ប្រជុំពិភាក្សាទ្វេភាគីស្តីពី ការដោះស្រាយបញ្ហាប្រឈមការកកស្ទះចរាចរណ៍នៃរថយន្តដឹកជញ្ជូនទំនិញ ច្រកទ្វារព្រំដែនអន្តរជាតិបាវិត ជាមួយក្រសួងដឹកជញ្ជូនវៀតណាម នៅទីក្រុងហូជីមិញ ប្រទេសវៀតណាម --- ថ្ងៃព្រហស្បតិ៍ ៨រាច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៩ ខែធ្នូ ឆ្នាំ២០១៩ បន្ទាប់ពីការចុះត្រួតពិនិត្យច្រកទ្វារព្រំដែនអន្តរជាតិបាវិត-ម៉ុកបៃ(Bavet-MoC Bai) ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបន្តអញ្ជើញដឹកនាំគណៈប្រតិភូកម្ពុជា ប្រជុំពិភាក្សាទ្វេភាគីជាមួយឯកឧត្តម Nguyen Van The រដ្ឋមន្ត្រីក្រសួងដឹកជញ្ជូនវៀតណាម និងតំណាងក្រសួងពាក់ព័ន្ធផ្សេងៗទៀតរបស់ភាគីវៀតណាម នៅទីក្រុងហូជីមិញ ប្រទេសវៀតណាម។ គណៈប្រតិភូកម្ពុជា មានការចូលរួមផងដែរពីតំណាង៖ ក្រុមប្រឹក្សាអភិវឌ្ឍន៍កម្ពុជា ក្រសួងពាណិជ្ជកម្ម ក្រសួងការបរទេសនិងសហប្រតិបត្តិការអន្តរជាតិ អគ្គកុងស៊ុលកម្ពុជាប្រចាំទីក្រុងហូជីមិញ អគ្គនាយកដ្ឋានគយនិងរដ្ឋាករ អាជ្ញាធរខេត្តស្វាយរៀង និងអគ្គនាយកដ្ឋានអន្តោប្រវេសន៍។ គោលបំណងសំខាន់នៃកិច្ចប្រជុំនេះគឺ៖ ពិនិត្យមើលនូវមូលហេតុដែលបណ្តាលឱ្យ មានការកកស្ទះរថយន្តដឹកជញ្ជូនទំនិញឆ្លងកាត់ព្រំដែនរវាងកម្ពុជា-វៀតណាម (បាវិត-ម៉ុកបៃ) និង រកដំណោះស្រាយនិងវិធានការជាក់ស្តែង ដើម្បីធ្វើឱ្យប្រសើរឡើងនូវការចរាចរទំនិញ និងទេសចរ ក្នុងរយៈពេលខ្លី-មធ្យម-វែង។ នៅក្នុងកិច្ចប្រជុំនេះផងដែរ ភាគីទាំងពីរ បានឯកភាពគ្នាលើការរីកចម្រីនទំនាក់ទំនង និងកិច្ចសហប្រតិបត្តិការល្អរវាងប្រទេសទាំងពីរ ក្នុងវិស័យដឹកជញ្ជូន និងការតភ្ជាប់ ដែល បានជំរុញឲ្យមានកំណើនទំហំពាណិជ្ជកម្មទ្វេភាគីនាពេលកន្លងមក។ ភាគីទាំងពីរក៏បានប្តេជ្ញាចិត្តដោះស្រាយរាល់បញ្ហាប្រឈម ដើម្បីសម្រួលការដឹកជញ្ជូន និងបន្តជំរុញទំហំពាណិជ្ជកម្ម រវាងប្រទេសទាំងពីរ ឲ្យកាន់តែកើនឡើងបន្ថែមទៀតនាពេលខាងមុខនេះ។ កិច្ចប្រជុំនេះ ក៏បានឯកភាពរួមគ្នាលើដំណោះស្រាយ មួយចំនួនដូចខាងក្រោម៖ (១) ធ្វើការសិក្សាលំអិតអំពីការបង្កើតតំបន់ត្រួតពិនិត្យរួមគ្នា CCA (Common Control Area) ការពង្រីកគម្លងចរាចរណ៍ និងលំហូររថយន្តឆ្លងកាត់នៅច្រកទ្វារព្រំដែន បាវិត-ម៉ុកបៃ(Bavet-Moc Bai) ដែលនឹងត្រូវស្នើសុំការឯកភាពពីប្រមុខរដ្ឋាភិបាលនៃប្រទេសទាំងពីរ (២) អាជ្ញាធរមានសមត្ថកិច្ចនៅច្រកព្រំដែននៃប្រទេសទាំងពីរ នឹងពិនិត្យលទ្ធភាពក្នុងការបង្កើនម៉ោងធ្វើការ ចាប់ពីម៉ោង ៦.០០ ព្រឹក ដល់ម៉ោង ១0.០០យប់ ដើម្បីសម្រួលចរាចរណ៍រថយន្តដឹកទំនិញឆ្លងកាត់ព្រំដែន (៣) ពិនិត្យលទ្ធភាពបង្កើនចំនួនកូតារថយន្តឆ្លងកាត់ប្រទេសទាំងពីរ ពី ៥០០ ទៅ ៨០០ (៤) ការសម្រួលដល់ភាគីកម្ពុជាក្នុងការដោះស្រាយបញ្ហាប្រឈម ដែលពាក់ព័ន្ធនឹងការបង្កើតសាខាតំណាងក្រុមហ៊ុន ដឹកជញ្ជូននៅប្រទេសវៀតណាម បញ្ហាធានារ៉ាប់រងក្នុងការដឹកជញ្ជូន និងការយកកម្រៃេសវាដឹកជញ្ជូនឆ្លងកាត់ប្រទេសវៀតណាម (Transit Fee) (៥) កិច្ចសហប្រតិបត្តិការបណ្តុះបណ្តាលមន្រ្តីក្រសួងសាធារណការ និងដឹកជញ្ជូនកម្ពុជា អំពីការអភិវឌ្ឍប្រព័ន្ធផ្លូវក្រោមដី (Subway) នៅទីក្រុងហូជីមិញ (៦) បន្តការផ្លាស់ប្តូរទស្សនកិច្ចទៅវិញទៅមករវាងគណៈប្រតិភូ នៃប្រទេសទាំងពីរ ដើម្បីពង្រឹងកិច្ចសហប្រតិបត្តិការលើវិស័យដឹកជញ្ជូន។ លើសពីនេះទៀត ភាគីទាំងពីរបាន ផ្លាស់ប្តូរពត៌មាន និងទស្សនៈវិស័យក្នុងការរៀបចំតភ្ជាប់ផ្លូវល្បឿនលឿនរវាងប្រទេសទាំងពីរ និងការតភ្ជាប់ផ្លូវរថភ្លើងភ្នំពេញ-ហូជីមិញផងដែរ។