AKP ភ្នំពេញ ថ្ងៃទី១៧ ខែតុលា ឆ្នាំ២០១៩ -- ដើម្បីចូលរួមកាត់បន្ថយគ្រោះថ្នាក់ចរាចរ នៅពេលកំពុងធ្វើការដំណើរក្រសួងសាធារណការ និងដឹកជញ្ជូនបានសហការជាមួយក្រុមហ៊ុនឯកជន ចែកមួកសុវត្ថិភាពចំនួន២០០ ក្នុងរយៈពេល២ថ្ងៃនៅកំណាត់ផ្លូវជាលេខ២ និងបន្តចែកនៅតាមបណ្តាខេត្តចំនួន៥ទៀត។ លោក ព្រំ វន្ថា ប្រធាននាយករដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ចំណុះក្រសួងសាធារណការ និងដឹកញ្ជូន បានលើកឡើងក្នុងពិធីអប់រំផ្សព្វផ្សាយច្បាប់ចរាចរណ៍ផ្លូវគោក ក្រោមប្រធានបទ «រួមគ្នាដើម្បីសុវត្ថិភាពចរាចរណ៍» នាព្រឹកថ្ងៃទី១៧ ខែតុលាឆ្នាំ ២០១៩ នៅកំណាត់ផ្លូវជាតិលេខ២សង្កាត់ចាត់អង្រែក្រោមថាយុទ្ធនាការថ្ងៃនេះដើម្បីពញ្ញាក់ស្មារតីដល់អ្នកប្រើ ប្រាស់ផ្លូវឱ្យចូលរួម គោរពច្បាប់ចរាចរណ៍ផ្លូវគោក ក្នុងនោះមានប្រើប្រាស់ ម៉ូតូ ត្រូវពាក់មួកសុវត្ថិភាពឱ្យបានគ្រប់គ្នា។ លោកបានបញ្ជាក់ថា «អ្នកស្លាប់ដែលប្រើប្រាស់ម៉ូតូមានជាង៧៥ភាគរយ ហើយអ្នកដែលមិនពាក់មួយសុវត្ថិភាពមានអត្រាខ្ពស់»។ លោកក៏បានឱ្យដឹងថា សម្រាប់យុទ្ធនាការមានរយៈពេលពេលពីរថ្ងៃ ចាប់ពី​ថ្ងៃទី១៧ ដល់ថ្ងៃទី១៨ ខែតុលា ធ្វើការចែកមួកសុវត្ថិភាពចំនួន២០០មួក។ សម្រាប់ថ្ងៃ១៧ ខែតុលានេះ ចំនួន១០០មួកហើយអ្នកដែលទទួលបានមួកត្រូវឆ្លើយ សំណួរមួយចំនួនទាក់ទងនឹងច្បាប់ចរាចរណ៍ផងដែរ ហើយសម្រាប់ថ្ងៃទី១៨ ខែតុលា នឹងចែកមួកសុវត្ថិភាព១០០មួកបន្ថែមទៀតផងដែរ។ លោក ព្រំ វន្ថា ក៏បានឱ្យដឹងថា សម្រាប់កិច្ចសហប្រតិបត្តិការជាមួយក្រុមហ៊ុនMichelin និងក្រុមហ៊ុន វើលដ៍ប្រ៊ីដ ក្រសួងសាធារណការ និងដឹកជញ្ជូននឹងធ្វើការផ្សព្វ ផ្សាយនៅទីតាំងចំនួន៥ទៀត នៅបណ្តារាជធានី ខេត្ត។ ដូចជានៅខេត្តកំពង់ចាម ខេត្តកំពង់ធំ ខេត្តសៀមរាប ខេត្តបាត់ដំបង និងរាជធានីភ្នំពេញក្នុងឆ្នាំ២០១៩នេះ ហើយ សម្រាប់គម្រោង នៅឆ្នាំ២០២០នឹងធ្វើនៅ៥ខេត្តទៀត។ ជាមួយគ្នានោះដែរលោក​ ព្រំ វន្ថា ក៏បានអះអាងក្រសួងនឹងបន្តធ្វើការចែកមួកសុវត្ថិភាពបន្តទៀត ជាក់ស្តែងនោះក្រសួងបានចុះត្ថលេខាទទួលមួកសុវត្ថិភាព២០០០(ពីរពាន់) មួកពី Michelin និងវើលដ៍ប្រ៊ីដ ក្នុងរយៈពេល២ឆ្នាំ ដោយនៅឆ្នាំ២០១៩ ចំនួន១០០០ (មួយពាន់) មួក និងឆ្នាំ២០២០ ចំនួន១០០០ (មួយពាន់)មួក។ លោកក៏បានឱ្យដឹងថា ដោយមានការជួយពីក្រុមហ៊ុនឯកជនមួយចំនួននោះរហូតមកដល់ពេលនេះក្រសួងសាធារណការបានចែកមួកចំនួន៨០.០០០ (ប្រាំបីម៉ឺន) មួក ហើយជាគោលគោការណ៍នឹងធ្វើការចែកមួកដល់លើសពី១០០.០០០ (ដប់ម៉ឺន)មួក ។ ក្នុងឱកាសនោះដែរលោក ព្រំ វន្ថា ក៏បានអំពាវនាវដល់ប្រជាពលរដ្ឋទាំងអស់ថានៅ ពេលប្រើប្រាស់ផ្លូវសូមចូលរួមគោរពច្បាប់ចរាចរណ៍ផ្លូវគោក។ ត្រូវពាក់មួកសុវត្ថិភាពហើយត្រូវពាក់ខ្សែចង្កាឱ្យត្រឹមត្រូវ។ ដោយឡែកអ្នកបើកបររថយន្តត្រូវពាក់ខ្សែក្រវាត់ឱ្យបានត្រឹមត្រូវ ហើយ កុំពិសាគ្រឿងស្រវឹង និងគោរពច្បាប់ចរាចរណ៍ឱ្យបានគ្រប់គ្នា ដើម្បីរួមជាមួយរដ្ឋាភិបាល ក្នុងការកាត់បន្ថយគ្រោះថ្នាក់ចរាចរឱ្យមកនៅទាបបំផុត។ ចំណែកលោក JAIPEICH CHEVAPHA IRAKUL នាយកគ្រប់គ្រងក្រុមហ៊ុន Muchelin ប្រចាំប្រទេសថៃ បានលើកឡើងថា មូលហេតុដែលក្រុមហ៊ុនរបស់លោកសហការជាមួយរាជរដ្ឋាភិបាល ក៏ដូចជាក្រសួងសាធារណការនេះ គឺផ្តោតសំខាន់លើក សុវត្ថិភាពផ្លូវគោកនៅពេលបើកបរ។ សុវត្ថិភាពយានយន្តដែលកំពុងបើកបរលើដងផ្លូវ ដូចជាម៉ូតូ និងឡាន ដើម្បីមានសុវត្ថិភាពទាំងអស់គ្នា។ ជាមួយគ្នានោះដែរលោកក៏បានលើកឡើងក្រុមហ៊ុនលោក នឹងបន្តធ្វើការសិក្សាជាមួយក្រសួងសាធារណការ ដើម្បីធ្វើយុទ្ធនាការផ្សព្វផ្សាយច្បាប់ចរាចរណ៍ និងចែកមួយកសុវត្ថិភាព ដូច ថ្ងៃនេះយោងតាមរបាយការណ៍ប្រព័ន្ធព័ត៌មាន ជនរងគ្រោះ និងគ្រោះថ្នាក់ចរាចរណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថាក្នុង១ថ្ងៃ ជាមធ្យម អ្នកស្លាប់ ដោយសារគ្រោះថ្នាក់ចរាចរមានចំនួន ៥នាក់ និងអ្នករបួសចំនួន ១៣នាក់។ អ្នកស្លាប់ ដោយសារគ្រោះថ្នាក់ចរាចរភាគច្រើន គឺជាអ្នកប្រើប្រាស់ទោចក្រយានយន្ត និងខ្ពស់ជាងគេនៅក្នុងរាជធានីភ្នំពេញ។ មូលហេតុ ដែលបង្កឱ្យមានអ្នកស្លាប់ ភាគច្រើនគឺបង្កមកពីការមិនគោរពច្បាប់ចរាចរណ៍ ដូចជា ការបើកបើរលើសល្បឿនកំណត់ ការជែងគ្នាក្នុងស្ថានភាពគ្រោះថ្នាក់ ការមិនគោរពសិទ្ធិអាទិភាព ការបើកបរក្នុងស្ថានភាពស្រវឹងជាដើម៕