ថ្ងៃអង្គារ ១០កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្វនឹងថ្ងៃទី០៨ ខែតុលា ឆ្នាំ២០១៩ នៅទីស្ដីការក្រសួង ឯកឧត្ដម លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្ដីពីការរៀបចំបញ្ជីសារពើភ័ណ្ឌផ្លូវថ្នល់ ដោយមានការចូលរួមពីថ្នាក់ដឹកនាំ និងមន្ត្រីជំនាញទាំងថ្នាក់ជាតិ និងថ្នាក់ក្រោមជាតិ។ កិច្ចប្រជុំនេះធ្វើឡើងក្នុងគោលបំណងរៀបចំធ្វើបច្ចុប្បន្នភាពបញ្ជីសារពើភ័ណ្ឌផ្លូវថ្នល់ ការគូផែនទីបណ្ដាញផ្លូវថ្នល់ទាំងអស់នៅក្នុងព្រះរាជាណាចក្រកម្ពុជាក្រោមដែនសមត្ថកិច្ចរបស់ក្រសួងសាធារណការ និងដឹកជញ្ជូន និងការគ្រប់គ្រងដីចំណីផ្លូវទាំងនៅក្នុងទីប្រជុំជន និងក្រៅទីប្រជុំជន។ ថ្លែងនៅក្នុងកិច្ចប្រជុំ ឯកឧត្ដមរដ្ឋលេខាធិការបានមានប្រសាសន៍ថា៖ យើងត្រូវតែធ្វើបច្ចុប្បន្នភាពបញ្ជីសារពើភ័ណ្ឌផ្លូវថ្នល់៦ខែម្ដង គឺនៅខែមិថុនា និងខែធ្នូជារៀងរាល់ឆ្នាំ ព្រមទាំងគូផែនទីផ្លូវដោយភ្ជាប់នូវព័ត៌មានភូមិសាស្ត្រនៅជុំវិញផ្លូវថ្នល់ ដោយប្រើវិធីគូធម្មតា និងបន្តបន្ទាប់ប្រើប្រាស់ប្រព័ន្ធ PSS ដើម្បីផ្ដល់ភាពងាយស្រួលក្នុងការគ្រប់គ្រង សាងសង់ ជួសជុល ថែទាំ ពង្រីក និងលើកកម្ពស់គុណភាពផ្លូវជាដើម ដែលកិច្ចការទាំងនេះគឺជាទំនួលខុសត្រូវរបស់នាយកដ្ឋានផ្លូវថ្នល់។ ទន្ទឹមនឹងការធ្វើបច្ចុប្បន្នភាពបញ្ជីសារពើភ័ណ្ឌផ្លូវថ្នល់ ឯកឧត្ដមរដ្ឋលេខាធិការបានបន្តថា៖ ការគ្រប់គ្រងដីចំណីផ្លូវទាំងក្នុង និងក្រៅទីប្រជុំជនគឺត្រូវតែអនុវត្តឱ្យបានម៉ឺងម៉ាត់ដោយសហការជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ និងអនុវត្តច្បាប់ និងបទបញ្ញត្តិនានាដែលចេញដោយរាជរដ្ឋាភិបាលកម្ពុជា ដើម្បីរក្សាបាននូវស្ថិរភាព សុវត្ថិភាព និងសោភណ្ឌភាពផ្លូវថ្នល់ ដែលជាចំណុចទាក់ទាញភ្ញៀវទេសចរ និងវិនិយោគិនបរទេស ជាពិសេសកាត់បន្ថយការកកស្ទះ និងគ្រោះថ្នាក់ចរាចរណ៍ ស្របតាមប្រសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ថ្ងៃនេះ ថ្ងៃស្អែក សូមកុំឱ្យមានគ្រោះថ្នាក់ចរាចរណ៍។ ឯកឧត្ដមរដ្ឋលេខាធិការ បានសង្កត់ធ្ងន់ថា ក្រសួងបាន និងកំពុងសហការជាមួយក្រសួងស្ថាប័នពាក់ព័ន្ធដើម្បីបង្កើតមន្ត្រីអធិការកិច្ចផ្លូវថ្នល់ ដែលមានដែនសមត្ថកិច្ចដូចប៉ូលិសយុត្តិធម៌ ដើម្បីចាប់បង្ខំការអនុវត្តច្បាប់ផ្លូវថ្នល់ និងបទបញ្ញត្តិនានាទាក់ទងនឹងផ្លូវថ្នល់ សំដៅរក្សាឱ្យបាននូវស្ថិរភាព សុវត្ថិភាព និងសោភណ្ឌភាពផ្លូវថ្នល់ទាំងអស់នៅក្នុងព្រះរាជាណាចក្រកម្ពុជា ៕