ភ្នំពេញ៖ ផ្លូវជាតិលេខ៤៨ប្រវែង១៥០គីឡូម៉ែត្រ ចាប់ពីផ្លូវបំបែកស្រែអំបិលទៅដល់ទីរួមខេត្តកោះកុង ដែលរងការខូចខាតដោយជំនន់ទឹកភ្លៀង ការដឹកជញ្ជូនលើសទម្ងន់កំណត់ប្រវែង៦៣គីឡូម៉ែត្រ ត្រូវបានលោកស៊ុនចាន់ថុលអះអាងនិងសន្យាថានឹងជួសជុលឱ្យហើយរួចរាល់ជាមួយថវិកាប្រមាណ១២លានដុល្លារមុនពិធីបុណ្យសមុទ្ររៀបចំនៅខេត្តកុងនាថ្ងៃទី១៣ធ្នូ ខាងមុខចូលមកដល់ ។ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូនមានប្រសាសន៍ ប្រាប់ក្រុមអ្នកសារព័ត៌មានកាលថ្មីៗនេះពីថ្ងៃទី១៣ វិច្ឆិកា កន្លងមកថា ថ្ងៃនេះជាថ្ងៃទី១៣វិច្ឆិកា ដូចនេះយើង​ខ្ញុំនូវ​មានមួយខែទៀត រហូតដល់ថ្ងៃទី១៣ ខែធ្នូ ២០១៨ អីចឹងក្រុមការងារទំាងអស់ បានប្តេជ្ញាចិត្តថានឹងធ្វើឱ្យចប់រួចរាល់(ជួសជុលផ្លូវ)នៅមុនថ្ងៃទី១៣ខែធ្នូ។ យើងច្បាស់នឹងធ្វើបាន ដោយសារយើងមានគ្រឿង​ចក្រ​សរុបជាង៤០០គ្រឿង ។ដូច្នេះយើងធ្វើឱ្យបានចប់នៅមុនថ្ងៃទី១៣ខែធ្នូ ពោលធ្វើបានចប់បុណ្យសមុទ្ររបស់យើង»។ លោកទេសរដ្ឋមន្ត្រី សង្កត់ធ្ងន់ថា ៖«ខ្ញុំជឿជាក់លើមន្ត្រីយើង ថានឹងធ្វើឱ្យហើយ គ្មានពាក្យថាអត់ហើយនោះទេ យប់ក៏ត្រូវធ្វើដែរ បើថ្ងៃមានភ្លៀងធ្វើមិនបាន។នេះជាការប្តេជ្ញាចិត្តរបស់ក្រសួងសាធារណៈការនិង​ដឹកជញ្ជូន នៅចំពោះ រាជរដ្ឋាភិបាលយើង ដែលលោក(សម្តេចតេជោ ហ៊ុនសែន)បានសួរថា តើក្រសួងធ្វើហើយឬមិនហើយមុនថ្ងៃបុណ្យសមុទ្រ? យើងខ្ញុំបានឆ្លើយទៅសម្តេចថា យើងខ្ញុំនឹងធ្វើឱ្យនៅមុន​ថ្ងៃបុណ្យ​សមុទ្រខាងមុខនេះ»។ បើតាមក្រសួងសាធារណៈការកាលថ្ងៃទី១៣ ខែវិច្ឆិកា លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណប្រតិភូចុះពិនិត្យ ស្ថានភាពការដ្ឋានជួសជុលថែទាំផ្លូវជាតិលេខ៤៨ ដែលទទួលរងការខូចខាតដោយជំនន់ទឹកភ្លៀង កន្លងមក ។ផ្លូវនេះមានប្រវែង១៥០គីឡូម៉ែត្រ ចាប់ពីផ្លូវបំបែកស្រែអំបិលទៅដល់ទីរួមខេត្តកោះកុង។ ក្នុងចម្ងាយផ្លូវ ១៥០គីឡូម៉ែត្រនេះ ផ្លូវប្រវែង៦៣គីឡូម៉ែត្រ ត្រូវទទួលរងការខូចខាតដោយជំនន់ទឹកភ្លៀង ការដឹកជញ្ជូន លើសទម្ងន់កម្រិតកំណត់ និងកត្តាធម្មជាតិផ្សេងៗទៀត។