(ភ្នំពេញ)៖ សមាគមរោងចក្រកាត់ដេរនៅកម្ពុជា (GMAC) នៅថ្ងៃទី២ ខែកក្កដានេះ បានចេញលិខិតមួយច្បាប់ស្នើសុំឯកឧត្តមទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ឲ្យមានវិធានការដំណោះស្រាយបណ្តោះអាសន្ន ចំពោះការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក។ GMAC ស្នើសុំរាជរដ្ឋាភិបាលកម្ពុជាឲ្យមានដំណោះស្រាយបណ្តោះអាសន្នមួយជាមួយសមាគមដឹកជញ្ជូនកម្ពុជា ពាក់ព័ន្ធការពង្រឹងការអនុវត្តច្បាប់ចរាចរណ៍របស់គណៈកម្មការជាតិសុវត្ថិភាពចរាចរណ៍ផ្លូវ​គោក ពីព្រោះសមាជិករបស់សមាគម បាននិងកំពុងក្លាយជាជនរងគ្រោះ នៅក្នុងបញ្ហានេះដោយមិនដឹងខ្លួន។ ក្នុងលិខិត GMAC សគាំទ្រ១០០% លើការអនុវត្តច្បាប់របស់គណៈកម្មការជាតិសុវត្ថិភាពចរាចរណ៍ផ្លូវ​គោក ក្នុងគោលបំណងទប់ស្កាត់ និងកាត់បន្ថយគ្រោះថ្នាក់ចរាចរណ៍ឲ្យបានដល់កម្រិតអតិបរមា។ GM​AC ក៏អំពាវនាវដល់បណ្តាម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់និងអ្នកបើកបររថយន្ត​ធុនធ្ងន់ ជាពិសេសក្រុមហ៊ុនដឹកជញ្ជូនទាំងអស់ដែលបាននិងកំពុងផ្តល់សេវាដឹកជញ្ជូនដល់រោងចក្រកាត់​ដេរសម្លៀកបំពាក់ ផលិតស្បែកជើង និងកាបូប (Travel Goods) ឲ្យបង្កើនការយកចិត្តទុកដាក់ និងអនុវត្ត​ឲ្យបានខ្ជាប់ខ្លួនជាអតិបរមានូវរាល់បទដ្ឋានបច្ចេកទេស និងលក្ខខណ្ឌតម្រូវ ដូចដែលមានចែងនៅក្នុងបទប្បញ្ញត្តិច្បាប់ស្តីពីចរាចរណ៍ផ្លូវគោក ដើម្បីធានានូវសុវត្ថិភាពលើផ្លូវសាធារណៈ និងធានានូវនិរន្តរភាពនៃការផ្តល់សេវាដល់អតិថិជន។ ជាមួយគ្នានេះ GMAC ក្រើនរំលឹកដល់សមាជិកទាំងអស់ឲ្យប្រើប្រាស់សេវារបស់ក្រុមហ៊ុនដឹកជញ្ជូន ដែលប្រើប្រាស់រថយន្តដឹកជញ្ជូនអនុលោមយ៉ាងពេញលេញតាមច្បាប់ស្តីពីចរាចរណ៍ផ្លូវគោក ដើម្បីជៀសវាងការកកស្ទះទំនិញដែលបណ្តាលមកពីការត្រួតពិនិត្យបច្ចេកទេសយានយន្ត។ សូមជម្រាបថា ក្រោមការរឹតបន្តឹងការអនុវត្តច្បាប់ចរាចរណ៍ផ្លូវគោកនៅគោលដៅដើមទីកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ រយៈពេល១៥ថ្ងៃកន្លងមក រថយន្តដឹកទំនិញសរុបចំនួន១៩៥៤គ្រឿង ត្រូវបានត្រួតពិនិត្យទាំងលក្ខណៈបច្ចេកទេស និងឯកសារពាក់ព័ន្ធ។ ជាលទ្ធផលក្រុមការងារបានរកឃើញថា រថយន្តល្មើសសរុបមានចំនួនតែ២២៤គ្រឿងប៉ុណ្ណោះ ស្មើនឹង១១% ដែលក្នុងនោះ៣០% ល្មើសលើលិខិតស្នាម និង៧០% ល្មើសលើលក្ខណៈបច្ចេកទេស។ ក្នុងសន្និសីទសារព័ត៌មានស្តីពីការងាររឹតបន្តឹងការអនុវត្តច្បាប់ចរាចរណ៍ផ្លូវគោកនៅគោលដៅដើមទីកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ នៅថ្ងៃទី២ ខែកក្កដានេះ ឯកឧត្តម សេង ​ឈួន​ រដ្ឋលេខាធិការ និងជាប្រធានក្រុមការងារត្រួតពិនិត្យរឹតបន្តឹងការអនុវត្តច្បាប់ស្ដីពីចរាចរណ៍ផ្លូវគោក ក្នុងរយៈពេល១៥ថ្ងៃកន្លងមក គិតចាប់ពីថ្ងៃទី១៥ ដល់ថ្ងៃទី៣០ ខែមិថុនា ឆ្នាំ២០១៩ គឺ​មានការកកស្ទះផលិតផលនាំចេញ-នាំចូល ប៉ុន្តែការកកស្ទះនេះ ក៏ដោយសារតែរថយន្តខ្លះមិនមានឯកសារគ្រប់គ្រាន់ ដូច្នេះអ្នកបើករថយន្តទាំងអស់នោះ មិនហ៊ានចូលកំពង់ផែ ទើបធ្វើឱ្យមានការស្ទះ៕