[Kampuchea Thmey] - លោកទេសរដ្ឋមន្ដ្រី ស៊ុន ចាន់ថុល ណែនាំដល់មន្ត្រីទាំងអស់ ត្រូវផ្ដល់សេវាសាធារណៈជូនពលរដ្ឋឲ្យបានលឿន ប្រសិទ្ធភាព និងតម្លាភាព
2019-08-02
Go to the website published Kampuchea Thmey
ភ្នំពេញ ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន បានជួបសំណេះសំណាលជាមួយមន្ត្រីឆ្នើមក្រសួង ប្រចាំខែឧសភា និងខែមិថុនា។
ពិធីនេះប្រព្រឹត្តឡើង ដោយមានការចូលរួមពីថ្នាក់ដឹកនាំក្រសួង និងមន្ត្រីឆ្នើមមកពីអង្គភាពក្រោមឱវាទក្រសួងប្រមាណ៦៤រូប កាលពីពេលថ្មីៗកន្លងទៅនេះ នៅទីស្ដីការក្រសួងសាធារណការ និង ដឹកជញ្ជូន។
នាឱកាសនោះ លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ទន្ទឹមនឹងការងារសាងសង់ ក្រសួងសាធារណការ និងដឹកជញ្ជូន មានតួនាទីផ្ដល់សេវាសាធារណៈជូនបងប្អូនប្រជាពលរដ្ឋឲ្យបានលឿន ប្រសិទ្ធភាព និងតម្លាភាព ធ្វើយ៉ាងណាបង្ខិតសេវាសាធារណៈឲ្យជិតប្រជាពលរដ្ឋ តាមរយៈការចុះបញ្ជីយានយន្ត ការប្រឡងយកប័ណ្ណបើកបរ និងការត្រួតពិនិត្យលក្ខណៈបច្ចេកទេសយានយន្តតាមប្រព័ន្ធអនឡាញ និងកម្មវិធីថែទាំផ្លូវ ROAD CARE Mobile App ជាដើម។
លោកទេសរដ្ឋមន្ត្រី បានសង្កត់ធ្ងន់ថា មន្ត្រីរាជការត្រូវខិតខំយកចិត្តទុកដាក់បំពេញការងារជូនក្រសួង និងប្រទេសជាតិ ដើម្បីភាពរីកចម្រើន និងការអភិវឌ្ឍ ព្រមទាំងបានប្រកាសបង្កើតគម្រោងជ្រើសរើសមន្ទីរឆ្នើមប្រចាំឆ្នាំ ដើម្បីជំរុញលើក ទឹកចិត្តឱ្យមន្ទីរសាធារណការ និងដឹកជញ្ជូនទូទាំងរាជធានី-ខេត្តទាំងអស់ខិតខំប្រឹងប្រែងបំពេញការងារ ឱ្យកាន់តែមានប្រសិទ្ធភាពក្នុងការសាងសង់ ជួសជុលថែទាំផ្លូវថ្នល់។
នៅក្នុងឱកាសនោះ លោកទេសរដ្ឋមន្ត្រីបានប្រកាស មន្ទីរសាធារណការ និងដឹកជញ្ជូនខេត្តកណ្តាល ជាមន្ទីរឆ្នើមប្រចាំ២០១៨ និង២០១៩ និងបានស្នើឲ្យមន្ទីរទាំងអស់ផ្សេងទៀតខិតខំប្រឹងប្រែងបំពេញតួនាទីធ្វើការបន្ថែមទៀត ដើម្បីបម្រើប្រជាពលរដ្ឋ។
ជាមួយគ្នានេះផងដែរ លោកទេសរដ្ឋមន្ត្រី ស៊ុន ចាន់ថុល ក៏បានថ្លែងអំណរគុណ និងកោតសរសើរដល់ថ្នាក់ដឹកនាំមន្ទីរ និងមន្ត្រីរាជការទាំងអស់ ដែលខិតខំប្រឹងប្រែងអស់ពីកម្លាំងកាយ ចិត្តក្នុងបុព្វហេតុបម្រើជាតិមាតុភូមិ និងបានផ្ដាំផ្ញើឲ្យមន្ត្រីទាំងអស់ ត្រូវអនុវត្តអនុសាសន៍ទាំង១១ចំណុច របស់សម្ដេចអគ្គមហាសេនាបតីតេជោនាយករដ្ឋមន្ត្រីឲ្យបានខ្ជាប់ខ្ជួន រួបរួមសាមគ្គី សហការគ្នាថែមទៀត ក្នុងការបម្រើប្រជារាស្ត្រឲ្យបានកាន់តែប្រសើរឡើងមួយកម្រិតទៀត៕
