មានការភ្ញាក់ផ្អើលយ៉ាងខ្លាំង ដោយសាតែមានរថយន្តស៊េរីទំនើបៗលួចនាំចូលអត់ពន្ធប្រមាណជា ៥០០ គ្រឿង ត្រូវបានកម្លាំងគយ និង រដ្ឋាកររកឃើញ និង រឹបអូសពីក្នុងឃ្លាំងក្នុងរាជធានីភ្នំពេញ ។ បើតាមការចេញផ្សាយរបស់ក្រសួងសាធារណការ និង ដឹកជញ្ជូនបានឱ្យដឹងថា ការចាប់បានរថយន្តអត់ពន្ធទាំងនេះ គឺជាជោគជ័យនៃកិច្ចសហការគ្នារវាងគយ និង រដ្ឋាករកម្ពុជា ជាមួយក្រសួងសាធារណការ និង ដឹកជញ្ជូន ដោយបានតភ្ជាប់ប្រព័ន្ធស្វ័យប្រវត្តិកម្មដឹកជញ្ជូនផ្លូវគោក និង ប្រព័ន្ធស្វ័យប្រវត្តិកម្មទិន្នន័យគយ ។ យោងតាមក្រសួងសាធារណការ និង ដឹកជញ្ជូនបានបញ្ជាក់កាលពី ថ្ងៃទី ២៣ ខែសីហា ឆ្នាំ ២០១៩ ថា ជាមួយនឹងគំនិតផ្តួចផ្តើមដឹកនាំដោយទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន បានសហការជាមួយអគ្គនាយកដ្ឋានគយ និង រដ្ឋាករកម្ពុជា ក្រោមការជ្រោមជ្រែងពីអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ បានបង្កើតក្រុមការងារអន្តរក្រសួងមួយដើម្បីធ្វើការងារនេះ ។ ជាមួយនឹងកិច្ចសហការដ៏ល្អរវាងស្ថាប័នទាំងពីរបានផ្តល់នូវលទ្ធផលជាវិជ្ជមានជាច្រើន ដូចជាការចុះបញ្ជីយានយន្តមានរយៈពេលខ្លីរហ័ស ធានាមិនមានការក្លែងបន្លំឯកសារសាធារណៈ ដែលអាចគេចផុតពីភ្នែកសមត្ថកិច្ច ទប់ស្កាត់ និង ចាប់រថយន្តមិនបង់ពន្ធនាំចូល បង្កើនប្រសិទ្ធភាពការអនុវត្តការប្រមូលពន្ធនាំចូលយានយន្ត និង បង្កើនចំណូលថវិកាជាតិ។ តាមរយៈកិច្ចសហការនេះ បានចូលរួមធ្វើឱ្យចំណូលពន្ធនាំចូលយានយន្ត មានការកើនឡើង ។ ដើម្បីបង្កើនកិច្ចសហប្រតិបត្តិការនេះឱ្យកាន់តែមានប្រសិទ្ធភាពថែមទៀតនោះ ចាប់ថ្ងៃទី២១ ខែសីហា ឆ្នាំ២០១៩ មក ក្រុមការងារអន្តរក្រសួងនេះ បានចុះពិនិត្យជាក់ស្តែង ចំពោះរថយន្តមានភាពមិនប្រក្រតី ដែលមន្ដ្រីគយ និង រដ្ឋាករមានសមត្ថកិច្ចបានឃាត់ទុកនៅឃ្លាំងគយបណ្តោយមហាវិថីឈ្នះឈ្នះ។ ការចុះពិនិត្យរថយន្តជាក់ស្តែងនាពេលនោះ ត្រូវបានធ្វើឡើងក្នុងគោលបំណងដើម្បីវាយតម្លៃលើភាពមិនប្រក្រតីនៃរថយន្តគ្មានបង្កាន់ដៃពន្ធនាំចូល មិនមានស្លាកលេខ ពាក់ស្លាកលេខក្លែងក្លាយ ពាក់ស្លាកលេខបានពីផលចោរកម្ម រថយន្តកាត់ត និង មានបញ្ហាលេខតួ លេខម៉ាស៊ីន ម៉ូដែល និងឆ្នាំផលិត និងទ្រង់ទ្រាយផ្សេងជាដើម ដែលបានរកឃើញរថយន្តល្មើសច្បាប់ជាង ៥០០ គ្រឿង ៕