កម្មវិធីថែទាំផ្លូវ “ROAD CARE mobile app”, កម្មវិធីយល់ដឹងពីទ្រឹស្តីនៃការបើកបរលើទូរសព្ទដៃ “Cambodia Driving Rules” និងប្រព័ន្ធស្វ័យប្រវត្តិកម្មចុះបញ្ជីយានយន្ត "vehicle.mpwt.gov.kh" ត្រូវបានដាក់តាំងបង្ហាញ ក្នុងកម្មវិធីមហោស្រពគីហ្សូណា ជប៉ុន-កម្ពុជា ឆ្នាំ២០១៩ ----- នៅព្រឹកថ្ងៃសុក្រ ៣រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២២ ខែកុម្ភៈ ឆ្នាំ២០១៩ លោកជំទាវ មឹន មាណវី រដ្ឋលេខាធិការ និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញចូលរួមជាកិត្តិយសក្នុងកម្មវិធីដាក់តាំងបង្ហាញប្រព័ន្ធបច្ចេកវិទ្យារបស់ក្រសួងសាធារណការ និងដឹកជញ្ជូន ព្រមទាំងបានចូលរួមផ្សព្វផ្សាយសុវត្ថិភាពចរាចរណ៍ផ្លូវគោក និងចែកមួកសុវត្ថិភាពដល់អ្នកសារព័ត៌មាន និងសិស្ស និស្សិត នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ក្នុងកម្មវិធីមហោស្រពគីហ្សូណាជប៉ុន-កម្ពុជា ឆ្នាំ២០១៩។ ការដាក់តាំងបង្ហាញសមិទ្ធផល និងប្រព័ន្ធបច្ចេកវិទ្យាទាំងនេះត្រូវបានរៀបចំដោយ “មណ្ឌលផ្តល់ប្រឹក្សាយោបល់ លើសេវាសាធារណៈ“ របស់ក្រសួងសាធារណការ និងដឹកជញ្ជូន ដែលកំពុងដើរតួនាទីយ៉ាងសំខាន់ក្នុងការចូលរួមចំណែកផ្តល់ព័ត៌មាន និងដោះស្រាយបញ្ហាកង្វល់របស់ប្រជាពលរដ្ឋក្នុងការផ្តល់សេវាសាធារណៈ និងការអភិវឌ្ឍហេដ្ឋារចនាសម្ព័ន្ធកម្ពុជា។ លោកជំទាវ បានលើកឡើងពីគំនិតផ្តួចផ្តើមថ្មីៗរបស់ក្រសួង ក្នុងវិស័យបច្ចេកវិទ្យាព័ត៌មានវិទ្យា ក្នុងទូរសព្ទដៃ ដែលអាចឱ្យសាធារណជនទទួលបានព័ត៌មាន និងចំណេះដឹងទូទៅ ដែលក្នុងនោះមានដូចជា៖ ប្រព័ន្ធស្វ័យប្រវត្តិកម្មចុះបញ្ជីយានជំនិះ ត្រួតពិនិត្យលក្ខណៈបច្ចេកទេសយានជំនិះ ប្រឡងយកបណ្ណបើកបរ កម្មវិធីយល់ដឹងពីទ្រឹស្តីនៃការបើកបរលើទូរសព្ទដៃ (Cambodia Driving Rules) កម្មវិធីព័ត៌មានសាធារណការ និងដឹកជញ្ជូន (MPWT News) និងកម្មវិធីថែទាំផ្លូវ (ROAD CARE mobile app) ដែលសុទ្ធសឹងតែជាស្នាដៃកូនខ្មែរបង្កើតឡើង។ ជាទីបញ្ចប់ លោកជំទាវ ក៏បានណែនាំដល់សាធារណជនឱ្យប្រើប្រាស់កម្មវិធីបច្ចេកវិទ្យាព័ត៌មានវិទ្យា និងប្រព័ន្ធស្វ័យប្រវត្តិកម្មរបស់ក្រសួងដើម្បីទទួលបានភាពងាយស្រួល ចំណេញពេលវេលា និងកាត់បន្ថយការចំណាយ ព្រមទាំងសំណូមពរសិស្ស-និស្សិត និងសាធារណជនទាំងអស់ ឱ្យគោរពច្បាប់ចរាចរណ៍រាល់ពេលធ្វើដំណើរ គោរពសិទ្ធិអាទិភាពគ្នា បើកបរក្នុងល្បឿនកំណត់ ព្រមទាំងពាក់មួកសុវត្ថិភាពឱ្យបានត្រឹមត្រូវគ្រប់ពេលបើកបរ ទោះធ្វើដំណើរជិត ឬឆ្ងាយ។ សូមបញ្ជាក់ថា កម្មវិធីដាក់តាំងបង្ហាញប្រព័ន្ធបច្ចេកវិទ្យា របស់ក្រសួងសាធារណការ និងដឹកជញ្ជូន ក្នុងកម្មវិធីមហោស្រពគីហ្សូណា ជប៉ុន-កម្ពុជា ឆ្នាំ២០១៩នេះ នឹងធ្វើឡើងរយ:ពេល ៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែកុម្ភ: ឆ្នាំ២០១៩ ហើយសិស្ស-និស្សិត និងសាធារណជន ក៏អាចចូលរួមលេងល្បែងកំសាន្ត ដើម្បីទទួល បានមួកសុវត្ថិភាពពីកម្មវិធីផងដែរ។