ថ្ងៃចន្ទ ៤កើត ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០២ ខែកញ្ញា ឆ្នាំ២០១៩ នៅសាលាខេត្តត្បូងឃ្មុំ ឯកឧត្ដម ស៊ុយ សាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីប្រកាសសុពលភាពចូលកាន់មុខតំណែងប្រធានមន្ទីរថ្មី នៃមន្ទីរសាធារណការ និងដឹកជញ្ជូន ខេត្តត្បូងឃ្មុំ ដោយមានការចូលរួមពីសំណាក់ថ្នាក់ដឹកនាំក្រសួង ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលនៃគណៈអភិបាលខេត្តត្បូងឃ្មុំ ថ្នាក់ដឹកនាំនៃមន្ទីរពាក់ព័ន្ធជុំវិញខេត្ត និងមន្ត្រីរាជការនៃមន្ទីរសាធារណការ និងដឹកជញ្ជូន សរុបទាំងអស់ប្រមាណ៣០០នាក់។ ការតែងតាំងប្រធានមន្ទីរថ្មីនេះគឺឡើងដើម្បីជំនួសប្រធានមន្ទីរចាស់ គឺ លោក គី វិរិន្ទ ដែលលោកត្រូវបានតែងតាំងជាប្រធានមន្ទីរសាធារណការ និងដឹកជញ្ជូនខេត្តសៀមរាបកាលពីខែសីហាកន្លងមក។ ឯកឧត្ដមរដ្ឋលេខាធិការ បានកោតសរសើរ និងថ្លែងអំណរគុណយ៉ាងជ្រាលជ្រៅចំពោះលោក គី វីរិន្ទ ប្រធានមន្ទីរចាស់ ដែលបានខិតខំប្រឹងប្រែងបំពេញការងារលើវិស័យសាធារណការ និងដឹកជញ្ជូនក្នុងខេត្តនេះ ឱ្យមានការរីកចម្រើន ព្រមទាំងមានចំណងសាមគ្គីភាពដ៏ជិតស្និទ្ធរវាងមន្ត្រីនិងថ្នាក់ដឹកនាំ ក៏ដូចជា ទំនាក់ទំនងល្អជាមួយមន្ទីរ អង្គភាពជុំវិញខេត្ត ជាពិសេសកិច្ចសហការយ៉ាងស្អិតរមួតជាមួយរដ្ឋបាលខេត្ត សំដៅអភិវឌ្ឍហេដ្ឋារចនាសម្ព័ន្ធដឹកជញ្ជូន និងលើកកម្ពស់គុណភាពសេវាសាធារណៈ។ ជាមួយគ្នានោះដែរ ឯកឧត្ដមរដ្ឋលេខាធិការក៏បានផ្ដាំផ្ញើ លោក គី ដាណារិទ្ធ ដែលជាប្រធានមន្ទីរថ្មីខិតខំបំពេញការងារឱ្យអស់ពីកម្លាំងកាយ កម្លាំងចិត្ត និងពេលវេលា ដើម្បីបន្តដឹកនាំមន្ទីរសាធារណការ និងដឹកជញ្ជូនឱ្យមានការរីកចម្រើនទាំងវិស័យសាធារណការ និងវិស័យដឹកជញ្ជូន ព្រមទាំងបន្ត និងរក្សានូវវប្បធម៌សហការ ចែករំលែក រួមសុខរួមទុក្ខ ជាមួយមន្ត្រីក្រោមឱវាទ ជាពិសេសត្រូវចងចាំ និងអនុវត្តឱ្យបានដាច់ខាតនូវគោលការណ៍ទាំង១១ចំណុចរបស់សម្ដេចតេជោនាយករដ្ឋមន្ត្រី។ ឆ្លើយតបចំពោះក្រសួងនិងរដ្ឋបាលខេត្តដែលបានផ្ដល់សេចក្ដីទុកចិត្ត និងការតែងតាំងនេះ លោក គី ដាណារិទ្ធ បានប្ដេជ្ញាបន្តអភិវឌ្ឍហេដ្ឋារចនាសម្ព័ន្ធដឹកជញ្ជូន និងសេវាសាធារណៈខេត្តនេះឱ្យរីកចម្រើនថែមទៀតដោយប្រើឱ្យអស់ពីកម្លាំងកាយ ចិត្ត និងពេលវេលាដោយប្រើគ្រប់មធ្យោបាយ និងនីតិវិធី បន្តកិច្ចសហការជាមួយមន្ទីរអង្គភាពជុំវិញខេត្តយ៉ាងស្អិតរមួត ក្នុងគោលបំណងតែមួយគត់គឺការអភិវឌ្ឍ ត្រងត្រាប់និងអនុវត្តនូវរាល់ភារកិច្ចដែលរដ្ឋបាលខេត្ត ក៏ដូចជាក្រសួងដាក់ជូន អនុវត្តនូវរាល់បទបញ្ញត្តិដែលក្រសួងដាក់ជូន ជាពិសេសគោលការណ៍ទាំង១១ចំណុចរបស់សម្ដេចតេជោនាយករដ្ឋមន្ត្រី៕