសន្យា នៃក្រសួងសាធារណការ និងដឹកជញ្ជូន ដើម្បីធានាបាននូវប្រសិទ្ធផលការងារកាន់តែខ្ពស់ថែមទៀត។ ឯកឧត្ដមអនុរដ្ឋលេខាធិការ បានស្នើឱ្យអង្គសិក្ខាកាមទាំងមូលចូលរួមចែករំលែក និងសួរដេញដោលឱ្យបានផុលផុសដើម្បីរកនីតិវិធីឱ្យបានកាន់តែប្រសើរថែមទៀត ជាពិសេសត្រូវអនុវត្តតាមបទដ្ឋានគតិយុត្តពាក់ព័ន្ធឱ្យបានម៉ត់ចត់ ក្នុងការអនុវត្តប្រាក់បេសកកម្មក្នុងប្រទេសនេះ៕