ពោធិ៍សាត់៖ បេឡាជាតិរបបសន្តិសុខសង្គម (ប.ស.ស) បានចាត់ក្រុមការងារ សុវត្ថិភាពចរាចរណ៍ផ្លូវគោក សម្រាប់គាំពារ កម្មករនិយោជិត (ស.ផ.ក) សហការជាមួយ អគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានរៀបចំវគ្គប្រឡងយក ប័ណ្ណបើកបរ ដល់អ្នកបើកបររថយន្ត ដឹកកម្មករនិយោជិត ដែលគ្មានប័ណ្ណបើកបរ តាមប្រព័ន្ធស្វ័យប្រវត្តិកម្ម (Online) នៅរោងចក្រ Taiesy international co.,Ltd នៅរសៀលថ្ងៃសៅរ៍ ៨កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែធ្នូ ឆ្នាំ២០១៨ ដែលមានទីតាំង ស្ថិតនៅស្រុកក្រគរ ខេត្តពោធិ៍សាត់។ គោលបំណងនៃការប្រឡងនេះ គឺដើម្បីឱ្យអ្នកបើកបរថយន្ត ដឹកកម្មករទាំងអស់ មានប័ណ្ណបើកបរគ្រប់ៗគ្នា និងត្រូវមានប័ណ្ណបើកបរ ស្របតាមប្រភេទយានយន្ត ដឹកកម្មករ ដែលច្បាប់បានកំណត់។ ការប្រឡង យកប័ណ្ណបើកបរ ខាងលើនេះ មានបេក្ខជនចូលរួម ជាអ្នកបើកបររថយន្តដឹកកម្មករ និយោជិត ដែលប្រឡងយកប័ណ្ណ បើកបរ សរុបចំនួន ៥២នាក់ ក្នុងនោះប្រភេទ ខ ចំនួន ០៣នាក់ និងប្រភេទ ឃ២ ចំនួន ៤៩នាក់ ការប្រឡងនេះ មានទាំងទ្រឹស្តី និងដៃចង្កូតផងដែរ។ ការប្រឡងយកបណ្ណបើកបរនេះ ត្រូវបានរៀបចំឡើង ដោយមានការត្រួតពិនិត្យ និងគ្រប់គ្រងតាមប្រព័ន្ធ ប្រតិបត្តិការកុំព្យូទ័រស្វ័យប្រវត្តិ (Online) របស់ក្រសួងសាធារណការ និងដឹកជញ្ជូន ដែលតម្រូវឱ្យអ្នកប្រឡងយក បណ្ណបើកបរទាំងអស់ ត្រូវអនុវត្តតាមការណែនាំ យ៉ាងត្រឹមត្រូវ។ គួររំលឹកផងដែរថា យោងតាមរបាយការណ៍ ត្រីមាសទី២ ឆ្នាំ២០១៨ របស់ក្រុមការងារ សុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត (ស.ផ.ក) បានឱ្យដឹងថា ករណីគ្រោះថ្នាក់ចរាចរណ៍ មកលើកម្មករនិយោជិត មានការថយចុះចំនួន ១០% បើធៀបនឹងត្រីមាសទី១ ឆ្នាំ២០១៨ ហើយករណី គ្រោះថ្នាក់ចរាចរណ៍ ដែលបង្កឡើង ដោយរថយន្តដឹកកម្មករ និយោជិតមានចំនួន ៨ករណីតែប៉ុណ្ណោះ។ ក្រុមការងារសុវត្ថិភាព ចរាចរណ៍ផ្លូវគោក សម្រាប់គាំពារកម្មករនិយោជិត (ស.ផ.ក) នៃ បេឡាជាតិរបបសន្តិសុខសង្គម (ប.ស.ស) និងបន្តកិច្ចសហការ ជាមួយក្រុមការងារ អគ្គនាយកដ្ឋានដឹកជញ្ជូន នៃក្រសួងសាធារណការ និងដឹកជញ្ជូន ក្នុងការចុះបណ្តុះបណ្តាល ប្រឡង និងផ្តល់ប័ណ្ណបើកបរ ដល់អ្នកបើកបរ រថយន្តដឹកកម្មករ ដើម្បីឱ្យពួកគាត់មានប័ណ្ណបើកបរ ស្របតាមប្រភេទយានយន្ត ដែលច្បាប់បានកំណត់ ឱ្យបានទាំងអស់គ្នា ស្របតាមអនុសាសន៍ ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ជាមួយគ្នានេះផងដែរ ក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត (ស.ផ.ក) ក៏បានអំពាវនាវដល់អ្នកបើកបរ រថយន្តដឹកកម្មករទាំងអស់ត្រូវ៖ – គោរពច្បាប់ចរាចរណ៍ឱ្យបានខ្ជាប់ខ្ជួន – មិនផ្ទុកកម្មករលើសចំណុះ – ត្រួតពិនិត្យយានយន្ត មុនពេលចេញទៅដឹកកម្មករ – ឈៀករថយន្តជាប្រចាំ – ទៅប្រឡងយកបណ្ណបើកបរ ឱ្យស្របតាមប្រភេទយាន – ចូលរួមវគ្គបណ្តុះបណ្តាល របស់ក្រុមការងារ ប.ស.ស ស្តីពីច្បាប់ចរាចរណ៍ផ្លូវគោក – ជាពិសេសប្រកាន់ខ្ជាប់ នូវក្រមសិលធម៌ទាំង ១០ ចំណុចរបស់គណៈកម្មការជាតិ សុវត្ថិភាពចរាចរណ៍ផ្លូវគោក៕