ថ្ងៃសុក្រ ០៥រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែតុលា ឆ្នាំ២០១៩ ក្រុមការងារ ស.ស.យ.ក ក្នុងវិស័យសាធារណការ និងដឹកជញ្ជូន ដែលដឹកនាំដោយ ប្រធានក្រុមការងារ ស.ស.យ.ក វិស័យសាធារណការ និងដឹកជញ្ជូន បានបើកកិច្ចកិច្ចប្រជុំពិភាក្សាការងារបច្ចុប្បន្នភាពសមាជិក ការរៀបចំបូកសរុបរបាយការណ៍ប្រចាំឆ្នាំ ទិសដៅបន្ត និងត្រៀមរៀបចំដំណើរទស្សនកិច្ចទៅខេត្តមណ្ឌលគិរី របស់ក្រុមការងារ សសយក វិស័យសាធារណការ និងដឹកជញ្ជូន ព្រមទាំងបញ្ហាផ្សេងៗមួយចំនួនទៀត ។ កិច្ចប្រជុំនេះបានផ្តោតសំខាន់ទៅលើការរៀបចំផែនការរួម របៀបវារៈនៃយុទ្ធនាការ លទ្ធផលរំពឹងទុក និងបំណែងចែកភារកិច្ចការងារសម្រាប់ក្រុមការងារពាក់ព័ន្ធនីមួយៗ ព្រមទាំងការបញ្ចូលសមាជិកថ្មី ដែលមានបំណងចូលរួមជាមួយ ស.ស.យ.ក និងមានឆន្ទៈក្នុងការងារបម្រើដល់ផលប្រយោជន៍សង្គមជាមួយគ្នា ។ ឯកឧត្តមប្រធាន បានលើកឡើងពីយុទ្ធនាការបន្តតាមរយៈការត្រៀមរៀបចំដំណើរទស្សនកិច្ចទៅខេត្តមណ្ឌលគិរី ដោយក្នុងនោះយើងមិនគ្រាន់តែជួយផ្សព្វផ្សាយពង្រឹងសុវត្ថិភាពចរាចរណ៍ និងបរិស្ថានប៉ុណ្ណោះទេ ថែមទាំងជំរុញស្មារតីឲ្យសមាជិក ស.ស.យ.ក ក្នុងវិស័យសាធារណការ និងដឹកជញ្ជូន អាជ្ញាធរមូលដ្ឋាន និងប្រជាពលរដ្ឋគ្រប់រូបមានស្មារតីសាមគ្គីភាពក្នុងកិច្ចការសង្គម ចេះចូលរួមការពារបរិស្ថានជុំវិញខ្លួន និងគោរពច្បាប់ ដើម្បីសុវត្ថិភាពខ្លួនផ្ទាល់ និងអ្នកធ្វើដំណើរតាមដងផ្លូវឯទៀត ។ លើសពីនេះទៅទៀតក្រុមការងារ ស.ស.យ.ក វិស័យសាធារណការ និងដឹកជញ្ជូន នឹងចូលរួមជាមួយសហភាពសហព័ន្ធយុវជនកម្ពុជា (ស.ស.យ.ក) ក្នុងការប្រកួតកីឡាបាល់ទាត់ពានរង្វាន់ “មិត្តភាពយុវជនអន្តរក្រសួង-ស្ថាប័ន” លើកទី៧ ឆ្នាំ២០១៩ ដែលនឹងចាប់ផ្តើមនៅថ្ងៃទី ១៤ ធ្នូ ២០១៩ រហូតដល់ថ្ងៃទី ២៩ កុម្ភៈ ២០២០ ដោយគោលបំណងសំខាន់គឺបង្កើនស្មារតីសាមគ្គីភាព មិត្តភាព ពង្រឹងនិងពង្រីកកិច្ចសហប្រតិបត្តការរវាងយុវជននៅតាមក្រសួង និងស្ថាប័នរដ្ឋ និងបំផុសចលនាស្រលាញ់និងចូលចិត្តលេងកីឡាដើម្បីសុខភាព