[Post khmer] - បុរស ២ នាក់រងរបួសធ្ងន់ ដោយសារបើករថយន្តបុករថភ្លើងមួយទំហឹង
2019-10-23
Go to the website published Post khmer
ភ្នំពេញៈ យ៉ាងហោចណាស់មានបុរស ២ នាក់ បានរងរបួសធ្ងន់នៅក្នុងគ្រោះថ្នាក់ចរាចរណ៍ រថយន្តបុកគ្នាជាមួយរថភ្លើងកាលពីយប់រំលងអធ្រាត្រឈានចូលថ្ងៃទី ២១ ខែ តុលា ឆ្នាំ ២០១៩ នៅតាមបណ្ដោយផ្លូវហាណូយស្ថិតក្នុងសង្កាត់ទឹកថ្លា ខណ្ឌសែនសុខ។
លោក ទិន សុវណ្ណ ប្រធានផ្នែកនគរបាលចរាចរណ៍ខណ្ឌសែនសុខបានប្រាប់ភ្នំពេញប៉ុស្តិ៍ថា ជនរងគ្រោះត្រូវបានគេដឹកបញ្ជូនទៅកាន់មន្ទីរពេទ្យភ្លាមៗដើម្បីព្យាបាលរបួស ខណៈរថយន្តត្រូវបានក្រុមសមត្ថកិច្ចអូសយកទៅរក្សាទុកនៅការិយាល័យនគរបាលចរាចរណ៍ ដើម្បីរង់ចាំការដោះស្រាយនៅពេលក្រោយ។ ចំណែកភាគីខាងរថភ្លើងបានបន្តដំណើរទៅកាន់គោលដៅរបស់ខ្លួននៅក្រុងព្រះសីហនុ។
លោកបញ្ជាក់ថា៖ «យោងតាមសាក្សីនៅកន្លែងកើតហេតុ ករណីគ្រោះថ្នាក់ចរាចរណ៍នេះបង្កឡើងដោយជនរងគ្រោះដែលជាអ្នកបើកបរថយន្ត ខ្វះការប្រុងប្រយ័ត្ន»។
បើតាមលោក សុវណ្ណ នៅមុនពេលកើតហេតុ គេឃើញរថយន្តកូរ៉េមួយគ្រឿង ធ្វើដំណើរតាមបណ្ដោយផ្លូវហាណូយក្នុងទិសដៅពីត្បូងទៅជើង។ ដោយខ្វះការប្រុងប្រយ័ត្នពួកគេមិនបានបន្ថយល្បឿនឡើយ បើទោះជាអ្នកបើកបររថភ្លើងបានប្រឹងប្រែងបន្លឺស៊ីផ្លេជាច្រើនដងដើម្បីផ្ដល់ជាសញ្ញាក្ដី។
លុះមកដល់កន្លែងកើតហេតុរថយន្តរបស់ពួកគេក៏បានបុកទង្គិចជាមួយរថភ្លើងពេញមួយទំហឹង បណ្ដាលឲ្យរថយន្តរបស់ពួកគេខ្ទាតថយក្រោយ ហើយជ្រុលទៅបុកទង្គិចគូទរថយន្តពីរគ្រឿងផ្សេងទៀតដែលត្រូវបានគេចតទុកនៅក្នុងរបងផ្ទះរបស់គេបណ្ដាលឲ្យរងការខូចខាតយ៉ាងដំណំ។
ចំណែកពួកគេក៏រងរបួសយ៉ាងដំណំផងដែរដោយកៀបជើងជាប់ទៅនឹងកៅអីរថយន្ត ប៉ុន្តែសំណាងល្អត្រូវបានអ្នកភូមិ និងម្ចាស់រថយន្តរងគ្រោះ ២ ផ្សេងទៀតចេញមកជួយអន្តរាគមន៍ ដឹកនាំយកទៅមន្ទីរពេទ្យ ដើម្បីព្យាបាលរបួស។
លោកបានបន្តថាយ៉ាងណាក៏ដោយគេនៅមិនទាន់ដឹងអំពីអត្តសញ្ញាណជនរងគ្រោះទាំង ២ នាក់នោះនៅឡើយទេ ប៉ុន្តែកាលពីម្សិលមិញសាច់ញាតិរបស់ពួកគេបានចូលខ្លួនមកដោះស្រាយ ដើម្បីទទួលខុសត្រូវនៅក្នុងហេតុការណ៍គ្រោះថ្នាក់ដែលបានកើតឡើងនេះ។
លោក សុវណ្ណ បានឲ្យដឹងទៀតថាក្នុងរយៈពេលជិត ១០ ខែ ក្នុងឆ្នាំ ២០១៩ នេះនៅក្នុងខណ្ឌសែនសុខ មានគ្រោះថ្នាក់ចរាចរណ៍លើផ្លូវដែកបានកើតឡើងចំនួន ៤ ករណី ក្នុងនោះរថយន្តបុករថភ្លើងមាន ៣ ករណី និងរថភ្លើងបុកម៉ូតូកង់បី (Pass App) មួយករណី ប៉ុន្តែមិនបង្កឲ្យមានជនរងគ្រោះស្លាប់នោះទេ។
កាលពីម្សិលមិញលោក អ៊ុក អួក ប្រធាននាយកដ្ឋានផ្លូវដែកកម្ពុជាបានប្រាប់ភ្នំពេញប៉ុស្តិ៍ថា លោកមិនបានដឹងអំពីករណីគ្រោះថ្នាក់នោះទេ។ លោកបានបន្តថាជាទូទៅនៅពេលមានគ្រោះថ្នាក់តូចតាចកើតឡើងខាងភាគីក្រុមហ៊ុន Royal Railway បានព្យាយាមដោះស្រាយបញ្ចប់បញ្ហាជាមួយប្រជាពលរដ្ឋ ដោយមិនបង្កការលំបាកដល់ក្រសួង ឬស្ថាប័នរបស់លោកនោះទេ។
លោក អួក បានជំរុញឲ្យសាកសួរដោយផ្ទាល់ទៅខាងក្រុមហ៊ុន Royal Railway នៅពេលសាកសួរអំពីតួលេខនៃចំនួនជនរងគ្រោះដែលបង្កឡើងដោយគ្រោះថ្នាក់ចរាចរណ៍នៅលើផ្លូវដែក ខណៈដែលតំណាងក្រុមហ៊ុន Royal Railway មិនអាចទាក់ទងដើម្បីសុំការអធិប្បាយបានឡើយកាលពីថ្ងៃម្សិលមិញ៕
