ភ្នំពេញ៖ អភិបាលនៃគណៈអភិបាលរាជធានីភ្នំពេញលោកឃួង ស្រេង រួមជាមួយមន្ត្រីរដ្ឋបាលរាជធានីភ្នំពេញ,មន្ទីរ និងអាជ្ញាធរដែនដី កាលពីព្រឹកថ្ងៃទី២៨ធ្នូនេះបានអញ្ជើញទៅពិនិត្យមើលសកម្មភាពរៀបចំលំអរ និងការងារជាច្រើនទៀតដែលរដ្ឋបាលរាជធានីភ្នំពេញជាចំណែករបស់ខ្លួនអ្នកទទួលអនុវត្តដើម្បីត្រៀមសម្ពោធវិមានអនុស្សាវរីយ៏ឈ្នះៗដែលជាការត្រួតពិនិត្យចុងក្រោយនៅមុនពិធីសម្ពោធមកដល់គឺថ្ងៃទី២៩.៣០និង៣១ធ្នូ ឆ្នាំ២០១៨នេះ។ ​លោកឃួង​ស្រេង បានណែនាំឲ្យមន្ទីរសាធារណៈការ និងដឹកជញ្ជូនរួមជាមួយស្ថាប័នពាក់ពន្ធ័ជំរិញការលាងសំអាតផ្លូវថ្នល់វិថីឈ្នះៗ,បូមដី រៀបចំទីតាំងចំណត កែលំអរបរិស្ថានជុំវិញទីតាំងប្រារព្វពិធីឪ្យបានស្អាតរួមទាំងពិនិត្យ បន្ថែមការតុបតែងលំអរភ្លើងបំភ្លឺទាំងខាងក្នុង និងខាងក្រៅបរិវេណវិមានឈ្នះៗ។ ក្នុងនោះដែរលោកអភិបាលក៏បានណែនាំឲ្យមន្ទីរសាធារណៈការបន្ថែមធុងសំរាមនៅជុំវិញទីតាំងប្រារព្វពីធីចំនួន១៥០បន្ថែមទៀត។ជាពិសេសទៀតនោះ រដ្ឋបាល រាជធានីភ្នំពេញនឹងត្រៀមរថយន្តក្រុងប្រមាណ៦០គ្រឿងសំរាប់ដឹកប្រជាពលរដ្ឋ ដែលមានបំណងចូលរួមកំសាន្តសប្បាយក្នុងឧិកាសសម្ពោធវិមានឈ្នះៗនេះដោយមិនយកប្រាក់ចូលទៅទីតាំងប្រាព្វពិធីទាំងមកពីត្រើយខាងលិច និងត្រើយកើតទន្លេ និងបានអំពាវនាវអោយបងប្អូនប្រជាពលរដ្ឋអញ្ជើញទៅចូលរូមកំសាន្ត សប្បាយរីរាយឲ្យបានច្រើនកុះករ។ នៅរសៀលថ្ងៃទី២៨ធ្នូនេះដែរ រដ្ឋបាលរាជធា នីភ្នំពេញក៏បានរៀបចំពិធីក្រុងពាលីសុំម្ចាស់ទឹកម្ចាស់ដីរៀបចំពិធីសម្ពោធវិមាន ឈ្នះៗឲ្យប្រព្រឹត្តទៅដោយរលូននិងជោគជ័យទៅតាមទំនៀមទំលាប់។ការសម្ពោធវិមានឈ្នះៗគឺជានិមិត្តរូបនៃការអនុវត្តដោយជោគជ័យគោលនយោបាយឈ្នះឈ្នះរបស់សម្តេចអគ្គមហាសេនាបតីតេជោហ៊ុនសែនគំរប់ខួប២០ឆ្នាំ និងបាននាំមកនូវសុខសន្តិភាពពេញផ្ទៃប្រទេសចេញផុតពីសង្គ្រាមស៊ីវិលដ៏រាំរ៉ៃនឹងបានធ្វើឲ្យខ្មែរគ្រប់រូបឈ្នះទាំងអស់គ្នាដោយមិនមានការបង្ហូរឈាមហើយសូម្បីតែអង្គការសហប្រជាជាតិក៏មិនអាចស្វែងរកសន្តិភាព និងបញ្ចប់ សង្គ្រាមដ៏រាំរ៉ៃនេះបានផង។វិមានឈ្នះៗក៏ជានិមិត្តរូបនៃសន្តិភាព ជាសំណង់ប្រវត្តិសាស្ត្រសំរាប់កូនខ្មែរជំនាន់ក្រោយបានយល់ពីខ្លឹមសារនៃសន្តិភាពដែលជា គ្រឹះនៃការអភិវឌ្ឍន៏។ដូច្នេះកូនខ្មែរគ្រប់រូបត្រូវតែថែរក្សាសុខសន្តិភាពដែលរកបានដោយការយកសាច់ស្រស់ឈាមស្រស់ទៅប្តូរបានមកនេះ ឲ្យបានឋិតឋេរគង់វង់ និងប្រឆាំងដាច់ខាតរាល់ការប៉ន់ប៉ងណាមួយដើម្បីបំផ្លាញសន្តិភាព បំផ្លាញសេចក្តីសុខរបស់ប្រជាពលរដ្ឋគឺត្រូវការពារឲ្យបានទោះក្នុងតំលៃណាក៏ដោយ៕