ថ្ងៃអង្គារ ១៥រោច ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៦ ខែវិច្ឆិកា ឆ្នាំ២០១៩ នៅទីស្ដីការក្រសួង ឯកឧត្ដម ប៉ាល់ ចាន់តារ៉ា រដ្ឋលេខាធិការ នៃក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្ដមទេសរដ្ឋមន្ត្រី ស៊ុន ចាន់ថុល បានអញ្ជើញទទួលជួបសម្ដែងគារវកិច្ច និងផ្ដល់ពុទ្ធិបន្ថែមទាក់ទងនឹងវិស័យសាធារណការ និងដឹកជញ្ជូនដល់និស្សិតជ័យលាភីអាហារូបករណ៍កម្ពុជា ចំនួន១៦នាក់ មុនពេលចាកចេញទៅសិក្សានៅតាមបណ្ដាសាកលវិទ្យាល័យនានាក្នុងប្រទេសណូវែសេឡង់ ដោយមានការចូលរួមពីសំណាក់ថ្នាក់ដឹកនាំជាន់ខ្ពស់ក្រសួងផងដែរ។ ថ្លែងក្នុងជំនួបនោះ ឯកឧត្ដមរដ្ឋលេខាធិការបានជម្រាបដល់ក្រុមនិស្សិតជ័យលាភី ពីការរីកចម្រើនខាងវិស័យសាធារណការ និងដឹកជញ្ជូន ដោយរួមមានសមិទ្ធផលនានា គម្រោងកំពុងអនុវត្ត ដូចជា៖ គម្រោងផ្លូវល្បឿនលឿនភ្នំពេញ-ក្រុងព្រះសីហនុ គម្រោងពង្រីកនិងធ្វើទំនើបកម្មកំពង់ផែស្វយ័ត គម្រោងពង្រីកនិងលើកកម្ពស់ផ្លូវជាតិលេខ៥ ផ្លូវជាតិលេខ៣ ផ្លូវជាតិលេខ២ និងផ្លូវជាតិផ្សេងៗទៀត ព្រមទាំងគម្រោងដែលនឹងត្រូវអនុវត្តនាពេលអនាគត ដូចជា៖ គម្រោងផ្លូវល្បឿនលឿនភ្នំពេញ-បាវិត គម្រោងប្រព័ន្ធដឹកជញ្ជូនសាធារណៈក្នុងក្រុង គម្រោងផ្លូវរថភ្លើងភ្នំពេញ-បាវិត គម្រោងផ្លូវរថភ្លើងសៀមរាប-ប៉ោយប៉ែត និងគម្រោងអភិវឌ្ឍន៍ផ្លូវ ស្ពាន និងកំពង់ផែជាដើម។ ជាមួយគ្នានោះដែរ ឯកឧត្ដមរដ្ឋលេខាធិការ បានបន្តថា ក្រសួងសាធារណការ និងដឹកជញ្ជូនបានធ្វើកំណែទម្រង់ស៊ីជម្រៅលើសេវាសាធារណៈ តាមរយៈការប្រើប្រាស់យន្តការបច្ចេកវិទ្យាព័ត៌មានវិទ្យា ដើម្បីបង្ខិតសេវាសាធារណៈឱ្យជិតបងប្អូនប្រជាពលរដ្ឋ សំដៅឱ្យការផ្ដល់សេវាសាធារណៈ ប្រព្រឹត្តទៅបានលឿន ចំណាយតិច និងចំណេញពេលវេលា ស្របតាមប្រសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី “មន្ត្រី គឺខ្ញុំបម្រើរាស្ត្រ” ដូចនេះត្រូវបម្រើរាស្ត្រ ឱ្យបានលឿន ឱ្យមានប្រសិទ្ធភាព និងតម្លាភាព។ ឯកឧត្ដមរដ្ឋលេខាធិការ បានផ្ដាំផ្ញើឱ្យក្រុមនិស្សិតជ័យលាភីទាំងអស់ ខិតខំយកចិត្តទុកដាក់រៀនសូត្រ សិក្សាស្រាវជ្រាវ ពង្រីកទំនាក់ទំនងល្អ សហការសាមគ្គីរឹងមាំ ប្រព្រឹត្តតែអំពើល្អ និងប្រកាន់ឥរិយាបទថ្លៃថ្នូរ ជាពិសេសត្រូវចាំទុកថា និស្សិតម្នាក់គឺជារាជទូតម្នាក់របស់កម្ពុជា ក្នុងការផ្សព្វផ្សាយពីឯករាជ្យភាព សន្តិភាព ស្ថិរភាពនយោបាយ និងការអភិវឌ្ឍឥតឈប់ឈររបស់ប្រទេសទៅសកលលោក៕