ភ្នំពេញ៖ បន្ទាប់ពីមានមតិរិះគន់និងការព្រមានពីលោកស៊ុនចាន់ថុលទេសរដ្ឋមន្រ្តីរដុ្ឋមន្រ្តីក្រសួងសាធារណការនិងដឹកជញ្ជូន លោកChoi Young Sunប្រធានក្រុមហ៊ុនកូរ៉េ បានចេញមុខទទួលស្គាល់ថា ផ្នែកខ្លះនៃកំណាត់ផ្លូវជាតិលេខ២១ ពិតជាសាងសង់មិនស្របតាមលក្ខណៈបច្ចេកទេសនិងយល់ព្រមដោះស្រាយអនុវត្តផែនការជួសជុលឡើងវិញ។ សូមរំលឹកថាកាលពីពេលថ្មីៗនេះក្រសួងបានរកឃើញផ្លូវខូចគុណភាព និងឲ្យក្រុមហ៊ុនសាងសង់ផ្លូវជួសជុលឡើងវិញលើផ្លូវមួយចំនួនដូចជា ៖ ផ្លូវជាតិលេខ៣ , ផ្លូវជាតិលេខ៧ , ផ្លូវជាតិលេខ៦ និងផ្លូវជាតិលេខ២១។ ក្នុងជំនួបជាមួយលោកស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការនិងដឹកជញ្ជូននៅថ្ងៃទី៨ ខែកក្កដា ឆ្នាំ២០១៩លោក Choi Young Sunបានថ្លែងថា “ក្រុមហ៊ុនខ្ញុំទទួលស្គាល់ថាផ្នែកខ្លះនៃកំណាត់ផ្លូវជាតិលេខ២១នេះ សាងសង់មិនស្របតាមលក្ខណៈបច្ចេកទេសតាមការលើកឡើងដោយ KICT និងបានយល់ព្រមដោះស្រាយ និងអនុវត្តផែនការជួសជុលដែលបានបញ្ជាក់ក្នុងរបាយការណ៍របស់ KICT”។ ក្នុងឱកាសនោះលោកស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការនិងដឹកជញ្ជូន បានស្នើឱ្យក្រុមហ៊ុនរបស់លោកChoi Young ពិនិត្យមើលលទ្ធភាពអ៊ុតកៅស៊ូ AC បន្ថែមពីលើចំនួនបីសង់ទីម៉ែត្រទៀត បន្ទាប់ពីជួសជុលរួចដើម្បីធ្វើឱ្យផ្លូវនេះមានភាពរឹងមាំប្រើប្រាស់យូរអង្វែង ដោយផ្ដោតលើគុណភាពជាចម្បងមុននឹងសម្ភោធដាក់ឱ្យ ប្រើប្រាស់ជាផ្លូវការ។ ជាការឆ្លើយតប លោក Choi Young Sun បានកត់សម្គាល់លើសំណើរបស់រដ្ឋមន្ត្រី និងសន្យាយកសំណើនេះ ទៅពិភាក្សាបន្ថែម ជាមួយអ្នកជំនាញបច្ចេកទេស របស់ក្រុមហ៊ុនដើម្បីពិនិត្យលទ្ធភាព ហើយសង្ឃឹមថា នឹងអាចផ្តល់ចម្លើយវិជ្ជមាន តបទៅតាមសំណូមពររបស់លោករដ្ឋមន្ត្រីផងដែរ។ លោករដ្ឋមន្រ្តីបញ្ជាក់ថា ក្រសួងនឹងសហការយ៉ាងជិតស្និទ្ធ ជាមួយក្រុមហ៊ុន ដើម្បីធ្វើឱ្យសកម្មភាព ការងារទាំងអស់ មានភាពរលូន និងប្រសិទ្ធភាពខ្ពស់៕