ភ្នំពេញ៖ លោក ឃួង ស្រេង អភិបាលរាជធានីភ្នំពេញ នៅព្រឹកថ្ងៃទី២៨ ខែធ្នូ ឆ្នាំ២០១៨ ក្នុងឱកាសអញ្ជើញពិនិត្យ ដំណើរការរៀបចំត្រៀមសម្ពោធ វិមានអនុស្សាវរីយ៍ឈ្នះ ឈ្នះ មុនសម្ពោធជាផ្លូវការ ប្រកាសថា បានត្រៀមរថយន្តក្រុងសាធារណៈ៦០គ្រឿង សម្រាប់ដឹកអ្នកដំណើរ ដែលចង់ចូលរួមលេងកម្សាន្តនាឱកាសនោះ ដោយមិនតម្រូវឲ្យបង់ប្រាក់។ លោក ឃួង ស្រេង បានណែនាំឲ្យមន្ទីរសាធារណការ និងដឹកជញ្ជូន រួមជាមួយស្ថាប័នពាក់ព័ន្ធ ជំរុញការលាងសំអាតផ្លូវថ្នល់ វិថីឈ្នះឈ្នះ ដោយត្រូវបូមដី រៀបចំទីតាំងចំណត កែលំអរបរិស្ថាន ជុំវិញទីតាំងប្រារព្វពិធី ឲ្យបានស្អាតរួមទាំងពិនិត្យ បន្ថែមការតុបតែងលំអរ ភ្លើងបំភ្លឺទាំងខាងក្នុង និងខាងក្រៅបរិវេណវិមានឈ្នះ ឈ្នះ ។ ក្នុងនោះដែរ អភិបាលរាជធានីភ្នំពេញ ក៏បានណែនាំមន្ទីរសាធារណៈ បន្ថែមធុងសំរាម នៅជុំវិញទីតាំងប្រារព្ធចំនួន១៥០ទៀត ។ ជាងនេះទៅទៀតនោះ រដ្ឋបាល រាជធានីភ្នំពេញ នឹងត្រៀមរថយន្តក្រុងប្រមាណ៦០គ្រឿង សំរាប់ដឹកប្រជាពលរដ្ឋ ដែលមានបំណងចូលរួមកំសាន្តសប្បាយ ក្នុងឱកាសសម្ពោធវិមានឈ្នះ ឈ្នះ នេះ ដោយមិនយកប្រាក់ ចូលទៅទីតាំងប្រាព្ធពិធី ទាំងមកពីត្រើយខាងលិច និងត្រើយកើតទន្លេ។ លោកអភិបាលរាជធានីបានអំពាវនាវ ឲ្យប្រជាពលរដ្ឋអញ្ជើញចូលរូមកំសាន្ត សប្បាយរីករាយឲ្យបានច្រើនកុះករ៕