ថ្ងៃព្រហស្បតិ៍-សុក្រ ០៤-០៥រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧-១៨ ខែតុលា ឆ្នាំ២០១៩ ឯកឧត្តម អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីបើកសិក្ខាសាលាថ្នាក់ជាតិស្តីពី៖ សេចក្តីព្រាងច្បាប់កំពង់ផែ ដែលបានប្រព្រឹត្តទៅនៅសណ្ឋាគារភ្នំពេញ ដោយមានការចូលរួមពីតំណាងក្រសួង ស្ថាប័ន មន្ទីរសាធារណការ និងដឹកជញ្ជូនរាជធានី-ខេត្ត កំពង់ផែស្វយ័តភ្នំពេញ កំពង់ផែស្វយ័តក្រុងព្រះសីហនុ និងក្រុមហ៊ុនកំពង់ផែឯកជនប្រមាណ១១០នាក់។ សិក្ខាសាលានេះ ត្រូវបានរៀបចំឡើងដោយក្រសួងសាធារណការ និងដឹកជញ្ជូន សហការជាមួយទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA ក្នុងគោលបំណងដើម្បីទទួលបាននៅធាតុចូលដើម្បីបំពេញបន្ថែម និងធ្វើឱ្យសេចក្តីព្រាងច្បាប់កំពង់ផែកាន់តែល្អប្រសើរនៅពេលអនុវត្ត។ សិក្ខាសាលាថ្នាក់ជាតិនេះ មានការចូលរួមធ្វើបទបង្ហាញពី ឯកឧត្តម ចាន់ តារា អនុរដ្ឋលេខាធិការក្រសួងសាធារណការ និងដឹកជញ្ជូន ដោយបានពន្យល់លម្អិតលើសេចក្តីព្រាងច្បាប់កំពង់ផែ និងមានការពិភាក្សាជាក្រុមតូចៗក្នុងគោលដៅដើម្បីពិភាក្សាផ្លាស់ប្តូរយោបល់រវាងក្រសួង ស្ថាប័ន និងក្រុមហ៊ុនកំពង់ផែឯកជនផ្សេងៗ ក៏ដូចជាដើម្បីប្រមូលធាតុចូលគ្រប់ភាគីពាក់ព័ន្ធ។ លោកតូម៉ូហ៊ីរ៉ុ ខាណាតាក តំណាងស្ថានទូតជប៉ុនប្រចាំព្រះរាជាណាចក្រកម្ពុជា បានបង្ហាញចំណាប់អារម្មណ៍ថា៖ ការជំរុញក្នុងការបង្កើតបទដ្ឋានគតិយុត្តិជាពិសេសច្បាប់ស្តីពីកំពង់ផែ គឺពិតជាមានសារៈសំខាន់ក្នុងការអភិវឌ្ឍកំពង់ផែនៅកម្ពុជាកាន់តែប្រសើរ។ ជាមួយគ្នានេះផងដែរ អ្នកតំណាងជាន់ខ្ពស់ទីភ្នាក់ងារសហប្រតិបត្តិការអន្តរជាតិជប៉ុនប្រចាំនៅកម្ពុជា បានបង្ហាញការជឿជាក់ថា៖ ច្បាប់ស្តីពីកំពង់ផែពិតជាមានសារៈសំខាន់ ក្នុងការអភិវឌ្ឍកំពង់ផែនៅកម្ពុជា ប្រកបដោយចីរភាព ហើយទីភ្នាក់ងារJICA សង្ឃឹមថា៖ សេចក្តីព្រាងច្បាប់ស្តីពីកំពង់ផែ និងអនុម័តដោយរាជរដ្ឋាភិបាលកម្ពុជា នៅពេលឆាប់ៗខាងមុខនេះ។ ថ្លែងក្នុងសន្ទរកថាបើក ឯកឧត្តមរដ្ឋលេខាធិការ បានគូសបញ្ជាក់អំពីសារសំខាន់នៃវិស័យកំពង់ផែក្នុងការជំរុញវិស័យពាណិជ្ជកម្មគ្រប់ប្រភេទ និងដំណើរអភិវឌ្ឍន៍សេដ្ឋកិច្ចជាតិ និងអន្ដរជាតិ និងបានបន្ថែមថា៖ កម្ពុជាបានទទួលការវិនិយោគជាបន្តបន្ទាប់ពីដៃគូអភិវឌ្ឍន៍នានាក្នុងវិស័យកំពង់ផែ ដែលធ្វើឲ្យវិស័យនេះទទួលបាននូវការអភិវឌ្ឍគួរជាទីមោទនៈ។ ឯកឧត្តមរដ្ឋលេខាធិការ ក៏បានជំរុញលើកទឹកចិត្តឱ្យអ្នកចូលរួមពីស្ថាប័ន និងអង្គភាពពាក់ព័ន្ធទាំងអស់ មេត្តាយកចិត្តទុកដាក់សិក្សាស្វែងយល់ ការពិភាក្សាជាក្រុម និងផ្តល់ជាមតិយោបល់កែលម្អសេចក្តីព្រាងច្បាប់ស្តីពីកំពង់ផែឲ្យកាន់តែល្អប្រសើរដើម្បីយកមកអនុវត្តក្នុងការបម្រើជាប្រយោជន៍ជូនប្រទេសជាតិ ៕