នៅពេលខាងមុខនេះ រដ្ឋាភិបាលកម្ពុជាមានគម្រោងសាងសង់ផ្លូវរថភ្លើងលើអាកាសពីរាជធានីភ្នំពេញ ឆ្ពោះទៅកាន់ ពហុកីឡដ្ឋាន​ជាតិ​មរតកតេជោ ដែលមានទីតាំងស្ថិតនៅតំបន់អភិវឌ្ឍន៍របស់ក្រុមហ៊ុនលីយ៉ុងផាត់ ។ ឥឡូវនេះ ក្រសួងសាធារណការ និង ដឹងជញ្ជូន បានស្នើឱ្យ អង្គការ JICA ដើម្បីធ្វើការសិក្សាពីគម្រោងនៃការសាងសង់ផ្លូវរថភ្លើងលើអាកាសនេះ ។ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្រ្តី​ក្រសួង​សាធារណការ និង​ដឹកជញ្ជូន បានមានប្រសាសន៍ប្រាប់អ្នកសារព័ត៌មានកាលពីព្រឹកថ្ងៃទី ២៨ ខែ ធ្នូ ឆ្នាំ ២០១៨នេះ ​ថា ក្រសួង​បាន​ស្នើ​ឱ្យ​អង្គការ​ JICA សិក្សា​ពីការ​សាងសង់​ផ្លូវ​រថភ្លើង​លើ​អាកាស​ (AGT) ពី​រាជធានី​ភ្នំពេញ ទៅ​ពហុកីឡដ្ឋាន​ជាតិ​មរតកតេជោ ​ដែល​ស្ថិត​ក្នុង​តំបន់​អភិវឌ្ឍន៍​របស់​​ក្រុមហ៊ុន​​លីយ៉ុងផាត់ នៅពេលដែល​កម្ពុជានឹង​ធ្វើ​ជាម្ចាស់ផ្ទះ​កីឡាស៊ីហ្គេម​ឆ្នាំ​២០២៣។ ជាមួយគ្នានេះ ក្រសួងក៏​បាន​ស្នើឱ្យ​​វិស័យ​ឯកជន សិក្សាពី​គម្រោង​ដឹកជញ្ជូន​អ្នក​ដំណើរ​តាម​រថភ្លើង ពី​ព្រលាន​យន្តហោះ ទៅ​ស្ថានីយ​ភ្នំពេញ និង ទៅ​ដល់​ពហុកីឡដ្ឋាន​ជាតិ​មរតក​តេជោ​ ៕