នៅព្រឹកថ្ងៃសុក្រ ១៤កើត ខែមិគសិរ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី ២១ ខែធ្នូ ឆ្នាំ២០១៨ មានការរៀបចំសិក្ខាសាលា កម្ពុជា-ជប៉ុន ស្តីពីការផ្គត់ផ្គង់ទឹកស្អាត និងអនាម័យដែលប្រព្រឹត្តទៅនៅសណ្ឋាគារ Raffles Le Royal ក្រោមអធិបតីភាព ឯកឧត្តម បុង ប៊ុនហួន អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ទេសរដ្ឋមន្រ្តី រដ្ឋមន្រ្តី ។ សិក្ខាសាលានេះត្រូវបានបែកចែកជាពីរផ្នែក មួយផ្នែកពាក់ព័ន្ធនឹងការងារទឹកស្អាតដោយក្រសួងឧស្សាហកម្ម និងសិប្បកម្ម និងមួយផ្នែកទៀតពាក់ព័ន្ធនឹងប្រព័ន្ធអនាម័យ (ការងារគ្រប់គ្រងទឹកកខ្វក់) ដោយ ហើយត្រូវរៀបចំឡើងដោយមានការឧបត្ថម្ភពី អង្គភាពទឹកស្អាត និងប្រព័ន្ធអនាម័យក្រុងគីតាគ្យូស៊ូ និងសមាគមពាណិជ្ជកម្មទឹកស្អាតក្រៅប្រទេសក្រុងគីតាគ្យូស៊ូ (KOWBA) និងទទួលបានការសហការឧបត្ថម្ភដោយ ក្រសួងឧស្សាហកម្ម និងសិប្បកម្ម ក្រសួងសុខាភិបាល ការងារ និងសង្គមកិច្ចជប៉ុន (MHLW) ក្រសួងដែនដី ហេដ្ឋារចនាសម័្ពន្ធ ដឹកជញ្ជូន និងទេសចរណ៍ជប៉ុន (MLIT) ទីភ្នាក់ងារសហប្រតិបត្តិការអនុ្តរជាតិជប៉ុន (JICA) មជ្ឍមណ្ឌលសកលជប៉ុនដើម្បីអនាម័យទីប្រជុំជន (GCUS) ដោយមានការចូលរួមពីមន្ទីរសា្ថប័នពាក់ព័ន្ធ និងក្រុមហ៊ុនជប៉ុនជាច្រើន។ សិក្ខាសាលាមានគោលបំណង៖ ១. ចែករំលែកនូវចំណេះដឹង និងព័ត៌មានស្តីពីស្ថានភាពទូទៅនៃវិស័យទឹកកខ្វក់ក្នុងប្រទេសកម្ពុជា ២. ចែករំលែកបទពិសោធន៍នៃការគ្រប់គ្រងទឹកកខ្វក់របស់ជប៉ុន ៣. ចែករំលែកនូវបច្ចេកវិទ្យានៃការធ្វើប្រព្រឹត្តកម្មទឹកកខ្វក់របស់ជប៉ុនដោយក្រុមហ៊ុនជប៉ុន ៤. ចែករំលែកព័ត៌មានស្តីពីកិច្ចសហប្រតិបត្តិការរវាងជប៉ុន និងកម្ពុជាលើវិស័យទឹកកខ្វក់ ៥. កិច្ចខិតខំប្រឹងប្រែងរបស់ជប៉ុន និងកម្ពុជាក្នុងការចូលរួមផ្សព្វផ្សាយ លើកកម្ពស់ និងបញ្ជ្រាបការយល់ដឹងពីវិស័យទឹកកខ្វក់។