[Rasmei News] - ស្ពានកៀនជ្រៃស្រុកកំពង់សៀមស្ថាបនាថ្មីឡើងវិញនៅរដូវប្រាំងឆ្នាំ២០២០
2019-11-01
Go to the website published Rasmei News
កំពង់សៀម:ក្រសួងអភិវឌ្ឍន៍ជនបទនឹងស្ថាបនាស្ពានបេតុងថ្មីឆ្លងកាត់ព្រែកកៀនជ្រៃ ស្រុកកំពង់សៀមជំនួសស្ពានបេតុងចាស់ដែលបាននិងកំពុងរងការវាយប្រហារបាក់ស្រុតដីច្រាំងព្រែកដ៏មានសក្តានុពលមួយនេះនៅក្នុងខែតុលា ឆ្នាំ២០១៩។
ប៉ុន្តែនៅក្នុងស្ថានភាពដ៏គ្រោះថ្នាក់នៃគ្រោះធម្មជាតិនេះអាជ្ញាធរបានសម្រេចផ្អាកចរាចរជាបណ្តោះសន្នឆ្លងកាត់ស្ពានដែលមានទទឹង៤ម៉ែត្រនិងបណ្តោយ៩០ម៉ែត្រទាំងស្រុងដើម្បីរៀបចំស្ថាបនាថ្មីដែលមានលក្ខណ:ធំទូលាយ និងប្រវែងវែងជាងមុន។
លោក អ៊ឹង វិសុទ្ធប្រធានមន្ទីរអភិវឌ្ឍន៍ជនបទខេត្តកំពង់ចាមបានប្រាប់កាសែតរស្មីកម្ពុជាកាលពីថ្ងៃទី ៣១តុលាថាខាងមន្ត្រីជំនាញរបស់ក្រសួងអភិវិឌ្ឍន៍ជនបទបានចុះមកពិនិត្យសិក្សាវាយតម្លៃលើស្ពានបេតុងចាស់មួយ កន្លែងស្ថិតក្នុងកៀនជ្រៃស្រុកកំពង់សៀមរួចហើយកាលពីថ្ងៃទី៣០ខែតុលាឆ្នាំ២០១៩ គឺជាលទ្ធផលសម្រេចសាងសង់ស្ពានបេតុងថ្មីឡើងវិញ។
លោកប្រធានមន្ទីរបានឱ្យដឹងទៀតថាដោយស្ថានភាពតួស្ពានកៀនជ្រៃនាពេលបច្ចុប្បន្នដែលមានទទឹង៤ម៉ែត្រនិងបណ្តោយ៩០ម៉ែត្របានរងការវាយប្រហារពីចរន្តទឹកហូរច្រេះបាក់ដី។គ្រឹះរបស់ស្ពានបណ្តាលឱ្យតួស្ពានមានកម្លាតពីគ្នាពី ប្រាំមួយ ទៅ ប្រាំពីរ ហ៊ុន គឺប្រឈមនឹងការបាក់ស្រុតទាំងអស់។ សំណូមពរឲ្យផ្អាតការធ្វើចរាចរ ជាបណ្តោះអាសន្ននូវការធ្វើដំណើរមធ្យោបាយគ្រប់ប្រភេទ។ ព្រោះស្ពានមានហិនិភ័យខ្ពស់ក្នុងការបាក់ស្រុត។
លោក វិសុទ្ធ បានបន្ថែមថា ដូច្នេះក្រសួងអភិវឌ្ឍន៍ជនបទ បានដាក់សំណើទៅខាងក្រសួងសេដ្ឋកិច្ច និងហិរញ្ញវត្ថុរួចហើយនឹងត្រូវរុះរើស្ពានចាស់នេះចោលហើយធ្វើការសាងសង់ស្ពានបេតុងថ្មីឡើងវិញនៅរដូវប្រាំងឆ្នាំ២០២០ខាងមុខនេះ។អ្នកស្រីអ៊ាចាន់ថុលមេឃុំកៀនជ្រៃបានឲ្យដឹងដែរថាស្ពានកៀនជ្រៃចាប់ផ្តើមបិទការធ្វើដំណើរឆ្លងកាត់ទាំងស្រុងតែម្តង។ដោយស្ពាននេះបច្ចុប្បន្នទ្រតែទម្ងន់តួស្ពានខ្លួនឯងស្ទើរមិនរួចផងទំនងនឹងត្រូវស្ថាបនាស្ពានថ្មីទំហំទទឹងធំជាងស្ពានចាស់ប្រាំមួយម៉ែត្រនិងបណ្តោយក៏វែងមុនដែរព្រោះដីមាត់ព្រែកបាក់ចូលជ្រៅ។
អ្នកស្រីមេឃុំបានបន្តថា ក្នុងនោះខាងអាជ្ញាធរបានស្រួលដល់ការធ្វើតាមផ្លូវវាង គឺសម្រាប់ថ្មើរជើង កង់ និងម៉ូតូ ធ្វើដំណើរតាមផ្លូវបណ្តោយមាត់ព្រែក ទៅឆ្លងស្ពានសង់ពីឈើនៅក្នុងវត្តកៀនជ្រៃក្នុង។ ចំណែករថយន្តគ្រប់ប្រភេទសូមអញ្ជើញបើកបរតាមផ្លូវលំបែកចេញពីផ្លូវជាតិលេខ៧ម្តុំទល់មុខរោងចក្រវាយនភ័ណ្ឌស្រុកកំពង់សៀមឆ្ពោះទៅកាន់ទំនប់ត្រួយចេកទំនប់កែប្រែធម្មជាតិទៅចេញភ្នំហាន់ជ័យ និងចេញទៅទឹកដីឃុំទួលព្រះឃ្លាំង ស្រុកស្ទឹងត្រង់ក៏បាន។
គួរបញ្ជាក់ថាស្ពានកៀនជ្រៃស្រុកកំពង់សៀមជាស្ពានបេតុងមួយក្នុងចំណោមស្ពានបេតុងជាច្រើនផ្សេងទៀតដែលរាជរដ្ឋាភិបាលបានស្ថាបនាសម្រាប់សម្រួលដល់ការធ្វើដំណើររបស់ប្រជាពលរដ្ឋឆ្លងកាត់ព្រែកប្រមាណជាង៦០ កន្លែងក្នុងខេត្តកំពង់ចាមភ្ជាប់ផ្លូវក្រាលកៅស៊ូតាមបណ្តោយដងទន្លេមេគង្គ៕
