រាជធានីភ្នំពេញ៖ ថ្ងៃពុធ ១០កើត ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៦ ខែវិច្ឆិកា ឆ្នាំ២០១៩ ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញពិសាអាហារថ្ងៃត្រង់ និងពិភាក្សាការងារពាក់ព័ន្ធនឹងកិច្ចសហប្រតិបត្តិការលើវិស័យហេដ្ឋារចនាសម្ព័ន្ធ និងកំពង់ផែ ជាមួយឯកឧត្ដមឧបការី រដ្ឋមន្ត្រីការបរទេសជប៉ុន ដោយមានការចូលរួមពីសំណាក់គណៈប្រតិភូអមដំណើរ និងថ្នាក់ដឹកនាំជាន់ខ្ពស់របស់ក្រសួងផងដែរ។ ក្នុងកិច្ចពិភាក្សានោះ ឯកឧត្ដមទេសរដ្ឋមន្ត្រីបានជម្រាបជូនឯកឧត្ដមឧបការី រដ្ឋមន្ត្រីការបរទេសជប៉ុន អំពីការរីកចម្រើននៃវិស័យហេដ្ឋារចនាសម្ព័ន្ធ និងកំពង់ផែ ក្រោមកិច្ចសហការខ្ពស់ពីភាគីជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ដូចជា៖ ការពង្រីកផ្លូវជាតិលេខ៥ ការសាងសង់និងធ្វើទំនើបកម្មកំពង់ផែស្វយ័តក្រុងព្រះសីហនុ ការអភិវឌ្ឍប្រព័ន្ធផ្លាស់ប្ដូរទិន្នន័យតាមអេឡិចត្រូនិកសម្រាប់នាវាចេញ/ចូលកំពង់ផែ (Port EDI) ការគ្រប់គ្រងចរាចរណ៍ក្នុងរាជធានីភ្នំពេញ និងគម្រោងជាច្រើនទៀត រួមទាំងការគាំទ្រក្នុងការតាក់តែងច្បាប់ និងបទប្បញ្ញត្តិនានាទាក់ទងនឹងវិស័យសាធារណការ និងដឹកជញ្ជូនផងដែរ។ ជាមួយគ្នានោះដែរ ឯកឧត្ដមទេសរដ្ឋមន្ត្រីបានមានប្រសាសន៍ថា ហេដ្ឋារចនាសម្ព័ន្ធដឹកជញ្ជូនដើរតួនាទីយ៉ាងសំខាន់ក្នុងការអភិវឌ្ឍ និងរក្សាកំណើនសេដ្ឋកិច្ចប្រកបដោយចីរភាព និងបានបន្តថា៖ ឆ្លើយតបទៅនឹងតម្រូវការនេះ កម្ពុជាបាន និងកំពុងរៀបចំផែនការមេអភិវឌ្ឍហេដ្ឋារចនាសម្ព័ន្ធ ផែនការមេកំពង់ផែ និងផែនការមេភស្តុភារកម្មជាដើម សំដៅអភិវឌ្ឍ និងធ្វើទំនើបកម្មហេដ្ឋារចនាសម្ព័ន្ធទាំងនោះឱ្យមានប្រសិទ្ធភាព និងស្របតាមកំណើនសេដ្ឋកិច្ចប្រចាំឆ្នាំរបស់ខ្លួន។ ឯកឧត្ដមទេសរដ្ឋមន្ត្រី បានបន្តទៀតថា៖ នៅដំណាក់ទីមួយនេះ រាជរដ្ឋាភិបាលនឹងស្ដារហេដ្ឋារចនាសម្ព័ន្ធក្នុងខេត្តព្រះសីហនុទាំងមូលឱ្យបានប្រសើរឡើងវិញ ព្រមទាំងសាងសង់ផ្លូវវាងក្រុងបន្ថែមទៀតដើម្បីកាត់បន្ថយការកកស្ទះនិងគ្រោះថ្នាក់ចរាចរណ៍ ជាពិសេស គឺផ្លូវសម្រាប់រថយន្តកុងតឺន័រ និងនៅដំណាក់កាលទីពីរ គឺជាការស្ដារហេដ្ឋារចនាសម្ព័ន្ធដឹកជញ្ជូននៅរាជធានីភ្នំពេញ។ ជាមួយគ្នានោះដែរ ឯកឧត្ដមឧបការី រដ្ឋមន្រ្តីការបរទេសជប៉ុន បានសម្ដែងនូវការកោតសរសើរយ៉ាងជ្រាលជ្រៅចំពោះការរីកចម្រើនយ៉ាងគំហុកលើគ្រប់វិស័យ ជាពិសេសវិស័យសាធារណការ និងដឹកជញ្ជូន ក្រោមការដឹកនាំដ៏ឈ្លាសវៃរបស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ព្រមទាំងការកោតសរសើរអំពីការគ្រប់គ្រង និងប្រើប្រាស់ប្រាក់កម្ចីប្រកបដោយប្រសិទ្ធភាពខ្ពស់ផងដែរ។ ឯកឧត្តមទេសរដ្ឋមន្ត្រីបានសម្ដែងអំណរគុណយ៉ាងជ្រាលជ្រៅចំពោះឯកឧត្ដមឧបការី រដ្ឋមន្ត្រីការបរទេសជប៉ុន ដែលបានចំណាយពេលវេលាដ៏មានតម្លៃចូលរួមក្នុងកិច្ចពិភាក្សានេះ ព្រមទាំងបានស្នើឱ្យបន្តនិងពង្រីកកិច្ចសហការនេះឱ្យកាន់តែទូលំទូលាយថែមទៀត។ លើសពីនេះទៅទៀត ឯកឧត្ដមទេសរដ្ឋមន្ត្រី បានអំពាវនាវឱ្យវិនិយោគិនជប៉ុនមកវិនិយោគនៅកម្ពុជាឱ្យបានច្រើនថែមទៀតព្រោះថា កម្ពុជាមានហេដ្ឋារចនាសម្ព័ន្ធដឹកជញ្ជូនកាន់តែប្រសើរ និងមានគោលនយោបាយអនុគ្រោះសម្រាប់វិនិយោគិនបរទេសផងដែរ ៕