ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារការ និងដឹកជញ្ជូន បានអំពាវនាវក៏ដូចជា ជំរុញឲ្យក្រុមនិស្សិតកម្ពុជា ដែលជាជ័យលាភី អាហារូបករណ៍ ទៅសិក្សានៅប្រទេសជប៉ុន និងសាធារណរដ្ឋកូរ៉េ ក្នុងឆ្នាំសិក្សា២០១៩ – ២០២២ ត្រូវចេះទាក់ទាញ អ្នកវិនិយោគប្រទេសទាំងពីរ ឲ្យមកបណ្ដាក់ទុនវិនិយោគ នៅប្រទេសកម្ពុជា ឲ្យបានកាន់តែច្រើនបន្ថែមទៀត ដើម្បីឲ្យប្រទេសជាតិ កាន់តែមានការអភិវឌ្ឍ រីកចម្រើនទៅមុខ ។ ក្នុងឱកាសសំណេះសំណាល ជាមួយមន្ដ្រីរាជការ ក្រសួងសាធារណការ និងដឹកជញ្ជូន ដែលជាក្រុមនិស្សិតជ័យលាភី អាហារូបករណ៍ទៅសិក្សា នៅប្រទេសជប៉ុន និងសាធារណរដ្ឋកូរ៉េ ក្នុងឆ្នាំសិក្សា២០១៩ -២០២២ ដោយមានការចូល រួមពីមន្ត្រីជាន់ខ្ពស់ក្រសួង នៅថ្ងៃទី១ ខែកក្កដា ឆ្នាំ២០១៩ លោក ស៊ុន ចាន់ថុល បានថ្លែងថា សុខសន្តិភាព និងស្ថេរភាពនយោបាយ ដ៏រឹងមាំ ក្រោមការដឹកនាំប្រកបដោយគតិបណ្ឌិត របស់សម្ចតេជោ ហ៊ុន សែន នាយករដ្ឋមន្ត្រីកម្ពុជា កម្ពុជាអាចរក្សាស្ថិរភាព ម៉ាក្រូសេដ្ឋកិច្ច ស្ថិរភាពអត្រាប្តូរប្រាក់ សិទ្ធិស្មើភាពគ្នា ក្នុងការវិនិយោគ រំហូរទេសចរណ៍បរទេស បង្កើតការងារធ្វើ និងប្រាក់ចំណូលប្រជាពលរដ្ឋ និងឱកាសកសាងហេដ្ឋារចនាសម្ព័ន្ធរូបវន្ត ជាកត្តាជំរុញកំណើនសេដ្ឋកិច្ចយ៉ាងសំខាន់ ។ លោកបញ្ជាក់ថា “បច្ចុប្បន្នវិនិយោគិនជប៉ុន កំពុងហូរចូលកម្ពុជា ជាបណ្តើរៗ ជាការដាក់ទុនរយៈពេលវែង ជាការវិនិយោគនាំនូវបច្ចេកវិទ្យាកម្រិតខ្ពស់ របៀបដឹកនាំរបស់ក្រុមហ៊ុនល្អនិងសំណូមពរឱ្យក្រុមនិស្សិត ជួយទាក់ទាញវិនិយោគិនជប៉ុន និងកូរ៉េ មកវិនិយោគ នៅកម្ពុជាបន្ថែមទៀត ជួយផ្សព្វផ្សាយផលិតផលកម្ពុជា និងបានលើកឡើងអំពីកំណែទម្រង់ស៊ីជម្រៅដើម្បីកាត់បន្ថយចំណាយផ្លូវការ និងក្រៅផ្លូវការដើម្បីទាក់ទាញវិនិយោគិន” ។ រដ្ឋមន្រ្តីបញ្ជាក់បន្ថែមថា ការខិតខំប្រឹងប្រែង របស់ក្រសួង ក្នុងការបំពេញការងារ បម្រើសេវាចាំបាច់ឱ្យបានល្អ ជូនប្រជាពលរដ្ឋ ប្រកបដោយភាពជឿជាក់ ធ្វើបានលឿន មានប្រសិទ្ធភាព និងតម្លាភាព ដែលក្នុងនោះរួមមាន ការបង្កើតមណ្ឌលប្តូរ និងពន្យារបណ្ណបើកបរ ការផ្តល់សេវាត្រួតពិនិត្យលក្ខណៈបច្ចេកទេសយានយន្ត នៅទូទាំងប្រទេស ដើម្បីបង្វិតសេវា ឱ្យកៀកទៅនឹងប្រជាពលរដ្ឋ ។ ក្នុងឱកាសនោះលោកក៏បានផ្តាំផ្ញើឱ្យនិស្សិត ត្រូវខិតខំរៀនសូត្របន្ថែម ដើម្បីត្រឡប់មកវិញ បម្រើស្ថាប័នជាតិ បង្កើតទំនាក់ទំនងល្អ ក្នុងចំណោមមិត្តភក្តិ ជានិស្សិតដើម្បីប្រយោជន៍ជាតិ ធ្វើអំពើល្អដើម្បីមុខមាត់ជាតិមាតុភូមិ ជួយផ្សព្វផ្សាយ អំពីការរីកចម្រើន របស់ប្រទេសជាតិ ឱ្យគេបានដឹង ជាពិសេសឆ្លៀត ឱកាសស្វែងយល់ ពីវប្បធម៌និងការរីកចម្រើន របស់ប្រទេសជាតិគេ ដើម្បីទទួលបទពិសោធន៍ ល្អៗ យកមកបន្តវេន ដឹកនាំអភិវឌ្ឍជាតិ ឱ្យកាន់តែមានការរីកចម្រើន ថែមទៀតផងដែរ ៕