ក្រុមហ៊ុនចិន CRCC 17​th គ្រោង​សាងសង់​ផ្លូវ​រថភ្លើង​តភ្ជាប់​ពី ភ្នំពេញ-សៀមរាប-ស៊ីសុផុន បន្ទាប់ពី​ក្រុមហ៊ុន​នេះ បាន​ចំណាយ​ពេល​សិក្សា​អស់​រយៈពេល​ជិត ៦ខែ​កន្លង​មក។​ លោក Lu Peng ប្រធាន​ក្រុមប្រឹក្សាភិបាល​នៃ​ក្រុមហ៊ុន CRCC 17​th បាន​ដឹកនាំ​គណៈ​ប្រតិភូ​រួម​ជាមួយ​លោក​ឧកញ៉ា គិត ម៉េង ប្រធាន​ក្រុមហ៊ុន Royal Group និងជា​ប្រធាន​សភាពាណិជ្ជកម្ម​កម្ពុជា បាន​ចូលជួប​ពិភាក្សា​ការងារ​ជាមួយ​លោក ស៊ុន ចាន់ថុល រដ្ឋមន្រ្តី​ក្រសួង​សាធារណការ និង​ដឹកជញ្ជូន កាលពី​ថ្ងៃទី២១​វិច្ឆិកា​ម្សិលមិញ។ គណៈ​ប្រតិភូ​បាន​បង្ហាញ​ជូនលោក ស៊ុន ចាន់ថុល នូវ​លទ្ធផល​នៃ​ការ​សិក្សា​បឋម​ពី​លទ្ធភាព​ក្នុងការ​សាងសង់​ផ្លូវ​រថភ្លើង ភ្នំពេញ-សៀមរាប-ស៊ីសុផុន ដែល​ក្រុមហ៊ុន​បាន​ចំណាយ​ពេល​ជិត​កន្លះ​ឆ្នាំ ក្នុង​នោះ លោក Lu Peng ក៏បាន​ស្នើសុំ​ការ​គាំទ្រ​ពី​លោក​រដ្ឋមន្ត្រី ក៏​ដូចជា​រាជ​រដ្ឋាភិបាល​កម្ពុជា​លើ​គម្រោង​វិនិយោគ​ផ្លូវ​រថភ្លើង​ថ្មី​នេះ។ លោក ស៊ុន ចាន់ថុល បាន​គូស​បញ្ជាក់​ពី​ការ​គាំទ្រ​លើ​គម្រោង​ដែលមាន​សារៈសំខាន់​នេះ សំដៅ បង្ក​ភាព​ងាយស្រួល​ដល់ការ​ដឹក​ជញ្ជូន​ និង​ការ​តភ្ជាប់ និង​ជំរុញ​ការ​អភិវឌ្ឍ​វិស័យ​ផ្លូវដែក​នៅ​កម្ពុជា​ផងដែរ។ លោក​ក៏បាន​ស្នើឱ្យ​ក្រុមហ៊ុន​នេះ​ពិនិត្យ និង​សិក្សា​បន្ថែម​ទៀត​ពី​លទ្ធភាព​ក្នុងការ​បណ្តាក់​ទុន​វិនិយោគ​លើ​គម្រោង​ផ្លូវដែក​នៅ​កម្ពុជា​តាម​របៀប BOT (Build Operation Transfer) និង​លើក សំណើ​មកវិញ​ពី​តម្រូវការ​នានា​សម្រាប់​កិច្ច​សហ​ប្រតិបត្តិការ​រវាង​ក្រុមហ៊ុន​ឯកជន CRCC 17th និង​រាជ​រដ្ឋាភិបាល​កម្ពុជា​លើ​គម្រោង​វិនិយោគ​នេះ៕